{idkey=821b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4237-gabinete-me-ii-reapertura-di-refineria-na-san-nicolas-ta-un-aporte-grandi-na-economia-di-pais-aruba%3FItemid%3D101][title=Gabinete+ME+II%3A+Reapertura+di+Refineria+na+San+Nicolas+ta+un+aporte+grandi+na+economia+di+Pais+Aruba][desc=Fondonan+di+tanto+AOV+y+AZV+ta+bay+haya+un+base+mucho+mas+amplio+y+sostenibel.%26amp%3Bnbsp%3BORANEJSTAD+%E2%80%93+E+impacto+di+apertura+di+refineria%2C+bou+operacion+di+CITGO%2C+ta+grandi+y+positivo+pa+pais+Aruba.+Ademas+di+e+hecho+historico%2C+cu+pa+prome+biaha+den+mas+cu+90+a%C3%B1a+e+refineria+a+bira+propiedad+di+pais+Aruba%2C+su+operacion+ta+representa+un+15%25+di+economia+di+nos+pais.+Pa+a%C3%B1a+2017+so+caba+ta+spera+un+crecemento+economico+di+5.7%25.+Un+efecto+directo+di+e+actividad+economico+aki+ta+fondonan+di+AOV+y+AZV+t]}
Fondonan di tanto AOV y AZV ta bay haya un base mucho mas amplio y sostenibel. 

ORANEJSTAD – E impacto di apertura di refineria, bou operacion di CITGO, ta grandi y positivo pa pais Aruba. Ademas di e hecho historico, cu pa prome biaha den mas cu 90 aña e refineria a bira propiedad di pais Aruba, su operacion ta representa un 15% di economia di nos pais. Pa aña 2017 so caba ta spera un crecemento economico di 5.7%. Un efecto directo di e actividad economico aki ta fondonan di AOV y AZV ta bira mucho mas fuerte.

E operacion di e refineria cu, banda di turismo, ta un otro pilar economico pa Aruba y cu ta bay produci entradanan substancial pa Aruba. Banda di esaki e tin un impacto positivo riba e situacion social y salud di nos poblacion. Den un encuentro cu prensa dialuna ultimo, Prome Minister Mike Eman a recorda cu Aruba tin un sistema di pensioen, AOV, cu ta wordo paga (carga) door di tur trahado (no pensionado) via un prima. E placa aki na momento cu e drenta ta wordo paga inmediatamente na esnan cu ta pensionado. E “vergrijzing” di Aruba (grupo di pensionado ta creciendo y grupo di trahadonan ta bahando) a pone un presion hopi grandi riba Fondo di Pensioen di nos Pais. “Pesey e hecho cu bo ta bay haya 3000 persona mas cu ta bay traha, contribui cu e primanan di AOV, ta bay fortifica mas ainda e posicion di e fondo aki y cu tur e ahustenan cu nos a haci den e reforma di e sistema ta bay consolida mas ainda e Fondo di Pensioen di SVb. Pesey tambe nos ta hopi contento cu e impacto cu e refineria ta bay tin riba e Fondo di Pensioen pa nos grandinan.”

Banda di esaki, Eman a bisa, tin e sistema di seguro AZV cu ta traha den un forma similar cu esun di AOV. Tur ciudadano na Aruba tin acceso na Salud Publico, uzando nan carchi, via di e sistema di seguro moderno cu a introduci na 2001. Pero tambe ta un realidad cu estadisticanan ta mustra cu mas grandi un hende bira, mas uzo e ta haci di cuido medico. Esaki ta nifica cu tin un relacion entre e cantidad di hendenan cu ta traha y cu ta contribui via di primanan of BAZV pa percura cu tin suficiente den e fondo versus esnan cu ta haci uzo di e cuido medico di AZV. Awor cu tin mas o menos 3 mil persona adicional, den edad relativamente hoben y den bon estado di salud cu no ta bay haci mes tanto uzo di AZV cu nan ta contribui cu ne, lo yuda na consolida e fondo di AZV. “Esaki ta otro contribucion importante.” E mandatario a agrega cu tin tambe e contribucion di Loonbelasting. Tur tres e fuentenan di belasting (incluyendo Winstbelasting y e primanan) ta wordo calcula na un  entrada adicional di 90 miyon florin pa aña, pa Gobierno. “Esaki ta un contribucion substancial di e refineria pa Aruba.”

Ademas di e puntonan ariba menciona, reactivacion di e refineria na Aruba ta trece cu ne varios contribucion adicional na nos economia. CITGO, segun acuerdo cera cu gobierno di Aruba, ta paga un lease di $10 Miyon dollar annualmente su prome tres añanan na Aruba. Despues di e periodo aki, e lease cu CITGO ta paga ta subi na 18.5 Miyon dollar. CITGO a acorda cu gobierno tambe cu e ta paga un ‘profit tax’ tur aña di 10 Miyon dollar, cu nan haci ganashi of no. Si nan haci ganashi, e ‘profit tax’ tambe ta bira mas.

Asina por mira cu Aruba su economia, cu ta basta aña a keda carga pa un solo pilar economico, turismo, awo ta haya un pilar adicional pa por amplia su economia di un manera mucho mas efectivo y sostenibel. Cu reactivacion di e compleho petrolero na San Nicolas, riba Aruba ta crea un calidad halto di empleo cu ta trece tambe mucho mas perspectiva pa hobennan studiando den exterior of cu ta cla pa drenta sector laboral.

Expresionnan haci den e articulo aki no necesariamente ta refleha opinion di ArenaPoliti.co