{idkey=5827b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5561-jan-de-ruijter-e-idiotez-berde-di-mike-god-fried-eman-parti-7%3FItemid%3D101][title=Jan+de+Ruijter%3A+E+idiotez+berde+di+Mike+God%28fried%29+Eman+%28parti+7%29][desc=E+%26amp%3Bnbsp%3BOFICINA+%26amp%3Bnbsp%3BSUPER-REPUGNANTE+%26amp%3Bnbsp%3BPA+%26amp%3Bnbsp%3BINOVACION+%26amp%3Bnbsp%3BDI+%26amp%3Bnbsp%3BDISPARATE+%26amp%3Bnbsp%3BDI+%26amp%3Bnbsp%3B%E2%80%9CPREMIER%E2%80%9D+MIKE+EMAN.%26amp%3Bnbsp%3BMI+%26amp%3Bnbsp%3BSTOMA+%26amp%3Bnbsp%3BTA+%26amp%3Bnbsp%3BBIRA%21%26amp%3Bnbsp%3BDespues+cu+-+na+un+manera+trankil+y+hopi+cla+-+%26amp%3Bnbsp%3Bmi+a+caba+di+splica+y+mustra+cu+e+maneho+duradero+di+Mike+Eman+EN+%26amp%3Bnbsp%3BABSOLUTO+%26amp%3Bnbsp%3BNO+ta+un+maneho+ni+duradero+ni+sostenibel%2C+y+cu+ta+unicamente+miseria%2C+fraude%2C+corupcion+y+mal+maneho+duradero+nos+a+sufri+bao+di+%E2%80%9Cpremier%E2%80%9D+Mike+Eman%2C+awor+cu+mucho+gusto+lo+mi+kier]}
E  OFICINA  SUPER-REPUGNANTE  PA  INOVACION  DI  DISPARATE  DI  “PREMIER” MIKE EMAN. 

MI  STOMA  TA  BIRA! 
Despues cu - na un manera trankil y hopi cla -  mi a caba di splica y mustra cu e maneho duradero di Mike Eman EN  ABSOLUTO  NO ta un maneho ni duradero ni sostenibel, y cu ta unicamente miseria, fraude, corupcion y mal maneho duradero nos a sufri bao di “premier” Mike Eman, awor cu mucho gusto lo mi kier sigui cu un tema cu ta relacioná cu e desaroyonan actual, y cu ta un di mi temanan favorito: aki mi ta referi na e asina yamá “Bureau van Innovatie”, unda aparentemente un tal Bianca Peters ta dirigi e circo.
Mi a lesa su articulo den un corant di dia 18 di april ultimo, y di berdad esey a causa cu mi a haya un biramento di stoma.
Con, pa amor di Dios, ta posibel cu Mike Eman –  na un manera sin igual y sin ningun escrupulo - ta distribi e placa di impuesto, cobrá for di hendenan pober di Aruba cu a gana e entrada ey cu sudor di nan frente, na e clase di basura aki, un papiamento sin ningun sentido!

HOTELNAN DI 5 STREA, BARIONAN DI 5 STREA, SCOLNAN DI 5 STREA, CASNAN DI ANCIANO DI 5 STREA!
Bianca Peters, riba nos gasto, a biaha pa Azores (situá full pabao di Portugal!) pa un conferencia internacional riba inovacion; un biahe largo y hopi caro, cu e mester a haci pa motibo di …. “e importancia grandi pa Aruba pa por keda comparti conocimento riba tereno di inovacion y desaroyonan duradero cu bista riba e continuacion di e desaroyo di nos propio economia di conocimento
(“ kenniseconomie”), etc., etc., etc., siguí pa un cantidad di blahblah tocante desaroyo y conocimento duradero, e Tech Lab Mobil, ideanan nobo, y enfoke riba tur sector (enfoke “cross-sectoral”)!
Até ey pues na Azores, dilanti di un sala cu hende kendenan mester a sinta scucha con hopi Aruba a progresá riba tereno di durabilidad y inovacion; e ta pidi e presentenan pa nan sera nan wowo, y pa sinti e ora ey ….. “con olanan chicito, dushi asina, ta mishi, suave asina, na nan pianan, y sinti con e solo ta caricia bo piel, y con e biento ta hunga cu bo cabey, y djey wak e playanan blanco, e palmanan cu ta zoya den aire, y e laman blau di mas bunita cu bo por a yega di weita”.
Den mi bida mi a yega di weita un semehante show di broma y pantomina tempo cu mi tabata cu Holiday Inn; mi ta corda cu un biaha durante un “Management Seminar” a wordo expresa tanto disparate cu mi a hera muri di hari y cu pa e motibo ey mi mester a bandona e sala. Mi NO tabata dispuesto pa sinta scucha e bagamunderia ey, y mi a consideré un insulto, y un perdemento di tempo y di placa!
Pero den e caso di sra. Bianca Peters, e cos aki a bira pret, of mihor dicho: mas serio! Den su trance sra. Peters ta vislumbra un Aruba yen di hotelnan di 5 strea, barionan di 5 strea, casnan pa nos bieunan di 5 strea, scolnan di 5 strea, un hospital di 5 strea, servicio di 5 strea, y un comunidad di 5 strea.
Anto e ora ey pa e bisa: “Bonbini na Aruba”!

MUHER,  MUHER, ESAKI  SI  TA  YAMA  UN  LEMBEMENTO,  PORQUE  YES!
E muher ey di berdad no tin ningun clase di respect propio mas?
Di berdad bo ta di e ciego ey cu bo no ta weita kiko ta e realidad?
Realidad ta cu Aruba tin un producto hotelero completamente anticua, cu no ta pas at all mas den siglo 21, y cu a lo maximo por tin un averahe di 2 y mitad strea; realidad tambe ta cu nos laman na Palm Beach ta completamente sushá, tambe cu nos scolnan y nos enseñanza a ser neglishá y daná a fondo den e ultimo 8 añanan, cu nos cuido medico tambe a ser perhudicá door di un mal maneho di gobierno, cu e casnan di anciano ya no bal ningun cen mas, cu nos barionan ta yen di criminalidad y di gangnan di hobennan, cu servicio na Aruba ta na un nivel sumamente malo, y cu e comunidad Arubano ta hopi cerca di un lantamento, mescos cu ta e caso na Venezuela; e pueblo NO ta tolera tiranonan ni dictadornan mas!l
Ma, señora Peters, ta na unda bo ta biba! Unda bo wowonan ta, bo horeanan, bo tino!
Pero e señora Peters ta florea (“versieren”) e cos aki mas ainda!
Lesa!

TUR  DANKI,  ELOGIO  Y  COMPLIMENT  TA  BAY  PA  NOS LIDER,  NOS  MINISTER-PRESIDENTE
Sra. Peters djey ta duna contesta riba e pregunta di e publico, con por ta cu Aruba ta un prominente den mundo ora ta trata di durabilidad y inovacion, y cu e ta hunga un papel asina ehemplar:
“…tur esaki ta bini danki na nos lider, nos minister-presidente kende ta weita con importante inovacion ta dentro di un desaroyo duradero; y ta p’esey mes Aruba ta e unico pais na mundo cu tin un “Bureau Innovatie” cu ta raporta directamente na dje!”

HOW LOW CAN YOU GO!
Na bon Hulandes: “wat ben je diep gezonken!”
Con un hende por rebaha su mes di e manera ey, djis pa e cay na agrado, y keda na agrado di e pio prome minister cu nos isla a yega di conoce; con bo por lembe asina hopi, y toch cada dia di nobo keda wak bo cara den spiel??
Pero e ta bay bira mas bunita; lesa e siguiente articulo encuanto Peters y su Hackatons!!

E ta sigui!

Jan de Ruijter
This email address is being protected from spambots. You need JavaScript enabled to view it.
presenta na Papiamento pa Remigio A. R. Wever

Expresionnan haci den e articulo aki no necesariamente ta refleha opinion di ArenaPoliti.co