{idkey=5044b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5527-por-andin-bikker-ta-cuestiona-ausencia-di-minister-paul-croes-den-reunion-publico%3FItemid%3D101][title=POR%3A+Andin+Bikker+ta+cuestiona+ausencia+di+minister+Paul+Croes+den+reunion+publico][desc=E+reunion+publico+di+Staten+tocante+e+asunto+di+Minister+Paul+Croes%2C+riba+peticion+di+oposicion%2C+a+tuma+lugar+diamars.+Parlamentario+Andin+Bikker%2C+a+cuestiona+e+ausencia+di+minister%26amp%3Bnbsp%3B+Paul+Croes%2C+pasobra+e+ta+haya+cu+Minister+Croes+ta+politicamente+responsable+y+hasta+un+investigacion+riba+su+persona+den+su+funcion+di+miembro+di+Ministerraad+ta+tumando+lugar.Bikker+kier+a+haya+sa+con+bin+cu+e+minister+no+tabata+tei+siendo+e+ta+politicamente+responsable%2C+pero+e+no+a+haya+contesta.+Bikker+a+la]}
E reunion publico di Staten tocante e asunto di Minister Paul Croes, riba peticion di oposicion, a tuma lugar diamars. Parlamentario Andin Bikker, a cuestiona e ausencia di minister  Paul Croes, pasobra e ta haya cu Minister Croes ta politicamente responsable y hasta un investigacion riba su persona den su funcion di miembro di Ministerraad ta tumando lugar.

Bikker kier a haya sa con bin cu e minister no tabata tei siendo e ta politicamente responsable, pero e no a haya contesta. Bikker a laga sa cu el a tuma nota den prensa cu tabata tin un proposicion di minister Paul Croes na Ministerraad a base di cual a cay un decision. E parlamentario a bisa cu aparentemente tabata tin dos documento di cual el a pidi copia ya cu pa bon funcionamento di e democracia Parlamentario e ta haya cu parlamentarionan mester haya copia di tur dos. Bikker a trece dilanti cu no ta conoci den nos Constitucion, den e Landsverordening Instelling Ministeris, ni den reglamento di orden di Ministerraad, tampoco den e Landsbesluit cu ta regula ki ora por melding of ta ausente,  cu un minister cu ta sospecha di un crimen, y den e caso aki hopi serio, por bay basicamente cu vacantie, en spera di e resultado di e investigacion.

Na final di dia, segun e parlamentario, e minister ta keda responsabel y e por firma, y aparentemente mal uso di su firmamento ta e hecho pa cual e ta wordo poni como sospechoso y nunca den historia parlamentario y di gobernacion di Reino, a bin un caso unda cu na 17 lugar a drenta investiga y cu un minister ta sospechoso di diferente cos hopi serio mes. E parlamentario ta puntra e Minister con e por pensa di respet pa su funcion, pa nos Constitucion y pa Pais Aruba, cu e ta kere cu no obstante esey e por bay cu vacantie en spera di e resultado di e investigacion di e caso. Segun Bikker el a scucha di diferente colega cu nan ta bay busca con na Hulanda nan ta atende cu casonan asina, pero netamente den Reino Hulandes, pa menos cu esey Minister ta duna honor na nan mes y ta retira. Es decir, nan ta laga e funcion den Parlamento of den Ministerraad te momento cu e investigacion keda cla. Un pregunta a bay pa Prome Minister Eman, ya cu minister Paul Croes no tabata presente, con e por hustifica cu e tin e tematica di integridad ta asina halto no solamente den encuentronan Parlamentario pero tur caminda cu nan bay, Incluso tanto na 2014 como na Juli 2016 tabata tin discusionnan fuerte riba integridad y su colega Sneek a presenta un Landsbesluit riba integridad den gobernantenan y cada bez cu tin encuentronan Parlamentario ta debati oranan largo riba integridad, anto aworaki cu un caso asina serio ta presenta, diripiente ta saca coneu for di sombre y ta bisa cu e minister ta bay cu vacantie, en spera di e resultado di investigacion.

E parlamentario a bisa cu esaki ta masha straño mes, pasobra ora ta trata di otro fraccionnan ora AVP ta den oposicion, pa menos cu esey un minister mester tuma su retiro. Pero e fraccion di AVP, ora ta cumbini nan ta aplica cierto reglanan, Bikker a bisa y añadi cu si nan wak e combinacion di dos agenda preto cu tin, tur dos ta trata den esencia cu casonan penal andando, pero nan kier papia riba un y no riba e otro, y den agenda E un minister ta sospechoso. Un expression di Minister di Husticia no a cay na agrado di Parlamentario Bikker. Esaki ora el expresa “NO…It doesn’t matter”, y aki e parlamentario a bisa cu si esey ta e minister su etica y balor por saca afo for di awor caba cu esey ta su norma y balornan. Parlamentario Bikker a bolbe para keto riba e hecho ta cu normalmente den e historia di Reino Hulandes, ora un mandatario ta wordo sospecha di crimennan di e magnitud aki den su funcion, e mester duna honor na su mes y retira di su funcion y esey ta e pregunta cardinal den e caso aki.

El a laga bon cla cu no ta bay pa detayenan di e investigacion, ni pa e regla cu te ora un sospechoso ta wordo haya culpable ta wordo condena, pero ta bay pa e esencia cu pa añanan caba ta papia riba e tematica di integridad y ta bin cu tur sorto di concepto riba esey, y a wordo bisa cu si na Sint Maarten y Curacao, esaki no ta wordo reglamenta debidamente, nan kier impone riba nan un ley di integridad di Reino.

Expresionnan haci den e articulo aki no necesariamente ta refleha opinion di ArenaPoliti.co