{idkey=5213b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3531-elton-lioe-a-tjam-abo-ban-cuminsa-papia-y-scucha-otro-atrobe-e-ta-gratis%3FItemid%3D101][title=Elton+Lioe-A-Tjam+%28ABO%29%3A+Ban+cuminsa+papia+y+scucha+otro+atrobe.+E+ta+gratis%21][desc=Varios+politico+Hulandes+y+hasta+un+bankero+regional+a+clasifica+e+pueblo+Arubano+algun+a%C3%B1a+pasa+como+%E2%80%98politiek+verziekt%E2%80%99.+Ora+nan+a+bis%E2%80%99e%2C+hopi+hende+a+rabia.+Visionario+of+no%2C+nan+tabatin+rason.+Tur+cos+na+Aruba+a+bira+un+asunto+politico.+Awendia+ningun+combersacion+por+wordo+hiba+sin+cu+politica+ta+%26amp%3Bnbsp%3Bwordo+involucra+aden.+Tur+caminda+unda+bo+bay%2C+si+e+ta+na+trabou%2C+di+bishita%2C+un+evento+social+y+hasta+den+famia%2C+tur+combersacion+ta+termina+den+uno+politico.+Tin+hende+cu+no+ta+papia]}
Varios politico Hulandes y hasta un bankero regional a clasifica e pueblo Arubano algun aña pasa como ‘politiek verziekt’. Ora nan a bis’e, hopi hende a rabia. Visionario of no, nan tabatin rason. Tur cos na Aruba a bira un asunto politico. Awendia ningun combersacion por wordo hiba sin cu politica ta  wordo involucra aden. Tur caminda unda bo bay, si e ta na trabou, di bishita, un evento social y hasta den famia, tur combersacion ta termina den uno politico. Tin hende cu no ta papia cu otro mas, pa via di politica. Otronan ta evita di papia riba asuntonan politico en su totalidad, pa no haya nan mes den ‘problema’. Esaki ta tristo, pasobra menos hende comunica cu otro, mas e pueblo ta aleha for di otro. Consecuencia, menos comprension y respet pa otro su opinion y mas espacio lo tin pa mito, engaño y glorificacion politico crece enbes di e uzo di inteligencia y ‘common sense’. 

Cada dia cu tin menos comunicacion pero si mas discusion entre hende, ta beneficia solamente e partidonan politico tradicional. No tin un solo beneficio pa e pueblo, cu excepcion di algun campañado y sostenedo. Ta increibel pa mira con un pueblo por wordo dividi pa via di politica. E ta bira mas tristo ora bo ripara cu e division politico no ta basa riba ningun argumento ideologico mas. E division politico actual, ta basa riba personahe, populismo, faboritismo y patronage. Pues ken por conta miho fabula y gaña mas convenciente. Ken por cumpra mas periodista y medio di comunicacion, pa haci promocion personal y partidista. Ken por regala mas permiso y proyecto na patrocinado. Of ken por sigui uza pluma y logronan di estadista grandi di pasado, sin conta realmente kico ta nan contribucion. Awendia e no ta interesa e parti fanatico politico, si Aruba ta bancarota y cu campaña ta wordo hiba cu placa di pueblo, locual tambe ta ilegal. Parce cu e unico cu ta conta pa e fanaticonan politico ta, ken por ofrece e miho show sin contenido. Cu nada ta wordo cumpli locual a wordo priminti durante campaña, no ta conta. Cu e gran lider ta mas den exterior atendiendo su asuntonan y interesnan personal, tampoco ta conta. Awendia un parti di pueblo a wordo condiciona pa pensa cu anuncio di proyecto, ta sinonimo cu ‘bon gobernacion’. Mas biyones e proyecto costa, mas entusiasma e parti aki ta bira y mas nan ta dispuesto pa defende e proyecto. Di unda e placa ta bin of si e placa ta bon inverti, esey no ta conta of importa nan. Cu nan tampoco lo no tin ningun beneficio personal di dje pero un grupito si, tampoco ta interesa nan. A pesar cu tur hende sa cu na final ta pueblo lo bay paga pa e ‘derroche’ di placa y e enrikecimento personal, ainda un gran mayoria di pueblo ta acepta esaki pa despues keha. Esaki ta e forma tradicional y preferi pa hiba campaña y esaki ta locual e partidonan politico tradicional ta sigui ofrece e pueblo condiciona.

No tin atencion pa combersa riba temanan real y urgente. No tin atencion pa combersa riba temanan cu ta afecta e sociedad y su structura. No tin atencion pa combersa riba temanan cu ta afecta e hogar y e famia. Loke realmente ta necesario, ta cu e pueblo aki mester cuminsa combersa cu otro atrobe. E pueblo mester realisa cu politica ta algo serio y cu e ta algo di henter e sociedad. E pueblo mester realisa cu democracia no ta vota un dia y wordo abusa cuater aña largo. E pueblo mester realisa cu e grupito cu pueblo a duna e confiansa pa goberna e isla pa cuater aña, no por uza e cuater aña pa silencia e opinion publico of cualkier opinion diferente. Combersa y papia riba asuntonan politico ta sano y necesario. Pasobra, hasta pa esunnan cu ta bisa cu nan no kier tin nada di haci cu politica, politica ta afecta tur hende su bida. Y si e maneho politico ta malo, e efectonan riba e sociedad lo ta mas grandi y duradero.

Pues e ta necesario cu mas hende realisa cu democracia ta encera mas cu plan, proyecto y show. E ta necesario cu mas hende realisa cu Aruba ta den un situacion serio y hunga politica di avestruz no ta un opcion mas. Tur esunnan cu a yama Aruba ‘politiek verziekt’, tabatin rason. Aruba mester cuminsa cura su mes di su ‘politieke verziektheid’, prome e muri por completo y mas ‘zamuronan’ bin come loke a resta. Nos pueblo mester cuminsa realisa cu ningun hende lo yuda nos, si nos mes no kier yuda nos mes. Sigui gaña nos mes cu plan, proyecto y show ta sinonimo cu democracia, progreso y ‘bon gobernacion’, ta mescos cu admiti cu ‘simple old, boring and corrupt politics’ ta bon.

E lo ta mas beneficioso pa pueblo y su futuro generacionnan, si menos atencion wordo poni riba plan, proyecto, show y glorificacion politico. Tur hende por bin cu un plan of proyecto. Tur hende por gaña pueblo cu su plan of proyecto lo ta na bienestar di pueblo. Pero ta poco politico lo bisa pueblo e berdad of admiti su eror. P’esey den partido ABO su humilde opinion, e miho forma pa atende y enfrenta nos problemanan socioeconomico, ta pa pueblo cuminsa papia, scucha y respeta otro su opinion atrobe. Kisas pa algun fanatico politico esaki no ta un interesante solucion, pero si e ta e unico solucion cu no ta costa pueblo un cen y caminda pueblo no tin cu gaña of intimida otro. E ta gratis y tur hende por participa activamente.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co