{idkey=4053b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5687-parlamentario-mr-juan-e-thijsen-mep-mike-eman-tambe-tin-hopi-pos-habri-y-hulanda-ta-usa-e-posnan-aki-como-arma-pa-logra-propositonan-di-hulanda%3FItemid%3D101][title=Parlamentario+mr.+Juan+E.+Thijsen+%28MEP%29%3A+Mike+Eman+tambe+tin+hopi+pos+habri+y+Hulanda+ta+usa+e+posnan+aki+como+arma+pa+logra+propositonan+di+Hulanda][desc=Parlamentario+mr.+Juan+E.+Thijsen+ta+kere+cu+ta+importante+pa+pueblo+di+Aruba+ta+consciente+con+e+podernan+politico+ta+move+riba+nos+isla+y+den+Reino+Hulandes.+No+ta+un+secreto+publico+cu+Hulanda+tin+un+preferencia+pa+AVP+riba+MEP.+E+motibo+principal+di+esaki+ta+cu+Hulanda+sa+cu+den+MEP+e+tin+un+partner+cu+ta+para+firme+pa+interesnan+di+Aruba+mientras+Hulanda+por+usa+AVP+na+su+antoho+ya+cu+AVP+no+ta+bai+pa+interes+general+di+Aruba+sino+AVP+ta+bai+pa+interesnan+partidista+y+specialmente+interesna]}
Parlamentario mr. Juan E. Thijsen ta kere cu ta importante pa pueblo di Aruba ta consciente con e podernan politico ta move riba nos isla y den Reino Hulandes. No ta un secreto publico cu Hulanda tin un preferencia pa AVP riba MEP. E motibo principal di esaki ta cu Hulanda sa cu den MEP e tin un partner cu ta para firme pa interesnan di Aruba mientras Hulanda por usa AVP na su antoho ya cu AVP no ta bai pa interes general di Aruba sino AVP ta bai pa interesnan partidista y specialmente interesnan particular di esnan den e circuito cercano den AVP. Hulanda ainda ta "groggy" di e forma con Aruba bao liderazgo di Betico Croes den feliz memoria y partido MEP a logra nos Status Aparte, pero tambe bao Nel Oduber Aruba su interesnan tabata bon defendi, akinan por menciona e caso di Plant N.V. unda Hulanda kier a keda cu plakanan cu ta pertenece na Aruba y finalmente gobierno di Aruba bao guia di Nel Oduber a logra trece e plaka den caha di gobierno. Ta lastima si cu despues AVP a mal usa e plaka. Segun Parlamentario mr. Juan E. Thijsen ta bisto cu Hulanda ta proteha AVP specialmente si compara e trato cu Hulanda ta duna Mike Eman y su gobierno compara cu e trato di Hulanda pa cu gobiernonan di Corsou y Sint Maarten. Esaki tanto riba tereno financiero como riba tereno hudicial y tambe di integridad. Hulanda ta permiti Gobierno di AVP masacra nos pais den debe mientras e debe di Aruba ta mas grandi cu esun di Sint Maarten y Corsou. Te ainda ningun hende por comprende con Hulanda tin e topico integridad asina halto den Reino y sinembargo ta permiti Gabinete Mike Eman sigui cu su fechorianan y na unda actualmente hasta tin un Ministro di Gabinete Mike Eman sospecha di delitonan grave den su funcion como Ministro. Tambe mientras na Corsou politiconan ta ser deteni y persigui penalmente na Aruba tin asina hopi corupcion cu ta asombroso con un Ministro den dia cla ta pasa man pa propiedad di pueblo y nada no ta pasa. Segun Parlamentario mr. Juan E. Thijsen tur esaki ta confirma cu Hulanda ta wanta man riba cabez di Mike Eman y su gabinete apesar di e posnan hundo y stinki cu Mike Eman tin habri. Parlamentario mr. Juan E. Thijsen ta convenci cu deliberadamente Hulanda ta usa e fayonan di Mike Eman pa logra metanan di Hulanda. Un di nan ta kibra gradualmente e posicion di Status Aparte di Aruba. Ya nos ta financieramente bao curatela y awor nos ta na caminda pa ta hudicialmente bao curatela. Partido MEP den cuadra di e desmantelisacion di e autonomia di Aruba ya caba a acerca e comision di dekolonisacion di Nacionan Uni. Pero Hulanda no a para keto y ya caba a core bai na e comision di Dekolonisacion pa yora cu ta asuntonan di Reino interno. P'esey segun Parlamentario mr. Juan E. Thijsen ta importante pa Partido MEP drenta gobierno proximamente pasobra como gobierno MEP lo por defende e autonomia di Aruba miho cu como oposicion. E Autonomia ta asina importante pa nos pais pasobra e ta duna nos e instrumentonan necesario pa por desaroya nos pais. Nos por a mira caba den caso di Citgo unda ta Hulanda ta dune ok pa algo cu ta bon pa nos pais. Hulanda no a duna ok pasobra e ta bon Aruba sino pasobra e ta cuadra cu planan di Hulanda pa gana plaka den nos regio. Parlamentario mr. Juan E. Thijsen kier enfatisa un biaha mas cu e interesnan economico di Hulanda den nos region ta hopi grandi y e interesnan di Aruba ta secundario na esunan di Hulanda. Tambe partido MEP ta moviendo den cuadra di COPPPAL pa trece e desmantelacion di autonomia di Aruba den atencion internacional. Parlamentario mr. Juan E. Thijsen y partido MEP ta pidi pueblo pa ta alerta y sigui desaroyonan di cerca.  Hunto p'e cambio. Sin miedo. MEP ta cla pa e reto di defende nos autonomia un biaha mas. 

Expresionnan haci den e articulo aki no necesariamente ta refleha opinion di ArenaPoliti.co