{idkey=853b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F537-evelyn-wever-croes-den-discurso-na-boneiro-lucha-pa-autonomia-ta-importante-pero-mas-importante-ta-pa-conserv-e%3FItemid%3D101][title=Evelyn+Wever-Croes+den+discurso+na+Boneiro%3A+Lucha+pa+autonomia+ta+importante%2C+pero+mas+importante+ta+pa+conserv%E2%80%99e][desc=Lider+di+MEP+Evelyn+Wever-Croes+tabata+orador+invita+na+un+cena+organisa+pa+Partido+Democratico+Boneirano+%28PDB%29+den+fin+di+siman+ultimo.+Manera+ta+conoce+PDB+y+MEP+tin+lasonan+di+hopi+anja%2C+y+a+lucha+hunto+na+varios+momento+crucial+den+historia+di+nos+paisnan.+Lidernan+Betico+Croes+%28dfm%29%2C+Nel+Oduber+y+awor+Evelyn+Wever-Croes+di+Aruba+y+Jopie+Abraham+cu+Robby+Beukeboom+na+Boneiro+a+demostra+esaki.+Evelyn+Wever-Croes+a+duna+un+discurso+tocante+Boneiro+su+futuro+estatal+den+relacion+cu+paisnan+den]}
Lider di MEP Evelyn Wever-Croes tabata orador invita na un cena organisa pa Partido Democratico Boneirano (PDB) den fin di siman ultimo. Manera ta conoce PDB y MEP tin lasonan di hopi anja, y a lucha hunto na varios momento crucial den historia di nos paisnan. Lidernan Betico Croes (dfm), Nel Oduber y awor Evelyn Wever-Croes di Aruba y Jopie Abraham cu Robby Beukeboom na Boneiro a demostra esaki.

Evelyn Wever-Croes a duna un discurso tocante Boneiro su futuro estatal den relacion cu paisnan den Reino. Lider di MEP a elabora prome riba e historia di e lucha di Status Aparte na Aruba, tanto den e Antiya Hulandes e tempo ey, pero tambe internacionalmente, entre otro cu Socialista Internacional, COPPPAL y finalmente Comision di Decolonisacion na Nacionnan Uni. Den e lucha aki mester subraya cu Aruba nunca a bringa pa su so, Betico Croes semper a bringa pa duna demas islanan den Antiya manera Boneiro, mas autonomia. Ora Antiya Hulandes a encamina e caminda pa un Antiya independiente, Aruba tabata sa cu e mester a bula afo prome cu esey pasa, pa cumpli cu e deseo di e pueblo di Aruba.

Evelyn Wever-Croes den su discurso a para keto tambe na ki lesnan Aruba por saca di e experiencia den e 30 anjanan DESPUES cu Aruba a haya su Status Aparte mirando e peliger cu awe Aruba ta coriendo di perde su autonomia, sin cu e pueblo a wordo consulta, y mas peor, sin cu e pueblo tabata sa. Aruba a conoce un desaroyo economico rapido, cu a forsa pa crea cupo di empleo, y importa forsa laboral; despues mester a frena esaki cu un maneho firme cu aspectonan inhumano cu te hasta a afecta e relacion entre famianan na Aruba y Boneiro. Pero locual a hasi Aruba mas danjo, y awe a pone su autonomia na peliger, ta e politica a base di manipulacion. Politiconan cu ta wordo escohi bou promesanan falso y bunita, cu campanja miyonario, cu ta enfoca mas riba fiestamento cu riba e dolornan real den nos comunidad, cu ta regala grandi y chikito cos pa gana nan voto, pero sirbiendo otro proposito y asina a causa bancarota di nos pais, y pone e Status Aparte di Aruba na peliger.

“E prome cos cu bo mester percura p’e, como pais autonomo ta pa bo tin bo asuntonan na orden, pa asina ningun hende tin nada di bisabo. Bo tin cu atende cu bo asuntonan financiero. Bo no por laga esaki sali for di man, pasobra si abo mes no por tene orden financiero, otro ta drenta y hasi’e pa bo. E otro aki por ta institutonan internacional, manera IMF cu por bin pone exigencia, of e por ta Hulanda, pasobra con cu bai bin, e ‘waarborg functie’ den Statuut ta locual Hulanda por usa pa bin mete den nos asuntonan. Nos di partido MEP a mira esaki ta bin y nos a purba alerta nos pueblo. Nos a prepara un nota “Feestvierend ten ondergaan”, pa concientisa nos pais di e problemanan financiero serio cu e gobierno tabata hinca nos aden. Durante campanja electoral tambe nos a alerta nos pueblo di e Mega-Debe. Nos oponentenan a demostra e tempo ey un biaha mas con oportunista nan ta, y manipulando e berdad a enganja nos pueblo cu nan a hasi un “bon trabou”. Awe nos a haya rason, awe henter pueblo di Aruba a realisa cu e “bon trabou” a condusi na bancarota di nos pais y perdida di nos autonomia financiero.

Y na Aruba, ta duel mi di bisa, cu e propio gobierno actual, a pone nos Status Aparte na peliger. Nan a entrega nos autonomia financiero poco poco na Hulanda, y na juli di anja pasa Hulanda a bin cobra e promesanan. Y mi ta sigur cu boso tambe a sigi e noticia na Aruba, en bes cu e prome minister di nos pais a subi KLM bai Hulanda y debati cu e hulandesnan, el’a scohe pa bai den un welga di hamber. Ami tabata esun cu a subi KLM bai Hulanda pa debati cu e hulandesnan y pidi nan pa pasa man na nan curason, pa no castiga nos pueblo cu tanto medida. Ta e ora numa ami y henter pueblo a haya sa cu e gobierno actual a regala nos autonomia financiero na Hulanda, SIN nada a cambio. Nos di MEP a compromete caba pa lucha pa gana nos autonomia bek, door di mustra cu nos si sa con pa goberna na forma responsabel. Aruba tabata e orguyo den Reino, awe nos ta carga berguensa den Reino, tur esaki danki na un partido politico cu nunca a aprecia e lucha, y cu a regala nos autonomia, SIN consulta cu e pueblo. 

E mensahe cu mi kier laga cerca bosonan, ta cu e lucha pa realisa e anhelo di bo pueblo, ta un lucha pisa y fuerte. Pero NO neglisha e trayectoria despues: con pa conserv’e. Eynan nos a faya na Aruba, debi cu a eligi partidonan cu a manipula cu mente di pueblo, financia cu hopi placa di procedencia dudoso. Y ami no kier mira e pueblo di Boneiro pasa den e dolor, e humiyacion asina”. Na final lider di MEP a alerta esnan presente pa e tipo di politica manipulativo asina, cu ta presente na Boneiro tambe “Ta boso responsabilidad pa alerta e pueblo di Boneiro pa no pasa den locual nos na Aruba ta pasando. Pueblo di Boneiro no merece di wordo manipula, e pueblo di Boneiro merece mihor, mucho mihor”.

Expresionnan haci den e articulo aki no necesariamente ta refleha opinion di ArenaPoliti.co