{idkey=9185b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4103-elton-lioe-a-tjam-abo-unda-e-orguyo-dignidad-honor-y-curashi-di-e-arubiano-a-bay%3FItemid%3D101][title=Elton+Lioe-A-Tjam+%28ABO%29%3A+Unda+e+orguyo%2C+dignidad%2C+honor+y+curashi+di+e+Arubiano+a+bay%3F][desc=Hopi+hende+ainda+ta+vota+pa+e+mesun+partido%2C+pasobra+ainda+nan+ta+emocionalmente+mara+na+e+balornan+y+e+idealnan+di+pasado.+Pero+si+e+hendenan+aki+haci+nan+mes+e+pregunta+cuanto+di+esakinan+a+resta+of+ki+sorto+di+contenido+a+wordo+duna+na+esakinan%2C+anto+nan+lo+keda+hopi+decepciona+pa+realisa+cu+%E2%80%98Materialismo+a+vence+Idealismo%E2%80%99.+E+vision+y+e+so%C3%B1o+di+nos+dos+estadistanan+mas+grandi%2C+pa+haci+di+Aruba+un+nacion+unda+respet%2C+felicidad%2C+harmonia+y+progreso+lo+a+reina%2C+a+keda+reduci+na+corupcion%2C+]}
Hopi hende ainda ta vota pa e mesun partido, pasobra ainda nan ta emocionalmente mara na e balornan y e idealnan di pasado. Pero si e hendenan aki haci nan mes e pregunta cuanto di esakinan a resta of ki sorto di contenido a wordo duna na esakinan, anto nan lo keda hopi decepciona pa realisa cu ‘Materialismo a vence Idealismo’. E vision y e soño di nos dos estadistanan mas grandi, pa haci di Aruba un nacion unda respet, felicidad, harmonia y progreso lo a reina, a keda reduci na corupcion, entreguismo y cobardia. Parce cu tur nan luchanan y sacrificionan tabata envano, manera e politico tradicional di awendia, a pone Aruba na rudia di tur otro nacionalidadnan.

Cada dia e ta bira mas dificil pa no mira con e politico tradicional a kita democracia, dignidad, orguyo y honor di pueblo. Cada dia e ta bira mas dificil pa no mira con e isla aki a wordo destrui y entrega na otronan. Cada dia e ta mas dificil pa cera bo wowo of mantene bo boca cera, ora bo ta ripara cuanto inhusticia y abuso ta wordo cometi contra e pueblo. Mirando tur esaki, automaticamente e siguiente pregunta mester drenta e cabes di cualkier ciudadano: Con e por a yega asina leu cu e politico tradicional por a logra kita e dignidad di e pueblo humilde aki y reemplasa esaki cu dependencia y cobardia. Un pueblo cu antes tabata uno culto, digno y luchado, awendia parce uno sumiso, dependiente y complaciente.

Despues cu gobierno a firma tur sorto di ‘CITGO-deal’, awor ta sali cu tin 5000 Venezolano inscribi pa haya un trabou na e ‘mehorador’ contra 700 hende local. Tin un otro deal firma, pa trece un ferry cu lo trece hopi ‘turista’ Venezolanonan tur dia pa Aruba. Y desde siman pasa, mester cambia e Centro Deportivo na Santa Cruz den un shelter y cu un ‘tentenkamp’ lo wordo estableci na Dakota pa ubica 600 ‘refugiadonan’ Venezolano. Manera nos gobierno actual tin e custumber di bende y entrega tur cos di pueblo tras di su lomba, nos kier haci’e publicamente e pregunta si e la bende Aruba caba cu Venezuela, dia e la bay Venezuela pa firma e ‘CITGO-deal’.

Partido ABO a adverti for di hopi tempo caba cu nos islanan ta wordo invadi pa Venezolanonan y cu Hulanda mester asumi su responsabilidad pa proteha nos fronteranan y isla. Aruba no por carga of importa problemanan di otro paisnan, mientras cu pa via di un politica destructivo, nos tambe casi a yega den e mesun situacion di Venezuela. Hulanda no a haci nada, nos parlamento a keda ‘sordo y mudo’, gobierno a keda firma tur sorto di protocol, deal y permiso, mientras cu ta pueblo ta esun cu ta wanta tur sorto di golpinan di un maneho descabeya y iresponsabel.

Awor diripiente siman pasa, e parlamentario Hulandes cu kier introduci un paspoort diferente pa Arubianonan, pa asina limita nan entrada na Hulanda, ta declara cu Aruba tin cu tuma ‘refugiadonan’ Venezolano, segun un protocol firma. Wel, wel, esun cu kier haci’e ainda mas dificil pa Arubianonan cu tin e mesun nacionalidad cu’ne pa establece nan mes na Hulanda, kier obliga Aruba awor pa tuma ainda mas stranhero, pero e biaha aki bou di e capa di ‘refugiadonan’. Si Hulanda mes ta para tras di e politica di cera e frontera Europeo na Turkia,Grecia y Italia, pa asina frena refugiadonan legitimo drenta Europa, anto dicon e parlamentario Hulandes aki kier exigi di un isla pober manera Aruba, tuma minimal 600 supuesto ‘refugiadonan’?

Na diferente ocasion, gobierno mes ta admiti cu no tin mas tereno of cas social aki na Aruba pa esunnan cu ta akinan caba. Anto di unda mester saca tereno y cas pa e ‘refugiadonan? By the way, e asunto di shelter temporal tambe ta un mentira. Nos tur por a corda cu despues di e terremoto di 2010 na Haiti, tambe gobierno a bin cu e mesun excuus pa laga algun hende establece nan mes temporalmente aki. Ainda nan t’ey, e cantidad a aumento y algun hasta a bira coordinador, activista y campañado politico. E model cu a wordo uza e tempo di Haiti, tabata solamente un test model. Awor gobierno ta cla pa introduci e model a la grandi. Pues e asunto di ‘refugiado’ Venezolano temporal, tambe lo bira algo permanente y structural.

Mientras nos gobernador a wordo obliga pa lesa un bunita storia na e apertura di e aña parlamentario, esun di Corsou a scoge pa sinceridad y atende e problematica di e migracion Venezolano:

‘Por a sinti e efectonan di e problemanan na nos pais bisiña. E team di monitoreo riba e tereno aki a constata, cu e entrada di hende ta casi exclusivamente den e area di delincuencia, trabou ilegal y prostitucion. Un di e recomendacionnan mas fuerte pa soluciona e problema aki ta, pa na nivel di Reino nos yega na tratadonan di extradicion entre Venezuela y Corsou ya asina por combati e simia di criminalidad entre e dos paisnan aki cu mas efectividad (discurso di S.E. gobernador George-Wout, 13 september 2016)’

A pesar cu Corsou tin mas inversion Venezolano, mas comercio di Venezuela y lasonan historico cu Venezuela via Almirante Pedro Luis Brion, e gobierno Curasoleño a scoge pa scucha su pueblo, papia e berdad, y sali na defensa di su pueblo. Pero riba e mesun dia y casi na e mesun momento, e gobierno Arubano a scoge pa show, mas politica di tuma pueblo haci y entreguismo. Oh Señor, kico e pueblo Arubano a haci e politiconan tradicional aki, cu nan por haya asina tanto rabia y menosprecio pa pueblo? Unda e orguyo, dignidad, honor y curashi di e Arubiano a bay?


(www.aboaruba.org , This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co