{idkey=4065b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4833-benny-nisbet-ppa-con-mep-por-a-vota-pro-acuerdo-citgo-pa-awe-mep-ta-cuestiona-contenido-di-e-acuerdo%3FItemid%3D101][title=Benny+Nisbet+%28PPA%29%3A+%E2%80%98Con+MEP+por+a+vota+PRO+%E2%80%98acuerdo+CITGO%E2%80%99+pa+awe+MEP+ta+cuestiona+contenido+di+e+acuerdo%3F%E2%80%99][desc=Cu+atencion+PPA+a+tuma+nota+di+declaracion+di+miembro+di+parlamento+pa+MEP+mr.+Addy+Thijsen+cu+a+cuestiona+e+hecho+cu+miembro+di+2de+kamer+hulandes+aparentemente+a+hanja+un+rapport+di+gobierno+di+Aruba+encuanto+di+Citgo%2FPdvsa+y+e+futuro+%26amp%3Bnbsp%3Bupgrader+cu+parlamento+di+Aruba+no+a+ricibi.+El+a+accentua+cu+Prome+Ministro+di+Aruba+mr.+Mike+Eman+lo+a+bisa+Hulanda+cu+e+NO+ta+desea+pa+miembro+di+parlamento+y+otro+ricibi+copia+di+e+rapport+aki+%21%21+Tambe+mr.+Addy+Thijsen+ta+accentua+cu+lo+por+tin+cos+den+]}
Cu atencion PPA a tuma nota di declaracion di miembro di parlamento pa MEP mr. Addy Thijsen cu a cuestiona e hecho cu miembro di 2de kamer hulandes aparentemente a hanja un rapport di gobierno di Aruba encuanto di Citgo/Pdvsa y e futuro  upgrader cu parlamento di Aruba no a ricibi. El a accentua cu Prome Ministro di Aruba mr. Mike Eman lo a bisa Hulanda cu e NO ta desea pa miembro di parlamento y otro ricibi copia di e rapport aki !! Tambe mr. Addy Thijsen ta accentua cu lo por tin cos den e rapport aki cu nan di MEP no ta consciente di djele. 

Pregunta di  PPA ta …cu si MEP ta di opinion cu lo por tin informacion cu a keda scondi pa MEP como oposicion den parlamento anto con bin MEP a vota PRO a acuerdo cu gobierno a negosha cu CITGO/PDVSA  anto ?? Pasobra votando PRO  MEP a bai para banda di gobierno di AVP y fraccion di AVP pa loke ta trata e acuerdo no pa habri e refineria  pero pa  ‘transforma e fascilidad’ na San Nicolas den un Upgrader cu tur consecuencia y risico cu ta bin junto cu esaki. 

PPA tabata e unico organisacion politico cu di pafor di parlamento a cuestiona gab Mike Eman su maneho den esaki profundamente. Tambe PPA a accentua cu si un oposicion den parlamento pretende cu ta nan a logra e proceso cu lo conduci pa un re-apertura cu despues officialmente a worde jama un ‘transformacion den un Upgrader’ esaki ta hasi e oposicion mas ‘zwak’ pasobra gobernacion tabata sa cu con nan maltrata oposicion den e proceso aki  MEP entodo caso lo a vota ‘pro’ tog. Pa awor MEP ta cuestiona cu gab Mike Eman lo por tin cos scondi…..PPA ta hanja un posicion NO  consecuente y coherente, pasobra MEP votando PRO a ‘acuerdo’ a tuma e responsabilidad completo junto cu AVP. PPA ta ripiti  MEP y tambe e x partido/fraccion di Dem Real  a bai para banda di AVP den e caso aki y como tal ta completamente y directamente responsabel pa e chaos cu e acuerdo aki lo por crea durante e 15 y kizas 25 anja nos dilanti.

PPA lo keda cuestiona e acuerdo aki pasobra Aruba ta core un risico financiero enorme a consecuencia di su garantia cu indirectamente ta worde duna y Aruba lo core un risico enorme riba tereno di ‘salud publico…y medio ambiente, mientras gran majoria trabao cu lo ta pa ‘contratista y nan trahador’ NO a worde proteja pa trahador local. E terminologia usa ta indica claramente cu solamente ora ta trata tuma trahador den servicio pa e empresa CITGO Aruba NV tin un proteccion pa trahador local na 80 % versus 20 %. Pero ora ta trata ‘contratista y nan trahador’ ta worde menciona claramente cu CITGO y/of esnan cu a gana e ‘contract major’  lo ta  liber den kende nan  tuma pa ejerce un parti di e tarea y kwa trahador nan ta usa….y esaki ‘completamente liber’ esta ‘to their total discretion’   Y esaki MEP y  x- Dem Real sa debidamente  pero ta sconde e realidad aki pa pueblo !!!

No kabe duda cu e contract sera cu Citgo/Pdvsa lo crea cierto movicion economico pero junto cu esaki lo bin cierto consecuencia  riba tereno di medio ambiente y salud publico  cu na opinion di PPA nos pueblo no a worde prepara pele. A cologa dilanti pueblo cu lo tin hopi trabao den futuro cercano….pero no a splica pueblo cu hopi di e cupo di trabao aki lo ta pa trahador di exterior mientras e sociedad di Aruba ta paga un prijs caro  pa nos medio ambiente y salud publico y esaki  kere PPA ta  hopi ‘suavemente bisa’.

Concluyendo PPA for di pafor di parlamento lo tene gab Mike Eman/de Meza alias the Mess(AVP)  y  e 20 miembro di parlamento di AVP/MEP y x Dem Real  cu a vota pa un acuerdo sin sa e contenido  completo di esaki directamente responsabel. PPA ta tene e partido P.O.R. tambe directamente responsabel como cu sr. Otmar Oduber tabata ministro di gab. Eman cu a negosha un contract hopi debil y cuestionabel y sr. Andin Bikker (x Dem Real) tambe a vota ‘pro’ e acuerdo hopi cuestionabel aki.


Aruba, 6 di Januari 2017.
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co