{idkey=3921b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F817-maisa-faro-pdr-ensenansa-ta-parti-di-nos-derecho-como-humano%3FItemid%3D101][title=Maisa+Faro+%28PDR%29%3A+Ense%C3%B1ansa+ta+parti+di+nos+derecho+como+Humano][desc=Den+e+ultimo+lunanan%2C+Aruba+ta+hayando+su+mes+confronta+cu+tur+tipo+di+problematica+den+diferente+area+gubernamental.+Nos+tin+problema+den+finanzas+publico%2C+utilidad%2C+labor%2C+salubridad%2C+ense%C3%B1ansa+y+hopi+mas.+Uno+di+esnan+cu+ta+pisa+y+cu+ta+sorprende+nos+comunidad+ta+e+asunto+di+Ense%C3%B1ansa.+Pa+studia+na+Aruba+mester+ta+nos+derecho+y+no+algo+di+luho+pa+esnan+cu+por+paga+p%E2%80%99e.+No+por+ta+asina+cu+nos+mester+roga+pa+educacion.+Ta+nos+derecho+humano+y+ningun+gobierno+ni+organizacion+mag+di+enterveni]}
Den e ultimo lunanan, Aruba ta hayando su mes confronta cu tur tipo di problematica den diferente area gubernamental. Nos tin problema den finanzas publico, utilidad, labor, salubridad, enseñansa y hopi mas. Uno di esnan cu ta pisa y cu ta sorprende nos comunidad ta e asunto di Enseñansa. Pa studia na Aruba mester ta nos derecho y no algo di luho pa esnan cu por paga p’e. No por ta asina cu nos mester roga pa educacion. Ta nos derecho humano y ningun gobierno ni organizacion mag di enterveni.

Por a mira par di siman atras, SKOA tabata boga y a logra su meta pa un aumento riba tarifa di cada mucha pa cubri gasto di scol. E gasto aki ta un acumulacion di añanan anterior. Cu e gastonan aki SKOA ta papia di miles di florin di perdida y pa haci corecion riba e perdida mester aplica un aumento na e mayornan. E aumento tin di haber cu gobierno no a entrega e subsidio corecto y tampoco na tempo na e organizacion di SKOA. Nos ta papia di un aumento drastico addicional di 275 florin mas pa aña. Y e cos remarcabel  ta cu e mayornan tin di paga e suma di inmediato of den un termino cortico. Una bes cu e suma wordo paga, mester re-inskribi e jiu atrobe.

Ami como mayor, cuidadano y politico ta puntra mi mes, dicon mi jiu mester pasa den circunstancia di tal forma maneha pa un gobierno cu no ta controla e organizacion aki? Pakiko e mucha mester wordo re-inskribi atrobe? Acaso e no ta inskribi caba? Esaki ta nifica cu e mayornan tabata paga e suma di  125 florin anual y no tabatin un control di pago? Pakiko minister di enseñansa ta bai pa soluciona un problema general y toch e problema no a wordo soluciona? Dicon placa mester wordo corta den enseñansa caminda e futuro di nos generacion ta e muchanan di awe? E poco preguntanan aki ta wordo haci pasobra mi mester di clarificacion como un mayor preocupa.

Mi ta kere si SKOA ta papia di un tardansa riba e subisidio anual di gobierno pa mas di 2 aña, SKOA mester a trek na e bel di ora situacion a cuminsa afecta e finanza. Por lo tanto, e ensertidumbre aki no mester ta un discusion ni un polemica den nos comunidad, pasobra enseñansa ta keda un factor importante y ta mara cu tur su gastonan pa provee un calidad di educacion halto.

Si gobierno wak enseñansa como e elemento di bida (levensbehoefte), e ora Gobierno hamas por nenga cu tin scarsedad financiero y no por inverti den nos generacion. Mester reserva un suma substancial pa sigi inverti den e loke yama “HUMAN CAPITAL”. Human Capital simplemente ta nifica inverti den e ser. Por ehempel inverti den educacion, deporte, problema social etc. E ser humano ta e materia prima cu mester enfoca riba dje, pasobra ta door di invercion e pais ta saca su futuro profecional pa saca cara den tur tereno laboral. Aruba corda semper, educacion ta e futuro di nos pais.

Expresionnan haci den e articulo aki no necesariamente ta refleha opinion di ArenaPoliti.co