{idkey=9576b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2729-endy-croes-mep-angel-bermudez-ora-bo-bisa-a-bo-mester-bisa-b-tambe-y-no-traga-palabra%3FItemid%3D101][title=Endy+Croes+%28MEP%29%3A+Angel+Bermudez%2C+ora+bo+bisa+%E2%80%9CA%E2%80%9D+bo+mester+bisa+%E2%80%9CB%E2%80%9D+tambe+y+no+traga+palabra][desc=Den+un+articulo+fin+di+siman+di+minister+Angel+Bermudez+por+a+tuma+nota+con+diripiente+Bermudez+a+pega+cu+e+virus+di+Mike+Eman%2C+esta+%E2%80%9CEmanipulacion%E2%80%9D%2C+hungando+politiek+cual+pueblo+hustamente+a+spera+otro+di+un+%E2%80%9Cno+politico%E2%80%9D.+Bermudez+a+splica+cu+Aruba+ta+e+unico+pais+den+Reino+cu+no+ta+gosa+di+un+interes+bao+di+1.5+of+2%25+riba+su+debe+nacional.+Bermudez+a+menciona+tambe+e+%E2%80%9CWitte+Donderdag+Akkoord%E2%80%9D%2C+cual+porcierto+ta+e+protocol+unda+AVP+a+firma+cu+Plasterk+y+Dijsselbloem+di+Hulanda+bay]}
Den un articulo fin di siman di minister Angel Bermudez por a tuma nota con diripiente Bermudez a pega cu e virus di Mike Eman, esta “Emanipulacion”, hungando politiek cual pueblo hustamente a spera otro di un “no politico”. Bermudez a splica cu Aruba ta e unico pais den Reino cu no ta gosa di un interes bao di 1.5 of 2% riba su debe nacional. Bermudez a menciona tambe e “Witte Donderdag Akkoord”, cual porcierto ta e protocol unda AVP a firma cu Plasterk y Dijsselbloem di Hulanda bayendo di acuerdo pa un posibel prestamo na interes abao despues cu Aruba ricibi entre otro un evaluacion positivo di IMF. Pero alaves akiden a firma pa e famoso CFT haña bida y pues Mike Eman a bende parti di nos Status Aparte riba e tereno financiero. Segun Bermudez, esnan cu ta bisa cu esaki no ta realisabel ta pasobra nan no tin argumento y net esnan cu semper ta referi na consehonan di CFT.  Ora bo bisa A bo mester bisa B tambe. Angel awor ta yorando pa un interes mas abao y den mesun rosea ta tira palabra sin menciona nomber. Tempo di MEP na 2009 gobierno tabata paga menos di 100 miyon na interes pa aña y actualmente na interes so Aruba ta pagando mas di 200 miyon pa aña. Esaki ta splica un poco di e caos di Bo maneho hunto cu Mike de Meza cu tabata promer cu Bo. Ora MEP a splica cu boso a REDOBLA nos debe nacional boso a purba sconde usando forsa di media pa sigui manipula. Siman pasa Bo lider a expresa den parlamento cu e ta orguyoso di e DEBE y e DEBE t’ey y cu e pueblo lo tin cu bay pag’e. Acaso Bo tambe ta mesun orguyoso? E expresion aki ta un berguensa nacional. Angel Bermudez mester splica tambe dicon e ta pensa cu Hulanda no ta cooperando pa Aruba haña un prestamo cu interes mas abao? Bermudez, bo ta haña normal cu un pais den un crisis financiero net gastonan di luho manera biahamento di Mike Eman ta 700 mil florin cual ta representa un aumento di 29%? Bo ta haña ta normal cu e post di biahamento total a subi cu 25% cual ta refleha 2 miyon na biahamento?  Bo ta haña ta normal cu den crisis gastonan di abogado a subi di 13 miyon den 2015 pa 15 miyon den 2016? Bo ta haña ta normal cu den crisis gastonan pa paga companianan di amigo di AVP pa propaganda minister a aumenta di 2 miyon den 2015 pa 3 miyon den 2016, un aumento di rond 50%?  Bo ta haña ta normal cu Bo partido a campaña cu lo no saca ningun dividendo for di companianan estatal y den presupuesto 2016 boso tin presupuesta pa chica y lo ranca na un manera cruel 19 miyon for di e companianan aki? Bermudez tur cosnan aki Hulanda  ta wak. Bo kier yora awe y tira palabra na manera fini pa otro pero waak e presupuesto cu Bo mes a presenta y sostene cuanto gastonan na luho y pa compinchi tin presupuesta. Tur esaki ta cu Bo bendicion. Con serio Bo kier nos tumabo?  Pues si Bo kier ta politico subi lista y laga pueblo scoge bo. Si di carambola Bo a drenta haci Bo trabao como vak minister na un maneria serio, pero momento Bo kier hunga politica nos lo sa di atende cu bo di inmediato mustrando pueblo e berdad. Pues ora bo bisa “A” corda di bisa “B” tambe.

Expresionnan haci den e articulo aki no necesariamente ta refleha opinion di ArenaPoliti.co