{idkey=9769b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5843-rene-herde-avp-bo-tin-derecho-di-tin-un-propio-opinion-pero-e-echonan-ta-keda-mescos%3FItemid%3D101][title=Rene+Herd%C3%A9+%28AVP%29%3A+%E2%80%9CBo+tin+derecho+di+tin+un+propio+opinion+pero+e+echonan+ta+keda+mescos%E2%80%9D][desc=]}
Rene Herdé na lider di MEP. 

“Durante di e reunionnan entre parlamentonan di e cuatro paisnan di Reino a papia dos biaha riba e tema importante di integridad den gobernacion. Pero loke e lider di MEP a declara na prensa na Aruba y e impresion cu ela purba crea, no ta loke a sosode na Hulanda. Lamentabelmente atrobe mi tin cu corrigi’e.” Asina Rene Herde’, presidente di e comision di Asuntonan di Reino di Parlamento di Aruba a declara na prensa. Mas den siman e lo duna mas informacion. Pero e kier a cuminsa mes ora pa corrigi e impresion robez cu e lider di MEP a purba crea aki na Aruba. 

INTEGRIDAD
Tur miembro di e delegacionnan di e cuatro parlamentonan di Reino a mustra riba e importancia di integridad den gobernacion y cu mester sigui pone atencion na esaki, pasobra den tur cuatro pais tin di haber cu retonan di integridad den gobernacion. Enbez di punta dede riba otro, a palabra cu ta inventarisa e temanan di integridad cu tur cuatro pais ta haya cu ta essencial pa regla esaki den nan propio ley y reglanan. A scohe pa cada pais mes regla esaki y no regla esaki riba nivel di Reino of pa laga Gobierno di Reino impone esaki riba e cuatro paisnan. E realidad ta cu cada uno di e paisnan di Reino tin reto y incidentenan riba tereno di integridad. A scohe pesey pa hunto sigui atende cu e tema aki entre e parlamentonan cada biaha cu topa y intercambia di experiencianan pa mehora e nivel di integridad den gobernacion den tur nos paisnan.

LISTA
E lista di tema cu a palabra cu cada pais lo traha riba dje ta ensera e siguiente topiconan: 

1. Un regla of ley pa preveni hortamento di asiento den parlamento door di hende cu ta dicidi di sali di nan fraccion y bay cu e asiento cu ta pertenece na e partido. 
2. Un codigo di etica pa conducta di politiconan cu lo mester inclui transpariencia di funcionnan cu politiconan tin banda di nan funcion oficial, transpariencia financiero di cada politico y registracion di regaldo of donacionnan cu politiconan ta haya. 
3. Un ley di screening di candidatonan pa minister y parlamentario. 
4. Un ley pa regla financiamento di partidonan politico. 

Rene Herdé: “Contrario na loke e lider di MEP ta bisa, Aruba no ta cana atras riba e tema aki. Al contrario. Aruba ta pais cu a cuminsa prome cu e regla y leynan di integridad aki. Awe nos tin un ley di screening di candidato pa minister. No un desicion gubernamental cu por pone un banda manera MEP a traha. Tin dos concepto di ley pa financiamento di partidonan politico cla. Tur dos ta di e fraccion di AVP. Durante di 8 aña di MEP nan no a ni toca e tema aki. Tin un concepto pa e codigo di conducta pa politiconan. Pa stop e hortamento di asiento tin cu traha un ley of trece cambio den un ley of reglamento di orden existente. E impresion cu ta te ora un ley ta cla bo por haci algo pa mehora comportacion integro tampoco ta corecto. Pasobra paisnan cu tin tur sorto di ley y regla tambe ta sigui haya problemanan di integridad di politiconan. Kier men cu ta serca e politiconan mes e comportacion integro mester cuminsa. Ley y reglanan ta pa desencurasha mal comportacion y encurasha bon comportasion. E impresion cu e lider di MEP kier crea, esta cu durante di e reunionnan di IPKO, Aruba lo a wordo mal mira, critica o acusa di ta riba mal caminda, ta totalmente incorecto. Niun momento y niun caminda esey a sosode. E lider di MEP tin derecho di tin su propio opinion riba tur cos. Pero e echonan y e realidad ta keda loke nan ta. E no por troce e berdad y crea echonan cu no a sosode.”

Expresionnan haci den e articulo aki no necesariamente ta refleha opinion di ArenaPoliti.co