{idkey=2574b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3509-parlamentario-mr-xiomara-maduro-mep-bou-di-duim-di-hulanda-tur-perspectiva-mester-ta-positivo%3FItemid%3D101][title=Parlamentario+mr.+Xiomara+Maduro+%28MEP%29%3A+Bou+di+duim+di+Hulanda+tur+perspectiva+mester+ta+positivo][desc=Awe+Ministernan+Eman+y+Bermudez+ta+gaba+cu+e+perspectiva+di+e+rating+di+Standard+%26amp%3Bamp%3B+Poor%E2%80%99s+%28S%26amp%3Bamp%3BP%29+a+cambia+di+BBB+stabiel+pa+positivo.+Ta+bende+esaki+como+un+logro+grandi+pa+nos+Gobierno.+Pero+laga+nos+ta+sincero+cu+otro%2C+bou+di+Gabinete+Eman+S%26amp%3Bamp%3BP+a+degrada+e+rating+di+nos+Pais+y+esaki+no+a+mehora+mas.+Pero+como+cu+awor+nos+ta+bou+di+duim+di+Hulanda+via+e+superivicion+financiero+di+CAFT+y+cu+e+refineria+por+habri+bek+danki+na+MEP%2C+S%26amp%3Bamp%3BP+ta+bisa+cu+e+perspectiva+stabiel+ta+cambia+pa+]}
Awe Ministernan Eman y Bermudez ta gaba cu e perspectiva di e rating di Standard & Poor’s (S&P) a cambia di BBB stabiel pa positivo. Ta bende esaki como un logro grandi pa nos Gobierno. Pero laga nos ta sincero cu otro, bou di Gabinete Eman S&P a degrada e rating di nos Pais y esaki no a mehora mas. Pero como cu awor nos ta bou di duim di Hulanda via e superivicion financiero di CAFT y cu e refineria por habri bek danki na MEP, S&P ta bisa cu e perspectiva stabiel ta cambia pa bira uno cu miras positivo. Algo cu sibo wak bon no por ta otro ya cu bou di duim di Hulanda tur perspectiva mester ta positivo.

Bou di duim
Locual cu Ministernan Eman y Bermudez ta lubida di menciona ta, cu como nos Pais, danki na e mal maneho financiero y tur e abusonan di Gabinete Eman, awe Aruba ta bou di supervicion financiero di Hulanda via CAFT. Den e scenario aki na unda cu e cartera di e Pais aki ta bou di curatela di Hulanda, e confiansa ta wordo crea serca S&P cu e situacion financiero no por bay bira pio cu ya caba e ta. Hulanda mes ta conta cu un rating AAA positivo y ta duna tur Pais den Reino e ora e beneficio di duda cu si cos bay robes mes, e inversionista lo por conta cu Hulanda ta suficiente bon para pa para borg pa e debenan haci. Ta esaki ta locual ta pone cu ora cu como Pais bo ta forma parti di Reino of manera den nos caso bo ta bou duim di Hulanda via CAFT, bo ta lift mee cu nan rating positivo y bo tambe ta haya un rating positivo. Alomenos cu bo abusa di e finanzas publico di bo Pais di tal modo cu S&P ta degrada bo rating y dunabo un perspectiva negativo manera ta e berguensa cu Gabinete Eman a pone Aruba pasa aden poco tempo pasa ora cu S&P a degrada e rating di Aruba. Un degradacion cu te dia di awe ta vigente danki na e mal maneho di Gabinete Eman.

No ta bon gobernacion a duna perspectiva positivo
Banda di esaki Ministernan Eman y Bermudez no ta bisa cu ta como cu a harass e cartera di Pueblo cu medida di hisa prima, corta den APFA, libra gobierno di debe di SVB, bin cu medida di VAS riba comerciante, hisa BBO via AZV a logra yega na fondo publico pa mustra un mihor cara financiero. No ta bon gobernacion di parti di Gabinete Eman a duna nos un perspectiva positivo, ta abuso, triki, e hecho cu nos ta bou duim di Hulanda y e reapertura di e refineria danki na MEP cu a para su desmantelacion, a hiba nos aki.

No ta bati man
Nos Pais pa largo tempo no sa kiko ta gobernacion na serio. Nos Minister Eman mes di baina ta na Aruba, corda pa tuma decicion serio y sostenibel pa nos Pais. Ta puro triki financiero nan ta haciendo pa lombra wowo di instancianan manera CAFT y S&P. E perspectiva postivo aki di S&P no ta kita afor cu pronto e postema lo rementa. Pesey nos no ta bay bati man pa e abuso y trikinan di Gabinete Eman y pior ainda nos no ta bati man pa e berguensa di a perde nos autonomia financiero bay bou duim di Hulanda, djies pasobra cu Eman a haci deshaci cu e fondonan publico di nos Pais. Esun cu kier bati man pa esnan cu ta hiba e Pais aki den perdicion dal bay. Pero corda si, cu ta danki na MEP cu a para e desmantelacion di e refineria y como cu nos ta bou duim di Hulanda awe e perspectiva di S&P no por ta otro cu positivo.

8 juni 2016

Expresionnan haci den e articulo aki no necesariamente ta refleha opinion di ArenaPoliti.co