{idkey=2929b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2609-booshi-wever-upp-nombracion-di-jerry-staring-ta-un-nombracion-basa-riba-patronahe-politico-den-optima-forma%3FItemid%3D101][title=Booshi+Wever+%28UPP%29%3A+Nombracion+di+Jerry+Staring+ta+un+nombracion+basa+riba+patronahe+politico+den+optima+forma][desc=NoticiaCla+a+publica+recientemente+un+declaracion+di+Minister+Schwengle+na+unda+ta+bin+padilanti+cu+proximamente+lo+anuncia+e+nombracion+di+Jerry+Starring+como+director+nobo+di+Departamento+di+Salubridad+Publico.+E+nombracion+di+un+persona+cu+un+HBO-opleiding+a+bira+posibel+despues+cu+a+cambia+e+ley+al+respecto%2C+pasobra+antes+solamente+un+persona+cu+ta+un+medico+por+a+wordo+nombra+como+tal.+Ta+conoci+cu+e+minister+actual%2C+cu+boca+grandi%2C+a+bisa+cu+un+di+su+puntonan+mas+importante+den+su+maneho+l]}
NoticiaCla a publica recientemente un declaracion di Minister Schwengle na unda ta bin padilanti cu proximamente lo anuncia e nombracion di Jerry Starring como director nobo di Departamento di Salubridad Publico.
E nombracion di un persona cu un HBO-opleiding a bira posibel despues cu a cambia e ley al respecto, pasobra antes solamente un persona cu ta un medico por a wordo nombra como tal.

Ta conoci cu e minister actual, cu boca grandi, a bisa cu un di su puntonan mas importante den su maneho lo ta pa crea un propio Departamento di Inspeccion di Salubridad na Aruba.
Su motibo principal ta basa riba e proposito pa mehora e cuido na Aruba y beneficia directamente e patient enormemente.
Creacion di un propio Inspeccion na Aruba lo no ta facil, mirando e hecho di e grandura di Aruba.
Ta p'esey mi persona a sigui cu e contract cu dr. Posner a firma cu Inspectie di Hulanda, na unda cu e instancia aki tabata haci e Inspeccion ora cu esaki wordo solicita, y tambe tabata bin haci "audits" riba varios specialisacionnan aki na Aruba.
Mi tin cu bisa cu esaki tabata traha hopi bon, y no tabata costa mucho hopi, particularmente si nos compare cu un organo pisa cu lo mester bin aki na Aruba mes.
No ban lubida cu e inspeccion aki lo mester bay emplea varios dokternan den su servicio cu nos tur sa cu lo bay costa masha hopi placa.
Pero esey ta escohencianan di cada gobierno, pero remarcabel ta e hecho cu ya caba na medio di 2013 Minister de Meza a firma un contract cu un persona Hulandes cu tabata traha na Corsow como Inspector, y lo mester a bin pa set up un propio Inspectie na Aruba. Sinembargo pa un motibo of otro, despues cu Schwengle a bira minister, a deshaci di e contract aki.
Si un propio inspeccion ta asina importante, dicon no a sigui cu e contract cu de Meza a firma???

Ta p'esey nos no ta compronde cu en bes di a percura cu e Departamento di Inspeccion lo a ser lanta prome cu tur otro cos, ta bay over na nombracion di un director di e departamento di Salubridad prome.
Den e splitmento di e parti di Directie y Inspectie nos a ripara cu a baha e rekisitonan pa por bin na remarke pa bira director di e Directie Volksgezondheid.
Manera ta conoci e Director di Salubridad Publico ta un di e funcionnan top cu tin e schaal 16 cu un salario di schaal 16 + 25%.
Awor cu a baha e rekisitonan pa bira director y pa acomoda e coordinador di e minister, a baha e schaal tambe??
E proceso pa nombracion di e director a inicia basta tempo pasa caba, y segun nos tin entendi sr. Staring den principio no tabata un di esnan cu a solicita.
Con esaki por ta posibel?
Den un gobernacion drechi y cu un minister drechi, hamas esaki por ta posibel.
Ta interesante pa sa ki schaal sr. Staring tin awor como "arbeidscontractant".

Den un gobernacion basa riba principionan di "Good Governance" tipo di nombracionnan asina no por ta posibel.
Y ningun hende por biba kere cu nombracionnan asina lo no ser cuestiona despues den un otro gobernacion, paso un departamento vital manera esun di Salubridad Publico no mag di tin lugar pa patronahe politico manera esaki.
Mester percura pa nombra e miho persona cu un experencia amplio y cu e miho cualificacionnan.

Pero segun nos por a compronde cu atrobe e minister despues cu un comision consistiendo di hendenan drechi y adecua, no kier a baila na e tono di e minister, esaki a core nombra algun di su muchanan manda, pa nan pasa e nombracion di sr. Staring.

No ta pasa un dia cu nos por experiencia criticanan fuerte di nos pueblo contra e cuido medico na Aruba.
Pueblo tabata convenci cu minister Visser no a sirbi como titular di salubridad, y esaki a wordo comparti door di su propio partido, pasobra no a brinda e oportunidad di subi lista durante e ultimo eleccion.
Pueblo tabata tin e speransa cu e specialista di pulmon lo por a trece un alivio, pasobra e lo mester a conoce e dolor cu patientnan ta experiencia.
E ultimo dos añanan sinembargo nos salubridad publico a deteriora aun mas cu un minister cu ta exhibi un menosprecio pa e derechonan di patientnan, ta lansa criticanan infunda contra laboratorionan, y ta buta man riba cabes di su coleganan.
Un maneho sin pia ni cabes, manera Raad van Advies mes a declara.
Y den tur esaki e minister a wordo asesora pa sr. Staring cu ta e consehero principal di e minister. P'esey nos no ta kere cu e ta the right person on the right place.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 20, 2016

Expresionnan haci den e articulo aki no necesariamente ta refleha opinion di ArenaPoliti.co