{idkey=7572b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6277-desiree-croes-avp-nos-pais-ta-cla-pa-biba-miho-y-no-bolbe-pa-un-pasado-scur-nos-ta-cla-pa-bay-padilanti%3FItemid%3D101][title=Desiree+Croes+%28AVP%29%3A+Nos+pais+ta+cla+pa+biba+miho+y+no+bolbe+pa+un+pasado+scur.+Nos+ta+cla+pa+bay+%E2%80%98Padilanti%E2%80%99%21][desc=]}
ORANJESTAD – AVP ta kere cu Aruba mester ta un comunidad vibrante, alegre y productivo. Den un comunidad asina, tur hende ta biba miho y ta contribui den forma activo na e miho calidad di bida pa tur! Un comunidad vibrante ta inclui tur hende. Tur hende ta participa, contribui y beneficia. Esey tabata parti di e mensahe cu candidato #13 riba lista di Partido di Pueblo Arubano, AVP a trece dilanti durante e presentacion di nan Programa di Partido ‘Padilanti: 2017-2021’.

Den e vision di AVP, Croes a splica, un isla contento ta basa riba e felicidad di su famia y barionan; ta eynan nos ta biba. Esey ta nifica cu nos barionan, scolnan y cayanan mester ta sigur y liber di crimen. E ta nifica cu tur hende tin acceso na cuido di salud di calidad; cu nos scolnan ta luganan caminda mucha y hende grandi ta siña y crece sin limite. E ta nifica tur tur talento di tur nos hendenan; hobeny grandi, homber y muhe, ta haya oportunidad pa desaroya.

Barionan vibrante ta motiva y inspira habitantenan pa bini hunto, traha hunto y crea den cada bario e ambiente di un bida sigur, saludabel y feliz cu famia y amigonan pa bida. E rol di Gobierno pa crea un comunidad vibrante ta crucial pasobra ningun otro instancia por combati inseguridad, decadencia, intrankilidad, actividadnan ilegal of molester pa otro. Ta esencial cu Gobierno hunto cu e habitantenan di cada bario, scoge y crea e facilidadnan cu e bario kier.

Desiree Croes: “E rol di gobierno mester ta uno activo, cu vision y cu envolvemento continuo den tur bario!”

AVP a compromete su mes pa haci nos isla mas berde tambe pasobra nos naturalesa ta crucial pa nos bida. Pesey AVP lo sigui traha pa cuida nos naturalesa dor di entre otro: 1. Crea mas espacionan berde den barionan, 2. Recoge mas e awa di yobida y reusa e ‘grey water’ pa mantene parke y espacionan publico; 3. Sigui amplia e cantidad di panel solar riba dak di scol y edificionan di Gobierno; y 4. Expande programanan berde den educacion manera Green ‘S Cool.

“E comunidad vibrante cu nos kier ta rekeri nos envolvemento directo y continuo y ta awo nos mester crea e comunidad vibrante aki pasobra pueblo ta cla p’e,” Croes a bisa na e publico grandi den Renaissance Convention Center. “E oportunidad unico aki ta awo. Nunca prome nos tabatin e condicionnan asina bon pa haci esaki. E inversionnan den nos hendenan y den nos barionan a crea e condicionnan aki. Awor nos mester actua; AVP ta cla pa actua y hiba tur nos barionan un stap mas Padilanti!”

Expresionnan haci den e articulo aki no necesariamente ta refleha opinion di ArenaPoliti.co