{idkey=9486b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2951-evelyn-wever-croes-mep-apesar-di-un-trayectoria-corto-den-politica-hende-muhernan-tin-un-trayectoria-largo-di-lucha-pa-bienestar%3FItemid%3D101][title=Evelyn+Wever-Croes+%28MEP%29%3A+Apesar+di+un+trayectoria+corto+den+politica%2C+hende+muhernan+tin+un+trayectoria+largo+di+lucha+pa+bienestar][desc=Evelyn+Wever-Croes+na+ocasion+di+Dia+Internacional+di+Hende+Muher%26amp%3Bnbsp%3BNa+ocasion+di+Dia+Internacional+di+Hende+Muher+partido+MEP+a+celebra+e+fecha+importante+aki+hunto+cu+e+comision+di+damas+di+MEP+Forza+Femenino+Grace%2C+y+nan+invitados.Evelyn+Wever-Croes+a+duna+un+discurso+tocante+e+responsabilidadnan+di+hende+muher.+Hopi+biaha+nos+no+ta+reconoce+e+papel+importante+di+e+hende+muher+den+nos+comunidad.+E+ser+femenino+ta+un+ser+multi+facetico%2C+hopi+ta+mama+y+tata+parew%2C+tumando+riba+nan+lomba+un+r]}
Evelyn Wever-Croes na ocasion di Dia Internacional di Hende Muher 

Na ocasion di Dia Internacional di Hende Muher partido MEP a celebra e fecha importante aki hunto cu e comision di damas di MEP Forza Femenino Grace, y nan invitados.
Evelyn Wever-Croes a duna un discurso tocante e responsabilidadnan di hende muher. Hopi biaha nos no ta reconoce e papel importante di e hende muher den nos comunidad. E ser femenino ta un ser multi facetico, hopi ta mama y tata parew, tumando riba nan lomba un responsabilidad hopi grandi, especialmente mirando cu na Aruba tin hopi Mama cu ta lanta nan yuinan nan so. Otronan ta e centro di e famia, e forza cu ta wanta e famia hunto y e forza cu ta hiba e famia padilanti. Tin otro hende muhernan ta cu e forza principal tras di e exito di nan esposo of yiunan, esun cu tey pa sostene nan den bon y den mal tempo. Otro hende muhernan ta un combinacion di tur esakinan. “Nos hende muhernan ta fuerte, y mester ta fuerte. Pesey ta importante pa bo no neglisha bo mes”, lider di MEP a bisa. Ela ripiti e instruccionnan cu ta wordo duna den un avion si presion den cabina mester baha: “Mayornan biahando cu mucha mester bisti e mascara prome y despues yuda e yunan. E motibo di esaki ta pasobra si nos como hende muher mester carga tur e responsabilidadnan ey, nos mester tin forsa nos mes, nos mes mester tin oxigeno.
TRAYECTORIA DI HENDE MUHER DEN POLITICA
Hende muhernan a haya derecho di voto y derecho pa drenta arena politico apenas na final di siglo 19,  pues hende muhernan tin un trayectoria relativamente corto den politica.
Sinembargo hende muhernan tin un trayectoria hopi mas largo cu hende homber pa loke ta sufrimento, sacrificio y lucha pa bienestar di nos famianan. Y den e tempo corto aki hende muhernan a sinja cu atraves di politica nos por lucha pa bienestar real di henter nos comunidad, mescos cu semper hende muhernan a lucha pa e bienestar di nos famia y nos hogarnan. Hende muhernan sa pone prioridadnan na bienestar di e famia, y ta pesey hopi biaha un hende muher den politica por compronde mihor con cada famia ta lucha pa bai padilanti.

COMPROMISO DI MEP
“Y cu bo sosten nos ta bai lucha pa bienestar den tur hogar. Kiko ta bienestar? Bienestar ta na prome lugar ora cu bo ta sinti cu abo y bo famia ta sigur, y no cu miedo di tanto criminalidad. Ora cu bo tin un trabou y bo por paga bo gastonan di tur luna, no ora tin desempleo y costo di bida asina halto. Ora cu bo tin bon cuido di salud, no ora bo mester warda 3 luna pa mira un specialista. Ora cu nos muchanan tin un bon calidad di ensenjansa, y no cu nan diplomanan no ta wordo reconosi. Esey ta bienestar: seguridad, baha costo di bida, mehora cuido di salud, crea mas cupo di trabou y un bon calidad di ensenjansa. Esey ta nos compromiso cu cada cuidadano na Aruba”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co