{idkey=9220b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4607-setty-christiaans-yarzagaray-mep-pa-parti-prosperidad-mester-midi-prome-si-enberdad-aruba-a-prospera%3FItemid%3D101][title=Setty+Christiaans-Yarzagaray+%28MEP%29%3A+Pa+parti+prosperidad+mester+midi+prome+si+enberdad+Aruba+a+prospera][desc=Den+temporada+di+Pasco+y+fin+di+a%C3%B1a+semper+ta+un+bunita+epoca+di+a%C3%B1a+pa+ricibi+regalo.+Di+otro+banda+nos+mester+paga+tino+ora+cu+no+tur+cos+cu+ta+mustra+di+ta+%E2%80%9Cregalo%E2%80%9D+ta+realmente+%E2%80%9Cregalo%E2%80%9D%21+Recien+por+a+tuma+nota+di+un+macuto+cu+a+wordo+presenta+door+di+e+gobierno+actual+di+Mike+Eman+cu+e+nomber+%E2%80%9CProsperidad+Comparti%E2%80%9D%2C+na+unda+cu+casi+mescos+cu+prome+cu+e+eleccion+anterior%2C+atrobe+a+presenta+su+macuto+di+campa%C3%B1a+p%E2%80%99asina+nan+cuminsa+acerca+pueblo.+Sinembargo%2C+nos+ta+puntra+nos+m]}
Den temporada di Pasco y fin di aña semper ta un bunita epoca di aña pa ricibi regalo. Di otro banda nos mester paga tino ora cu no tur cos cu ta mustra di ta “regalo” ta realmente “regalo”! Recien por a tuma nota di un macuto cu a wordo presenta door di e gobierno actual di Mike Eman cu e nomber “Prosperidad Comparti”, na unda cu casi mescos cu prome cu e eleccion anterior, atrobe a presenta su macuto di campaña p’asina nan cuminsa acerca pueblo. Sinembargo, nos ta puntra nos mes, cuanto articulo di e macuto cu nan a ofrece na aña 2012/2013 nan a cumpli cun’e y cu pueblo?

Ta na su lugar, sigur pa un hende cu por pensa, busca informacion y analisa, pa cuestiona si enberdad Aruba a experencia prosperidad. Segun cu por a tuma nota di informacionnan publica pa Banco Central (State of the Economy 2016) recientemente, ta indica cu por lo menos ora di analisa economia di Aruba segun su GDP, cu na aña 2013 Aruba a experencia un subida di GDP di 4.2% pero pa e ultimo 3 añanan sigur practicamente no tin crecemento economico, alcontrario! Por tuma nota cu na aña 2015 hasta baha GDP a baha cu 0.5% y ya caba Banco Central a downgrade su pronostico di GDP di 2016 cu 1.6%, pues cu ta indica cu practicamente na 2016 tampoco Aruba lo NO experencia crecemento economico atrobe. E ora nos mester puntra nos mes, ta di cua prosperidad Prome Minister a papia di dje?

Si pueblo duna nos di MEP un oportunidad, nos si lo traha na bo bienestar y sigur pa prosperidad di pueblo. Dicon nos por bisa esaki? Prome, pasobra esaki ta nos compromiso cu pueblo pero tambe pasobra MEP a haci esaki caba den pasado. Acaso AVP no a priminti den campaña 2013 di drecha calidad di bida y poder di compra di e pueblo? Y sorry, ami si NO ta considera mas klinker y caminda (infrastructura) un mehoracion di mi calidad di bida! Laga nos tuma un di obhetonan di e macuto cu Prome Minister a menciona, manera salario minimo como ehempel, y ban analisa esaki su desaroyo durante tempo.  

Por tuma nota cu desde aña 2001 salario minimo tawata 1,111.75 florin y na 2009 esaki tawata 1,542.90 florin cu ta mustra cu den 8 aña salario a subi cu 431.15 florin y a experencia subida casi tur aña!
Mientras tanto si compara e salario minimo di 2016 cu 2009, por wak cu salario minimo a subi cu 134.70 florin so! En todo caso, nos ta sigur cu pueblo tambe por a sinti e diferencia aki mirando cu costo di bida si a subi durante añanan, cu si compara cu loke un hende of un famia mester pa biba, cu esaki ya no ta suficiente. Sin wak cuanto otro cos mester paga awe manera pikimento di sushi, parking, mas schoolgeld, 2% na BAZV, remedi cu no ta wordo cubri door di AZV pa menciona algun.

Un gobierno ta wordo scogi pa traha pa pueblo, pues pueblo lo mester sa di distingui ora por sinti cu gobierno ta haci como sifuera cu mester ta contento pasobra ta haya “regalo” of pueblo mester sinti su mes mas contento ora y si enberdad e gobierno cu el a scoge p’e den eleccion (of no), ta haci su trabou!

Pues nos ta puntra nos mes, un gobierno manera AVP cu a priminti semper di ta trahando na bienestar di pueblo, su calidad di bida y cu tin e ser humano central, lo no mester a cuminsa na salario minimo y drecha enberdad e poder di compra? Ta 7 aña e tin ta goberna y ta cu solamente 134.70 florin so e por a subi salario minimo? Dicon awor atrobe e ta priminti na pueblo cosnan cu e sa cu e no a cumpli y a hinca esaki awor den un macuto di Pasco na vispera di un aña di eleccion y ta cla pa hunga un rol di Santa Claus manera cu ta regalo e ta bay parti.

Expresionnan haci den e articulo aki no necesariamente ta refleha opinion di ArenaPoliti.co