{idkey=2977b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5706-julie-de-cuba-red-red-lo-combati-illegalidad%3FItemid%3D101][title=Julie+de+Cuba+%28ReD%29%3A+ReD+lo+combati+e+fenomeno+di+trahadornan+indocumenta+mihor+conoci+como+illegalnan][desc=]}
Consecuencia di e fenomeno aki ta cu: 

• e ta costa placa, mihor bisa e ta costa pueblo placa;
• e ta daña e mercado laboral;
• e ta fomenta corrupcion;
• e ta crea desbalance riba tur tereno;
• e ta crea e posibilidad pa spart malesa;
• e ta crea criminalidad den forma di hortamento y atraco; 
• Hopi biaha yiunan di illegalnan no ta bai scol; y 
• E ta crea oportunidad pa abusa di hende. 

Illegalnan cu ta bibando y trahando na Aruba no ta respeta nos pais, sino nan lo a drenta na e manera corecto. Pues cu permisonan di trabao y estadia reglá via e departamentonan di gobierno manera ley ta stipula.

Kico ta pasa? Hopi ta paga sumanan halto adicional pa tramita nan papelnan, no di acuerdo cu e proceso reglá den ley. Pues cu otro palabra ta cumpra permiso. Esaki ta fomenta corupcion abiertamente di ambos banda. Di esun cu ta paga y di esun cu ta cobra.

Tin leynan cu ta mará na sancion fuerte (boetnan halto) pa dunador di trabao cu ta emplea trahador illegal. Y e trahador illegal ta wordo deporta bek pa su pais. Prensa ta menciona casonan asina pero nunca pueblo ta lesa si e dunador di trabao a haya boet y cuanto e boet tabata ta. Den caso cu no aplica boet no solamente ta fomenta illegalidad, tambe ta stroba placa (di boet) di drenta caha di gobierno. Y ken ta paga pa pone e persona riba avion y mand'e bek pa su pais? Tur esaki ta costa placa;

Personanan illegal cu mester haya cuido medico automaticamente no ta asegura y no tin forma di paga e gastonan di hospital. Ken ta paga e gastonan aki? Ta nos tur cu ta paga belasting.

Nos tur sa cu un persona illegal lo traha pa cualkier suma, lo traha oranan mucho mas largo y den condicionnan mas deplorabel cu esnan legal. Y dor cu nan ta disponibel doñonan di trabao ta haci mal uso di nan y ta pone nan traha "zwart" pues sin draag af niun premie ni belasting cu ta un atentado contra caha di gobierno. Y otro consecuencia ta cu ta daña e mercado laboral. Den sector di construccion, horeca y ofishinan liber e fenomeno di trahador illegal a zorg pa salarionan y prijsnan instabiel y muchu abou. Salarionan bao minimumloon ta contra ley y ta reduci koopkracht en general di trahadornan den e sectornan aki cu consecuencia cu  gobierno tampoco ta haya placa di BBO den su caha.

Personanan illegal mester biba un caminda. Nan situacion ta pone cu cualkier apartamento, "washok", "schuur" of "chosa" den cura di cas of scondi den mondi ta acceptabel pa nan. Si e departamento di DIP ta haci su trabao di controla lo nan encontra cu e situacionnan aki. Pa no papia mes di belastingdienst y departamento di immigracion. Ta e falta casi total di contol a y ta fomenta illegalidad den area laboral riba nos isla. Malesanan cu ta drenta cu illegalnan cu no ta wordo controla. Ningun gobierno ni geel ni berde a zorg pa tin control. Abuso di e hendenan aki cu no ta na su lugar tampoco. Ningun ley tin peso si no tin control pa asina aplica sancionnan. Pa medio di control y sancion pisa ta crea respet pa nos pais, nos leynan y ta crea screment serca esnan cu ta haci nan mes culpabel na emplea illegalnan y serca tur esnan cu ta saca probecho di esaki. Den un proximo gobierno ReD lo percura pa tur departamento cumpli cu nan tarea principal di eherce control di forma estricto pa combati illegalidad efectivamente.

Julie de Cuba – Candidata pa ReD Democratico – Eleccion 2017

Expresionnan haci den e articulo aki no necesariamente ta refleha opinion di ArenaPoliti.co