{idkey=1363b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F102-gabinete-me-ii-na-washington-awo-tin-caya-nelson-florencio-sprok%3FItemid%3D101][title=Gabinete+ME+II%3A+Na+Washington+awo+tin+%E2%80%98Caya+Nelson+Florencio+Sprok%E2%80%99][desc=Hopi+por+bisa+cu+no+tin+un+miho+regalo+pa+su+cumplea%C3%B1os%2C+pero+e+inauguraciondi+Caya+Nelson+Sprok+na+Washington+diamars+atardi%2C+ta+un+merito+cu+sin+duda+algun+e+ciudadano+di+Noord+aki+a+gana+cu+su+mesun+esfuerso+y+dedicacion+durante+un+bida+largo.+Den+presencia+di+Minister+di+Infrastructura+Benny+Sevinger+y+Minister+di+Asunto+Social+Paul+Croes%2C+Sr.+Nelson+Sprok+tabata+compa%C3%B1a+pa+famia+y+amigonan+na+momento+cu+a+devela+e+borchi+di+%E2%80%98Caya+Nelson+Sprok%E2%80%99.+Ta+ken+no+conoce+e+nomber+di+Nelson+Spr]}

Hopi por bisa cu no tin un miho regalo pa su cumpleaños, pero e inauguraciondi Caya Nelson Sprok na Washington diamars atardi, ta un merito cu sin duda algun e ciudadano di Noord aki a gana cu su mesun esfuerso y dedicacion durante un bida largo. Den presencia di Minister di Infrastructura Benny Sevinger y Minister di Asunto Social Paul Croes, Sr. Nelson Sprok tabata compaña pa famia y amigonan na momento cu a devela e borchi di ‘Caya Nelson Sprok’.

Ta ken no conoce e nomber di Nelson Sprok y su Caha di Orgel ‘Nos Ambiente’? E caracter cooperativo y generoso di Sprok ta refleha den e cantidad grandi di plakaat cu e tin na su cas for di diferente organisacion deportivo, social, cultura y tambe scolnan cu ta gradici’e pa su sosten. E ta un sostenedo grandi di Parada di Noord. Adicionalmente Sprok ta un cunukero di hobby, cu un plantacion grandi y varia cu ta ocupa su añanan di retiro. El a lanta y yuda desaroya un compania manera Conar N.V. cu ta carga un nomber di calidad, servicio y profesionalismo. Awendia, ainda e ta dedica su tempo na toca pa nos grandinan.

Tabata un poco mas di un aña pasa cu Minister Mike Eman a honra Sr. Nelson Sprok como un baluarte di e bario di Noord, pero tambe di henter Aruba. Den nomber di Gobierno di Aruba a reconoce Sprok pa su participacion comunitario activo, pero tambe pa su ehempel como cabes di famia y empresario. Sin embargo, Minister President Eman a sinti cu e dedicacion di aprecio pa un persona manera Nelson Sprok no por a caba eynan, pesey mes e mandatario a nomina nomber di Sprok na Comision Nomber di Caya of Straaatsnaam Commissie. Y ora cu el a pidi Parlamentario Marlon Sneek pa e haya un caya chikito patras di su cas, Premier Eman a bisa cu esey no ta suficiente y cu ta e caya grandi cu ta pasa dilanti di su cas, e merece. Lamentablemente pa motibo di otro compromiso, Prome Minister no por tabata presente pa e ceremonia.

E trayectoria largo y rico di Sr. Sprok riba tereno comunitario y cultural tabata mas cu suficiente argumento pa e comision, consistiendo di 14 persona, tuma e decision di otorga e caminda di Washington, cu ta core for di crusada di Bubali pa esun di Palm Beach, e nomber di Caya Nelson Sprok. E comision ta forma representantenan di Departamento di Obranan Publico, Departamento di Infrastrutura y Planificacion, Postkantoor, Censo, Setar y Instituto di Cultura, ademas di varios persona di gran conocemento.

Di awor padilanti, tur cu pasa den e caya principal di Washington, ta bay wak su nomber y corda riba e amor y aporte grandi cu el a duna e isla di Aruba. E ceremonia di develo di e borchi ayera tardi a conta cu bendicion di Pastoor Jairo Maduro. Gabinete Mike Eman II ta expresa su mas sincero palabra di pabien na Sr. Nelson Sprok y famia pa e reconocemento aki bon mereci y ta spera cu su bida ta ehempel pa mas di nos ciudadanonan.

Expresionnan haci den e articulo aki no necesariamente ta refleha opinion di ArenaPoliti.co