{idkey=8841b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3267-booshi-wever-upp-renobacion-y-expansion-di-hospital-ta-sosode-segun-normanan-palabra-di-antemano-parce-cu-ni-gobierno-ni-parlamento-ni-gremionan-ta-preocupa-pa-controla-si-esaki-ta-cuadra-cu-berdad%3FItemid%3D101][title=Booshi+Wever+%28UPP%29%3A+Renobacion+y+expansion+di+hospital+ta+sosode+segun+normanan+palabra+di+antemano%3F+Parce+cu+ni+gobierno%2C+ni+parlamento%2C+ni+gremionan+ta+preocupa+pa+controla+si+esaki+ta+cuadra+cu+berdad][desc=Pa+hopi+tempo+UPP+no+a+mishi+cu+e+topico+di+proyecto+di+hospital%2C+esta+e+renobacion+y+expansion%2C+pero+UPP+no+a+perde+ningun+oportunidad+pa+sigui+e+desaroyonan+di+acerca.+Apesar+cu+UPP+tabata+den+un+receso%2C+den+proceso+pa+renobacion+di+programa+di+partido%2C+nos+ta+sinti+e+necesidad+pa+toch+comparti+e+informacionnan+preocupante+cu+UPP+ta+ricibiendo+encuanto+e+topico+aki.+Desde+inicio+di+e+proyecto+di+hospital+UPP+a+bin+ta+denuncia+actonan+cu+tin+tur+caracteristicanan+di+corupcion+di+dia+cla.+UPP+a+]}
Pa hopi tempo UPP no a mishi cu e topico di proyecto di hospital, esta e renobacion y expansion, pero UPP no a perde ningun oportunidad pa sigui e desaroyonan di acerca.
Apesar cu UPP tabata den un receso, den proceso pa renobacion di programa di partido, nos ta sinti e necesidad pa toch comparti e informacionnan preocupante cu UPP ta ricibiendo encuanto e topico aki.
Desde inicio di e proyecto di hospital UPP a bin ta denuncia actonan cu tin tur caracteristicanan di corupcion di dia cla. UPP a menciona hasta publicamente nomber di esnan envolvi, pero nunca nos a wordo hiba corte pa rectificacion.
Lamentablemente nos mester constata cu e proyecto di hospital ta hole mas stinki cu nunca, pero parce cu ningun hende ta preocupa cu esaki. Ni e Minister di Salubridad, cu a keda di bin cu e resultado di un "feitenonderzoek", ni Parlamento cu a exigi e "onderzoek" aki.
Te awe e reunion yama dor di Parlamento no tabata tin su continuacion. Y Parlamento no ta haci nada al respect!

Loke ta preocupa UPP y pa cua nos kier alerta nos pueblo, ta e forma con e proyecto di Hospital ta wordo ehecuta actualmente.
E degeneracion di nos pais, cu tur dia ta haci nos dolor, ta keda demostra ora cu constantemente nos por mira un corupcion structura riba nos isla. Esaki den hopi proyectonan, mientras cu nos instancianan cu mester haci e control necesario, no ta haciendo net net nada.
Hasta Raad van Advies a bin ta adverti cu Parlamento ta laga hopi di desea den ehecucion di su deber di controla e maneho di gobierno debidamente.
Den e caso di hospital, nos por mira cu ni e Raad van Toezicht, ni e Raad van Bestuur di hospital, ni SOGA, parce di ta eherce ningun control ni supervision riba e proyecto cu ta den ehecucion.
P'esey UPP ta puntra minister Schwengle, pa asumi su responsabilidad y exigi for di instancianan aki pa raporta cerca dje y na Parlamento y na Pueblo, ki tipo di supervision tin riba e proyecto aki?

E motibo di nos preocupacion ta, pasobra UPP a ricibi informacion cu tin deficiencia den uso di calidad di material. Material cu no ta cuadra pa uso den un hospital, segun propio "bestek" cu a wordo traha.
Por menciona entre otro cu tubo di koper ta core riba of den beton sin e isolacion necesario.
Tambe e calidad di e plafond y hardboard cu ta wordo usa? Lo ta trata aki di un calidad inferior, y pues mas barata, cu loke e "bestek" ta exigi pa e hospital?
Segun e informacion cu UPP a acumula, lo tin espacionan cu a resulta di ta mas chikito cu loke e mapa ta exigi?
Unda e rol di inspeccion di e.o. DOW ta? Of esaki tambe ta keda den man di INFRA-Team, cu defacto a bira manera un “real estate” cu propiedadnan di pueblo y na unda nan unico meta parce di ta pa haci negoshi so???!!!

Aparentemente lo tin un retraso tambe den e construccion di e Operatiekamer. Kico esaki lo ensera? Minister Schwengle lo mester bolbe bay Parlamento pa pidi un aumento riba e parti aki?

Informacion cu UPP ta dispone di dje ta, cu SOGA ta ausente den henter e asunto di supervision aki, mientras cu e persona cu mester controla pa SOGA no t’ey mes.
Tanto SOGA como Raad van Toezicht di HOH parce di ta labando nan man.
Como sifuera poco, nos di UPP tin comprendi cu e persona, cu a wordo apunta politicamente pa gobierno pa coordina e proyecto y haci e control, parce di no tin ningun benul di construccion, y no kier of no por atende e kehonan.

Pues mientras cu no tin e control necesario, hayando un proyecto inferior y cu materialnan inferior, e costonan ta parce di ta bayendo den un direccion cu lo bay costa nos pueblo mas placa ainda.
Segun informacion loke nan ta paga na Corsow na florin pa cierto material y trabow den realisacion di e proyecto di hospital, nos lo ta pagando aki na Aruba e mesun suma pero den dollars.

Apesar cu UPP no tin mucho confianza mas den e constelacion ni di Parlamento ni di Gobierno, nos ta exigi pa duna atencion na e asunto aki.
Tambe e proximo Parlamento tin un trabou pa haci den esaki, por medio di un encuesta parlamentario, unda cu mester investiga henter e proyecto aki for di comienzo te fin, y asina responsabilisa esnan cu a percura pa e proyecto aki yega te na extremo aki di ta hole masha stinki mes.
Den esaki niun ta scapa, ni gobierno, ni e Minister di Salubridad actual ni esun anterior, ni AIB, ni SOGA, ni Hospital y ni e InfraTeam: cada un di nan mester wordo poni responsabel pa nan actonan cu a bay contra bienestar di e pueblo Arubano.
Straño alabes ta cu ta parce cu ningun sindicato ta preocupa tampoco, pa colmo ni ABV.
ARUBA, QUO VADIS???

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 8, 2016

Expresionnan haci den e articulo aki no necesariamente ta refleha opinion di ArenaPoliti.co