{idkey=7188b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1415-rene-herde-avp-cambio-ta-bay-poco-poco-pero-structural%3FItemid%3D101][title=Rene+Herd%C3%A9+%28AVP%29%3A+Cambio+ta+bay+poco+poco+pero+structural][desc=Tur+e+cambio+cu+AVP+trece+ta+na+interes+di+henter+Aruba+Tin+mas+cambio+na+caminda+den+nos+pais.+E+ta+bay+poco+poco%2C+pero+e+cambionan+ta+structural%2C+duradero+y+ta+haci+Aruba%2C+su+institucionnan+y+fondonan+mas+stabiel+y+miho+prepara+pa+futuro.+E+cambionan+cu+tin+na+caminda+ta+riba+tereno+di+belasting%2C+di+ense%C3%B1ansa%2C+den+salubridad+y+den+oportunidadnan+economico.+Den+turismo+y+den+infrastructura.+Nan+ta+hopi+y+nan+tur+ta+na+interes+di+Aruba.+E+cambionan+nan+caminda+ta+pa+mehora+nos+bida+diario%2C+nos+]}
Tur e cambio cu AVP trece ta na interes di henter Aruba

Tin mas cambio na caminda den nos pais. E ta bay poco poco, pero e cambionan ta structural, duradero y ta haci Aruba, su institucionnan y fondonan mas stabiel y miho prepara pa futuro. E cambionan cu tin na caminda ta riba tereno di belasting, di enseñansa, den salubridad y den oportunidadnan economico. Den turismo y den infrastructura. Nan ta hopi y nan tur ta na interes di Aruba. E cambionan nan caminda ta pa mehora nos bida diario, nos seguridad y crea oportunidadnan nobo pa nos mes y nos jiunan.

BENEFICIO DI CADA CAMBIO
Cada uno di e cambionan cu tin na caminda tin beneficio pa nos pais y nos hendenan. E cambio den sistema di belasting tin diferente beneficio. Pa doñonan di trabao e ta ensera un simplificacion di e forma di paga belasting, tin un reduccion di belasting riba ganashi pa e doñonan di trabao y ta reduci e costo di tuma hende na trabou. E cambio di belasting ta beneficia trahadornan tambe. Menos placa ta bay sali di nan salario cu ta nifica cu nan ta keda cu mas placa den cartera pa nan mes dicidi con pa usa esaki pa nan famia. Lo sigui controla e costo di bida lo mas posibel. Ora prijsnan subi den otro paisnan di unda Aruba ta importa productonan, esey lo pone prijsnan subi.  

E cambionan den cuido di nos salud ta sigura entre otro cu e seguro medico AZV cu ta cubri tur nos gastonan di cuido de salud, ta bira mas sigura di su entrada awor y den futuro. E placa cu  BAZV ta acumula ta bay completamente pa cuido di nos salud. E construccion di e hospital nobo ta nifica cu e cuido di salud den hospital ta bira miho. Cu e facilidadnan nobo di e hospital e docternan por duna un miho cuido na nan patientnan. Door di e cooperasion cu otro paisnan, e cuido cu hende no por haya na Aruba lo sigui wordo duna nan Corsow, Hulanda of otro pais serca. E cambionan den e forma di traha di docternan, ta nifica cu gradualmente e mehoracion di e servicio na patientnan lo mester drecha. E kehonan serio cu tin awor aki mester conduci na mehoracion di e servicio y cuido.

E cambionan den infrastructura ta ensera cambionan cu pa mas cu 30 aña ta papia di nan na Aruba. Awor no ta papia mas. Ta haci! E mudamento di e waf di carga pa Barcadera ta nifica cu e waf na Playa por wordo renoba pa sirbi e barconan crusero miho. Un miho waf y un centro mas bunita ta nifica mas turista di barco pa keiro y cumpra cos den centro di Playa. E construccion di e "GREEN CORRIDOR" entre San Nicolas y Playa ta nifica un miho comunicacion, mas sigur, mas lihe pa habitantenan di tur parti di Aruba. E ta nifica tambe mas oportunidad pa actividad economico pariba di brug. Esaki ta algo cu inversionistanan semper a bisa. Cambionan den turismo ta ensera e seguridad cu gobierno di Aruba por keda maneha turismo segun necesidad y interes di henter Aruba y sigura cu tur hende na Aruba y tur parti di nos isla keda haya beneficionan di nos turismo.

Rene Herde: "Cambio tin biaha ta spanta hende. Tin hende cu kier pa tur cos keda manera e tabata. E realidad ta cu como pais y como hende nos no por para keto. Nos tin cu cambia y prepara pa cambio tur rond di nos. Esey ta sigui. Sinta haci nada ta nifica perde oportunidad. E bon ta cu e cambionan cu ta na caminda awor ta cambionan cu nos mes a scohe pe y cu ta beneficia henter nos pais."

Expresionnan haci den e articulo aki no necesariamente ta refleha opinion di ArenaPoliti.co