{idkey=1162b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4284-evelyn-wever-croes-mep-ban-caba-cu-abuso-sexual-awor%3FItemid%3D101][title=Evelyn+Wever-Croes+%28MEP%29%3A+Ban+caba+cu+abuso+sexual+awor][desc=Lider+di+MEP+sra+Evelyn+Wever-Croes+a+reacciona+riba+e+noticia+cu+a+shock+henter+comunidad+di+e+homber+cu+a+abusa+sexualmente+di+un+mucha%2C+cual+ta+un+tema+cu+ta+causando+bastante+dolor+den+nos+comunidad.+%E2%80%9CMi+ta+puntra+mi+mes+cuanto+mucha+nos+por+a+scapa+si+e+ley+cu+MEP+a+traha+a+drenta+na+vigor+6+a%C3%B1a+pasa.+Cada+mucha+cu+wordo+viola+ta+un+di+mas.+Cada+mucha+ta+wak+na+nos+como+adulto+pa+nos+proteh%E2%80%99e+y+defend%E2%80%99e+nan.+Pa+nos+percura+pa+nan+no+pasa+dolor+y+abuso.+Y+nos+tur+como+adulto+mester+si]}
Lider di MEP sra Evelyn Wever-Croes a reacciona riba e noticia cu a shock henter comunidad di e homber cu a abusa sexualmente di un mucha, cual ta un tema cu ta causando bastante dolor den nos comunidad.
“Mi ta puntra mi mes cuanto mucha nos por a scapa si e ley cu MEP a traha a drenta na vigor 6 aña pasa. Cada mucha cu wordo viola ta un di mas. Cada mucha ta wak na nos como adulto pa nos proteh’e y defend’e nan. Pa nos percura pa nan no pasa dolor y abuso. Y nos tur como adulto mester sinti berguensa ora un mucha wordo viola. Y nos mester sinti rabia cu nos a permiti esaki pasa” sra Wever-Croes ta bisa.

Na aña 2010 un mama balente a bin Parlamento y a pidi pa cambia e leynan y bin cu castigonan mas severo. Partido MEP a scucha e mama aki y mesora nos a actua. Dia 21 di april di aña 2010 mas di 6 aña pasa, Fraccion di MEP, e tempo ey consistiendo di sr Eddy Briesen, sra Marisol Lopez-Tromp, sra Xiomara Ruiz-Maduro, sr Booshi Wever, sra Mervin Wyatt Ras y mi persona, a entrega un ley di iniciativa cu tabatin dos meta
(1) Bin cu castigo minimo den caso di abuso sexual, y
(2) Amplia e periodo cu un hecho asina ta caduca (verjaringstermijn) 

VERJARINGSTERMIJN 
E motibo pa amplia e “verjaringstermijn” ta pasobra un mucha hopi biaha no ta bisa nada na su mayornan cu nan a wordo viola of e mayornan ta tapa e hecho aki. Y hopi biaha ta te ora e mucha bira adulto, e ta haya e curashi pa bay denuncia e hecho pero e ora ya e hecho a caduca. Pesey mester haci e periodo aki mas largo.

CASTIGO MINIMO
E motibo pa bin cu castigo minimo ta pasobra nos sa cu castigo maximo no ta suficiente . Nos sa cu nos mester yuda nos huesnan cu castigonan mas severo. Pasobra nan so no por bin cu castigonan severo. E motibo cu no ta yega castigo halto ta pasobra no tin prueba cu ta wordo bon acumula. E castigo maximo di 16 aña nunca a wordo impone, maximo cu un hues a yega di pone ta 5 aña!

PROBLEMA TA PA CUMULA PRUEBA
Sra Evelyn Wever-Croes ta splica cu e proceso entre e momento cu un victima bay denuncia un hecho di abuso y e momento cu husticia haya prueba, no ta cana bon den tur caso.
“Esaki a pasa aña pasa cu e mesun persona envolvi den e caso di violacion di dialuna anochi cu a shock henter nos comunidad. E persona aki aña pasa caba lo a wordo gara den algo asina. Pero a wordo laga den libertad pa falta di prueba. Y e persona aki a sigui desgracia bida di mucha.

Nos sistema di acumula prueba no ta yuda nos pa e malechornan aki haya castigo maximo, y nos mester yuda nos huesnan cu castigonan minimo pa asina por lo menos tur abusador sexual sa di adelanta cu si nan mishi cu mucha, nan tin un cantidad di aña minimo cu nan ta keda cera. Y mientras nan ta cumpliendo cu nan castigo, por traha cu nan y duna nan e yudansa y atencion profesional cu nan tin mester.

TRAYECTORIA DI E LEY
“E ley aki cu MEP a entrega na april di 2010 ainda no a haya oido. Nos a mande pa Raad van Advies y Raad van Advies a manda nos su contesta na juli di 2010. Y a duna algun sugerencia pa cambio cual a wordo haci tambe di biaha. Pero Raad van Advies a bisa cu nan no por haci loke nan ta yama e "rechtmatigheid of doelmatigheid toets" pa motibo cu MEP no a pone den e ley kico Gobierno di AVP kier y ta para pe. Y sin esaki Raad van Advies no por control’e. Y aki ta caminda cu tur cos a keda pega”.

“Na september 2010 nos a manda un carta pa Prome Minister Mike Eman unda nos a pidie pa e informa nos kico Gobierno ta para pe. Pero nunca nos a haya un contesta. Despues nos a acerca Minister di Husticia y tambe Minister Michelle Hooiboer pa duna nos e informacion di locual Gobierno ta para pe pa asina nos por finalisa e ley.
Pero lamentablemente despues di seis aña, ainda Gobierno no a reacciona pa haci posibel pa e ley aki pasa. Y tanten cu Gobierno no reacciona, nos no por traha e nader verslag y e ley no por sigui cana su caminda.
Na mas di un ocacion, Gobierno di AVP a mustra cu e no tin interes pa atende cu e tema aki. Esaki ta yena mi cu un indignacion y un frustracion enorme cu Parlamento ta wordo stroba den su trabou djis pasobra 12 Parlamentario di AVP no kier duna nan cooperacion.

Pesey, awor cu Gobierno no kier tuma accion, Parlamento ta wordo stroba pa 12 Parlamentario pa tuma accion, awor ta pueblo so por papia. Ban lanta nos tur hunto y demostra cu esaki no por. Ta basta cu abuso sexual di mucha. Aruba mester demostra cu nos mester stima nos muchanan y proteha y defende nan di abusadornan sexual. Y tur abusador di nos muchanan mester bay cera pa hopi tempo”, sra Evelyn Wever-Croes ta termina bisando.

Expresionnan haci den e articulo aki no necesariamente ta refleha opinion di ArenaPoliti.co