{idkey=1025b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2737-gerick-croes-mep-mep-ta-haye-crucial-pa-nos-futuro-profesionalnan-regresa-cas%3FItemid%3D101][title=Gerick+Croes+%28MEP%29%3A+MEP+ta+haye+crucial+pa+nos+futuro+profesionalnan+regresa+cas][desc=E+diferencia+entre+MEP+y+AVP+ta+uno+obvio+ora+ta+trata+di+mira+e+bon+den+mocionan+y+nan+efecto+riba+bienestar+en+general.+Den+pasado+nos+a+trece+dilanti+den+un+articulo+titula+%26quot%3BAruba+mester+bira+mas+atractivo+pa+nos+profesionalnan%26quot%3B+e+diferente+retonan+cu+nos+hobennan+ta+confronta+nan+mes+cune+ora+di+finalisa+un+estudio.+Esakinan+ta+entre+otro+e+debe+astronomico+di+a%C3%B1anan+largo+riba+nan+lomba+y+dificultad+pa+drenta+e+mercado+laboral.+Nos+semper+a+vocifera+cu+mester+bin+un+tipo+di+sincronisacion+]}
E diferencia entre MEP y AVP ta uno obvio ora ta trata di mira e bon den mocionan y nan efecto riba bienestar en general. Den pasado nos a trece dilanti den un articulo titula "Aruba mester bira mas atractivo pa nos profesionalnan" e diferente retonan cu nos hobennan ta confronta nan mes cune ora di finalisa un estudio. Esakinan ta entre otro e debe astronomico di añanan largo riba nan lomba y dificultad pa drenta e mercado laboral. Nos semper a vocifera cu mester bin un tipo di sincronisacion optimal entre Aruba huis y Departamento di Labor. No por t’asina cu den 2016 nos tin graduadonan sin trabou y of mal paga! Solamente den casonan sporadico cu studia algo cu no ta fit den nos mercado laboral e lo por sosode pero asina mes nos mester traha pa evite. Hecho ta cu e tipo di cosnan aki ta demotivante pa un HBO/WO'er recien gradua.

Un di e proposicionan cu nos a yega di hasi ta sincronisacipn optimal entre Aruba huis y Departamento di Labor. Nos a duna como ehempel cu vacaturanan mester wordo notifica na tempo door di un dunador di trabou. Den un circuito Departamento di Labor conhuntamente cu Arubahuis riba un base semanal/mensual por tin un update di cuponan di trabou cu ta habri y riba un website central yuda nos futuro profesionalnan yega na un trabou. Pesei nos di oposicion ta contento cu durante tratamento di presupuesto a pensa riba nos futuro profesionalnan. Durante e tratamento di presupuesto 2016 un mocion a wordo entrega pa sondea posibilidad pa crea un registro online pa vacaturanan riba nivel hbo/wo. Como cu esaki ta parti di nos programa y den varios comunicado a pone hopi enfasis riba e asunto aki debi cu tin un fenomeno di "brain drain" na Aruba fraccion di MEP a apoya e mocion aki.

Ademas di esaki nos semper ta di pensamento cu ainda mas por wordo haci pa cuida y garantisa un trabou pa nos futuro hobennan profesional:

1) Publica un estudio di careranan cu tin demanda na Aruba. Esakinan mester wordo presenta na nos futuro profesionalnan den forma di seminarionan na un edad mas hoben. Por pensa cuminsa informa nan caba na un edad di por ehempel 14 aña. (pa no lage te na e ultimo aña cu ta atendiendo Voortgezet Onderwijs of un Beroepsopleiding)

2) E cuponan di trabou mester wordo protegi pa nos hobennan cu a inverti den nan estudio. Kiermen mester implementa un maneho of haci esaki mas estricto cu ningun doño di trabao ta tuma un persona cu ta bini di exterior pa tuma un cargo di nos profesionalnan.

Unda tin boluntad tin manera! E responsabilidad ta den man di gobierno aki of e futuro gobierno pa hiba un maneho recto pa acomoda nos profesionalnan yiu di tera den nos mercado laboral. Banda di esaki incentivanan mester wordo brinda na nos futuro profesionalnan. Ta pesei mes fraccion di MEP ta trahando riba un cambio di ley, cu posibilidad pa hasi e pagonan di fiansa di estudio aftrekbaar di belasting, te na un maximo di 10 mil florin pa aña pa 10 aña. Nos di oposicion ta di opinion cu hopi mas por wordo haci riba e tereno aki y nos ta sostene e pensamento cu recien graduadonan merece di por haya un entrada den e mercado laboral sin ningun contratiempo. Realidad ta cu hopi placa ta wordo inverti den nan estudio y futuro carera cual no por ta envano si hasi nan regreso uno amargo. Si nos di berdad kier laga nos economia crece y fortalece cu conocemento ta crucial pa nos profesionalnan bin Aruba bek.

Expresionnan haci den e articulo aki no necesariamente ta refleha opinion di ArenaPoliti.co