{idkey=7094b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5834-por-94-di-maestronan-a-bisa-di-a-encontra-problema-social-por-lo-menos-1-biaha-e-ana-escolar-aki%3FItemid%3D101][title=POR%3A+94%25+di+maestronan+a+bisa+di+a+encontra+problema+social+por+lo+menos+1+biaha+e+a%C3%B1a+escolar+aki][desc=]}
Resultado di encuesta di enseñansa    

Despues di e fin di siman unda cu a tuma luga e “Teachers Appreciation Conference”, den cual MGM Source a presenta resultadonan di e encuesta di enseñansa, lider di POR Otmar Oduber kier a gradici tur colega y sigur Joselin Croes cu a yuda den haci esaki posibel.

MGM source a percura pa entrevista un cantidad grandi di studiantenan y maestronan akinan na Aruba, na un forma scientifico. Algun di e preguntanan tabata encera ki lenguahe ta wordo papia na cas door di e hobennan. Si nan ta comprondo e les cu wordo brinda, pero tambe den ki lenguahe nan ta prefera di haya les. Ta mira cu un porcentahe hopi halto ta indica cu Papiamento ta bin dilanti pa maestronan y studiantenan. Asina e topiconan a varia riba salud tambe manera cuanto di e alumnonan ta come fruta y berdura, hacimento di deporte entre otro. Esakinan ta un paar di e cantidad di preguntanan cu a wordo haci na nos hobennan y na e maestronan cu tambe tin resultado bastante interesante.

Resultadonan maestro 
83% di maestronan cu a forma parti di e encuesta ta femenino y 17% masculine. 53% di maestronan a bisa cu nan ta gusta nan trabou masha hopi y 1% no. A puntra e maestronan kico segun nan mester ta e les di instruccion pa cual 40% a indica hulandes y 42% Papiamento cual ta e mayoria. 87% di maestronan ta pro pa introduci lesnan adicional na scol manera arte, cultura, musica, computer etc. te cu 5or di atardi na scolnan. 41% ta dispuesto di haci esaki cu pago extra, 12% lo haci esaki sin mas, 29% a bisa no, 18% kisas.

Otro temanan cu a resalta tambe ta cu 85% di maestronan ta siña alumnonan tolerancia pa alumnonan di e comunidad LGBT. 99% ta conscientisa tocante riesgonan di bullying y 65% entre 1-5 biaha ta encontra casonan di bullying den klas. Riba e pregunta: Como maestro kico lo motiva bo pa duna miho les? 56% a bisa cu un miho infrastructura, 66% miho y mas material, 64% material di estudio actualisa na experiencia di e alumno. 88% di maestronan ta desea un oficina central di HR pa tur maestro na Aruba.71% ta di opinion cu gobierno mester institui un sistema di control di calidad di tur individuo cu ta traha na scol y 93% kier pa gobierno inverti mas den desaroyo di e maestro. Pa loke ta e invercion 62% di maestronan kier mira esaki wordo haci den cursonan. 84% di maestronan ta bisa cu pa mehora e calidad di enseñansa mester inverti mas den maestronan. Pa loke  ta e budget di enseñansa di gobierno, e top 4 sitionan cu maestronan ta opina cu mester inverti mas den dje ta klasnan mas chikito, expansion di educacion special pa hobennan cu problema, miho situacion di empleo pa maestronan y actualisa materialnan di enseñansa cu e situacion actual di hobennan na Aruba.

Segun sr. Oduber resultado di e encuesta ta hopi extenso y e informacion lo bira e base pa cual nos partido POR lo expande riba e “Plan di Accion” y presenta e programa dentro di poco na pueblo di Aruba.

Expresionnan haci den e articulo aki no necesariamente ta refleha opinion di ArenaPoliti.co