{idkey=2383b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2327-rene-herde-avp-servicionan-basico-mester-ta-sigura-pa-tur-hende-y-semper%3FItemid%3D101][title=Rene+Herd%C3%A9+%28AVP%29%3A+Servicionan+basico+mester+ta+sigura+pa+tur+hende+y+semper][desc=Enbez+di+yega+na+corta+awa%2C+mester+busca+solucion+di+pago+segun+capacidad%26amp%3Bnbsp%3B%26quot%3BTur+cas+mester+tin+e+acceso+na+awa.+Pasobra+e+ta+un+necesidad+humano+basico.+Nunca+mester+yega+asina+leu+cu+un+cas+di+famia+ta+core+e+riesgo+di+no+tin+acceso+na+awa.+Si+tin+retraso+den+pago+di+cuenta+di+awa%2C+mester+busca+un+solucion+pa+esaki.+Por+ehempel+den+forma+di+pago+flexibel+segun+e+capacidad+financiero+di+e+famia.+Cortamento+di+cuenta+di+awa+no+tin+mag+di+existi+mas+den+nos+pais+manera+e+tabata+den+pasado.%26quot%3B+As]}
Enbez di yega na corta awa, mester busca solucion di pago segun capacidad 

"Tur cas mester tin e acceso na awa. Pasobra e ta un necesidad humano basico. Nunca mester yega asina leu cu un cas di famia ta core e riesgo di no tin acceso na awa. Si tin retraso den pago di cuenta di awa, mester busca un solucion pa esaki. Por ehempel den forma di pago flexibel segun e capacidad financiero di e famia. Cortamento di cuenta di awa no tin mag di existi mas den nos pais manera e tabata den pasado." Asina Rene Herde' di fraccion di AVP a contesta riba e pregunta di prensa di kico e ta haya di e anuncio di WEB cu tin 12 mil cas cu no a paga nan cuentanan di awa atrasa y cu WEB mester cobra si no ta corta nan cuenta. Rene Herde' ta considera awa un di e necesidadnan basico di un comunidad. Segun e, e servicionan basico aki semper mester ta disponibel pa pueblo. A puntra Rene Herde kico e ta haya cu mester haci anto cu hendenan cu no ta paga? Su idea cu awa ta un servicio basico cu tur hende mester tin, no ta duna hende man liber pa gasta cuanto cu nan kier y no paga pasobra tog e ta un servicio basico cu semper tur hende mester tin? Kico Rene Herde ta haya cu WEB mester haci pa haya e placa di tur e hendenan cu no ta paga?

MAL USO y INCUMPLEMENTO
Segun Rene Herde', e lider di e fraccion di AVP den Parlamento, e garantia di servicionan basico manera awa, no kier men cu ta accepta mal uso di e servicio basico, ni cu ta keda sin paga pa esaki. E ta duna e ehempel cu cuido medico of seguridad ta necesidadnan basico, pero esey no kier men cu hende por bay haci kico nan kier, pasobra tog nos comunidad ta sigura tur hende e necesidadnan ey. Rene Herde': "Claro cu no por accepta mal uso of incumplimento cu pago di recibonan sin mas. Tur hende mester paga su cuentanan di awa. Mescos cu nos tur mester cuida nos curpa pa no bira malo of no haci cosnan cu ta pone nos bida y di otronan na peliger. Pero si un hende no por paga un cuenta di awa pasobra e no tin e placa na e momento ey, mester tin un forma pa e paga segun su capacidad. E dunado di e servicio WEB mester conoce su clientenan y busca solucion pa e pago di e cuenta sin cu tin di yega na corta awa. WEB tin mas cu 40 mil cuenta di awa. Si ta 12 mil cu no ta paga cuentanan na tempo, anto mi ta spera cu WEB por haya sa kico ta e motibo cu e grupo di hendenan aki no por paga nan cuenta na tempo y yega cu nan na un solucion pa nan por cumpli cu nan responsabilidad pero segun nan capacidad di pago. Esey no kier men cu nan no mester funciona manera un compania profesional cu ta duna servicio di calidad halto y cu ta opera financieramente efectivo tambe. E kier men cu pa e grupo di mas o menos 25% di nan clientenan cu un necesidad di servicio adicional, nan tin oido pe y ta busca activamente un solucion pe."  Rene Herde a finalisa bisando cu e ta spera cu WEB y tur otro compania lo tin wowo y oido pa e necesidad aki tambe. "Ta esey ta haci nos un comunidad cu ta cuida otro y ta percura pa niun hende keda atras mientras cu nos ta sigui crece como pais."

Expresionnan haci den e articulo aki no necesariamente ta refleha opinion di ArenaPoliti.co