{idkey=9925b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4283-benny-nisbet-ppa-e-conturanan-di-un-masterplan-pa-lucha-contra-criminalidad-y-ilegalidad%3FItemid%3D101][title=Benny+Nisbet+%28PPA%29%3A+%E2%80%98E+conturanan+di+un+masterplan%E2%80%99+pa+lucha+contra+criminalidad+y+ilegalidad+%21%21%E2%80%99][desc=Pueblo+di+Aruba+ta+hopi+preucupa+pa+e+aumento+drastico+di+%26amp%3Bnbsp%3Bcrimen+y+ilegalida+%21+PPA+ta+comparti+esaki+junto+cu+nos+pueblo.+Criminalidad+a+jega+un+nivel+intolerabel+na+Aruba+y+esaki+ta+affectando+nos+sistema+di+bida%2C+nos+tranquilidad+y+nos+seguridad.+%26amp%3Bnbsp%3BE+criminalidad+actual+por+causa+danjo+ireparabel+na+nos+turismo+y+economia+en+general.+Y+e+ta+affecta+e+tranquilidad+den+nos+pueblo.+%26amp%3Bnbsp%3BE+cantidad+di+crimen+den+ladronicia+etc+ta+%26amp%3Bnbsp%3Bcrea+e+impression+den+pueblo+di+ta+%E2%80%98dramatico%E2%80%99.]}
Pueblo di Aruba ta hopi preucupa pa e aumento drastico di  crimen y ilegalida ! PPA ta comparti esaki junto cu nos pueblo. Criminalidad a jega un nivel intolerabel na Aruba y esaki ta affectando nos sistema di bida, nos tranquilidad y nos seguridad.  E criminalidad actual por causa danjo ireparabel na nos turismo y economia en general. Y e ta affecta e tranquilidad den nos pueblo.  E cantidad di crimen den ladronicia etc ta  crea e impression den pueblo di ta ‘dramatico’.  Esaki segun  pueblo ta mara na e gran cantidad di illegal cu ta logra drenta nos isla y  di cual hopi ta traha illegal y otro ta hiba e bida di criminal  pa nan por sobrevivi. Na mes momento den nos sociedad ta un realidad cu tin un aumento di criminalidad bao di localnan/hobennan cual ta un fenomeno alarmante. Pueblo ta cuestiona maneho di Ministerio di Justicia riba e tereno aki y pueblo ta desea un maneho hopi mas coordina y fuerte pa minimalisa  criminalidad riba nos isla. Na  mes momento pueblo ta cuestiona un maneho financiero cu no ta inverti suficiente den e Ministerio di Justica pa lucha contra di criminalidad. Pueblo ta desea un garantia cual ta trece esaki bek na un margen acceptable pa nos sociedad y nos bishitantenan por sinti nos mes ‘sigur’ atrobe !! Na mes momento como sociedad nos mester analisa nos maneho di ensenansa y maneho social cu ta worde hiba y e aspecto preventivo. 

Conturanan di un Masterplan (cu contribuiccion di Pueblo !)

PPA ta presenta e articulo aki den un esfuerzo pa presenta  e  ‘conturanan di un masterplan’ pa lucha contra criminalidad y ilegalidad. Nos ta usa e palabra ‘conturanan di un Masterplan’ pasobra PPA ta di opinion cu cualkier masterplan final cu un gobierno serio dentro di e situacion di crisis bai ejecuta …mester ta un masterplan unda sociedad y instancianan ta ricibi amplio oportunidad pa contribui seriamente na esaki.   Tambe  e proceso cu ta  wordo hiba ora ta permiti  esnan di exterior pa  drenta nos isla  den forma  legal ……y e control cu ta ser hiba pa un bishitante bandona nos  isla ora su termino jega ….mester ricibi mucho mas atencion .

PPA kier senjala cu ultimo decada diferente gobierno a desmantela e structura cu Aruba a conoce den e autoridad cu ta encarga pa lucha contra di  criminalidad y ilegalidad. A desmantela e structura y a crea varios  departamento y structura nobo cu kada uno tin su tarea. E pregunta di PPA ta si tin un cooperacion estrecho entre e departamentonan aki pa por comparti informacion……y si tin….Kiko ta worde hasi cu e informacion aki ? PPA ta mira como necesario  un analisis con e structura nobo a funciona despues ?

PPA kier senjala e pregunta: Con nos Cuerpo di Polis ta funcionando ? Aki tambe tabatatin cambionan…..e pregunta ta ….con ta funcionando awor ?? Si e cooperacion interno ta na su lugar ?  Cu cuanto personal segun planificacion nos Cuerpo di Polis lo mester tin ??  Y cuanto realmente tin ?   E structura di Cuerpo di Polis a worde cambia den cuatro seccion  cu kada uno un Comisario di Polis ta encabeza…..Kiko ta e experiencia cu e cambio aki ??  Y un pregunta importante ta cuanto  personal ta cai bao di kada sector ?? Cuanto personal ta na warda durante dia ?? Y Cuanto Personal/patrouille ta  na warda den oranan di anochi ?   Tin suficiente  personal pa garantisa  ‘rijdend toezicht’ unda informacion ta indica cu ta necesario ? Aki PPA no kier indica cu algo ta robez  pero si  PPA kier indica cu despues di kada cambio di structura….lo mester tin un evaluacion critico con esaki ta funcionando kizas kada 5 anja.  Y pa esey lo mester tuma lugar un estudio critico door di expertonan ‘independiente’  ??

MANEHO Y CONTROL RIBA ADMISSION DI ESTRANHERO !

No kabe duda cu un parti di e criminalidad cu nos sociedad ta experienciando  especial  ta importa. Pa por hiba un maneho exitoso contra criminalidad ta necesario cu esaki ta bai ‘man den man’ cu un maneho estricto y transparente riba admission di estranhero ejecuta pa IASA/immigracion. Esaki sin cu mester stigmatisa ningun nacionalidad. Segun nos humilde opinion falta un maneho ‘ainda mas’ transparente riba admission,  No por papia di ‘mal maneho’ riba e tereno di admission pero si por cuestiona e ‘control’ di salida  y esaki  mester a ricibi  mas atencion.  PPA ta kere den un maneho cu ta ensera un  ‘databank ’ cu tin den djele kada persona cu a drenta Aruba y  cual ‘databank’ mester duna un senjal ora cu un persona  su dianan ta den termina. Mester mejora e sistema cu ta   tuma contacto cu e famia/persona unda e ta kedando  y  si e ta turista  cu ta keda na hotel….e hotel tin di informa  e departamento na momento cu un turista bandona su hotel mas trempan cu e lo mester a keda.  Periodicamente (p.e) kada dos luna mester  analisa e situacion real y presenta un rapport di cuanto persona por ta riba nos isla cu nan periodo a pasa y no a rapporta na e compania di aviacion pa nan bandona nos isla.  Tin suficiente personal pa ejerce e tarea esta pa bai rondia e personanan  aki ?   Kiko ta e maneho  di  Justicia  pa  e instancia cu a emplea  ilegalnan riba nos isla ?

CONTROLE DI PUEBLO:

PPA kier senjala cu Aruba tin un cantidad basta grandi  di x polis, x douanero, x otro funcionario cu ta cu pensioen y cu por ejerce cierto trabao ainda !! Sin kita for cu otro ciudadano tambe por tin un contribuiccion grandi den esaki ! PPA ta mira nan  como  un potencial grandi pa hasi uso di e ciudadanonan aki pa crea fuente  di informacion structura y cu un margen grandi di credibilidad ….den kiko ta baiendo robez den cierto districto/bario di nos isla. E ciudadanonan aki cu nan experiencia por ta un tremendo ‘asset’ den informacion na instancia official. No kabe duda cu tin algun lo ta duna nan cooperacion y saber na autoridad kaba ....pero esaki no ta structura y por funciona hopi mas miho si dedica atencion na e aspecto importante aki.

SITUACION NA KIA !!

PPA ta di opinion cu mester dedica amplio atencion na e situacion na K.I.A. !  Na prome lugar pa e prision cumpli cu e structura den cual respet pa derechonan humano  y pa duna esnan cu cai sera un programa pa nan pasa nan periodo sera y prepara nan  mes pa ora nan regresa den nos sociedad nan realmente hasi un esfuerzo pa evita un regreso na crimen atrobe… Esaki conforme e meta di K.I.A. esta un Instituto di Correccion !!  PPA ta ripiti un ponencia cu nos a hasi den pasado kaba. Esey ta hasi un analisis si lo no ta miho pa construi  un edificio/prison nobo otro sitio. A resulta claramente cu e ‘saltpeper’ ta affecta e actual prison dimas y ta keda stroba pa K.I.A. por funciona debidamente durante un periodo responsabel.

Personal di Seguridad ?

Den e cuadra di e problematica di  criminalidad……PPA kier kibra un lanza tocante e personal di seguridad cu e.p. ta worde emplea pa companianan di seguridad y ta staciona diariamente rond di Aruba pa controla y senjala ora algo ta robez. PPA ta puntra  si no a jega e momento pa  stipula  un poco mas criteria pa esnan cu ta ofrece e servicio aki ? Si no a jega e momento pa personanan cu ta ofrece e servicio aki lo mester cumpli cu un poco mas preparacion pa ora nan worde emplea pa duna e servicio aki ? Na mes momento pa observa e derecho di nan como trahador.

No kabe duda cu e  sector cu ta cai grandemente bao di Ministerio di Justicia lo mester ricibi mas atencion di parti gobierno di Aruba. Inversion den Ministerio di Justicia no mester worde hunga cune. Nos sociedad no por permiti esaki mas. Na mes momento inversion di Ministerio di Ensenansa ta sumamente importante …..control riba e jovennan cu mester bai scol ta un  y tambe e maneho social di gobierno esta un maneho preventivo ta keda un ‘condition sino qua non’.

PPA su programa cu nos a bai eleccion cunele ultimo decada  ta duna mucho mas idea cu nos a menciona den e  articulo aki  pero PPA manera nos a  menciona ta  e ‘conturanan di un Masterplan’ na unda henter nos sociedad ta bonbini pa duna un contribuiccion serio.

No kabe duda cu tur departamento cu ta despleha un rol dentro di e maneho pa minimalisa criminalidad y evita illegalidad lo mester ricibi e atencion debido pa projecta nan rol dentro di  e ‘conturanan di un masterplan’. Como ‘food for thought’ dentro di e problematica serio di un aumento di criminalidad inacceptable pa nos sociedad PPA ta larga contenido di nos articulo pa nos sociedad analisa y evalua.  


Aruba, 11 oktober 2016                               Lider Politico di PPA

                                                                        BENNY NISBET

Expresionnan haci den e articulo aki no necesariamente ta refleha opinion di ArenaPoliti.co