{idkey=9057b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5674-avp-rapport-preliminar-di-1000voz-ta-ratifica-pa-su-moderadornan%3FItemid%3D101][title=AVP%3A+Rapport+Preliminar+di+1000voz+ta+ratifica+pa+su+moderadornan][desc=ORANJESTAD+%E2%80%93+Como+parti+di+e+proceso+cu+ta+1000voz%2C+organisadonan+a+sinta+e+siman+aki+bek+cu+e+moderadornan+di+e+casi+90+mesa+cu+tabatin+na+e+evento.+E+obhetivo+di+e+encuentro+tabata+pa+presenta+e+resultadonan+preliminar+y+duna+oportunidad+na+e+moderadornan+pa+verifica+cu+esaki+ta+cuadra+cu+loke+nan+a+wak+y+scucha+e+dia+ey+for+di+e+participantenan.+Tanto+esnan+trahando+riba+e+informacion%2C+como+e+boluntarionan+a+keda+satisfecho+y+awo+ta+pasa+pa+e+ultimo+parti+prome+cu+entrega+oficial+di+e+rappo]}
ORANJESTAD – Como parti di e proceso cu ta 1000voz, organisadonan a sinta e siman aki bek cu e moderadornan di e casi 90 mesa cu tabatin na e evento. E obhetivo di e encuentro tabata pa presenta e resultadonan preliminar y duna oportunidad na e moderadornan pa verifica cu esaki ta cuadra cu loke nan a wak y scucha e dia ey for di e participantenan. Tanto esnan trahando riba e informacion, como e boluntarionan a keda satisfecho y awo ta pasa pa e ultimo parti prome cu entrega oficial di e rapport.

Tyson Lopez a splica cu ora bo ta colecta informacion di un sesion asina grandi, bo por perde cierto identidad di e contenido, pero e reunion di e siman aki ta hustamente pa evita esey. ‘Esaki ta algo cu ta hopi cuidadoso cu ne y nos ta pasando dor di dje varios biaha. Na final mi ta sigur cu hendenan lo ripara cu esey ta loke nan a contribui cu ne,’ Lopez a indica añadiendo cu e ta hopi satisfecho cu e resultado y con full e proceso a cana.

Un di e moderadornan presente na e reunion tabata Jonathan Wever. E ta contento di e participa paso ta kere cu innovacion ta sumamente importante den politica. ‘Nos ta biba den un mundo y comunidad cu semper ta evoluciona, bay dilanti y cambia. Nos tin cu mantene nos mes den e mesun paso, wak kico ta cambia pa bon of malo y adapta pa asina nos por keda actualisa. Asina por provee e miho servicio, bin cu ideanan nobo y un maneho nobo cu por yuda nos bay dilanti. Dus innovacion no ta solamente tecnologia, pero tambe ta maneho publico, con ta bin cu ley nobo, con bo ta zorg pa bo gobierno tin un bon structura pa maneho. P’esey ta hopi importante pa keda haci estudio y keda actualisa.’

Nicole Godett ta comparti Jonathan su opinion. E tambe tabata un moderador na 1000voz cu ta orguyoso cu por a yuda pa trece e opinion di e ciudadanonan dilanti. ‘E ta echt e bida di e personanan, kico nan ta wak den bida diario y cu nan a pone riba papel. Nan ta puntonan valido y actual y mi sa cu lo tin un efecto positivo.’ Nicole ta pensa cu como ser humano hopi biaha nos ta pensa djis riba nos mes, pero 1000voz tabata un oportunidad pa tur hende duna nan voz, bisa kico nan ta haya bon y menos bon.

Entrega di resultado di 1000voz den forma di un rapport ta programa pa tuma luga dia 1 di juni den un encuentro di partido AVP. Presidentnan di Fundacion Digna Lacle Herrera y Fundacion Mito Croes lo haci entrega di e rapport na lider di partido Mike Eman cu na su luga lo uza e resultadonan pa elabora un Plan di Gobernacion cu ta cientifico, realistico y ta bin for di e propio pueblo.

Expresionnan haci den e articulo aki no necesariamente ta refleha opinion di ArenaPoliti.co