{idkey=9708b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6164-eromil-bakmeyer-por-mantelzorg-un-deber%3FItemid%3D101][title=Eromil+Bakmeyer+%28POR%29%3A+Mantelzorg%3A+un+deber%3F][desc=]}Mantelzorg ta ensera e cuido a base voluntario door di un persona na un miembro di famia of otro sernan keri . Esaki por ta e cuido di un anciano of di un persona cu un malesa chronico of terminal of di un persona cu limitacion. Mantelzorg ta sosode ora cu no tin un centro apropia pa tuma e cuido di e ser keri over, ora no tin lugar available den un centro of ora no tin e medionan financiero pa por busca un cuido profesional.

Mantelzorg pa anciano
Na Aruba  e mantelzorg pa anciano ta hopi comun segun  Sr. Bakmeyer. Un partner ta cuida e otro partner biew, un yiu of nieto ta cuida su major of abuelo, un bisiña ta juda un anciano cu ta biba su so y cu no tin famia. Esaki ta wordo hasi for di un sentimento di amor, humanidad of necesidad. Cualkier cu e motibo por ta, e cargo pa e mantelzorger ta uno hopi pisa y uno cu nos no ta pone e debido atencion ariba dje na Aruba.

Cargo pisa pa esun cu ta cuida
Un hende cu ta cuida structuralmente un otro persona ta hañe confronta cu un cargo pisa: e responsabilidad grandi pa e salud y bienestar di e persona cu e ta cuida (mientras e mes no tin un educacion medico), e peso financiero cu ta bin hopi biaha cu cuida un hende, e peso emocional di ta bezig cu henter ora cu un otro hende (hopi biaha a costo di bo mesun bienestar) y e peso fysico cu hopi biaha ta grandi pasobra mester hisa, carga of juda un hende cu no por juda su mes. Pa no papia mes di e peso cu ta bin ora e mantelzorger tin su mesun famia y trabao pa take care di dje, aparte di cuida pa un ser keri.

E mantelzorger mes mester ajudo
Na Aruba nos tin masha tiki atencion pa e mantelzorger, nos no ta sostene e mantelzorger den su trabao voluntario y tampoco nos ta ripara ora esaki ta bira dimas pa e persona. Segun Sr. Bakmeyer, e mantelzorger por haña un burnout, bira depressief, hanja kehonan fysico y emocional. Esaki por conduci tambe na cu e mantelzorger, cu a cuminsa porta e trabao voluntario cu hopi amor, ta end op ta resenti e persona cu e ta cuida. Esaki por hasta hiba e mantelzorger pa comete abuso verbal, emocional y físico contra e persona cu e ta cuida.

Pesei nos mester zorg pa tin un infrastructura adecua cu ta sostene e mantelzorger den su trabao, por ehempel cu guia medico of por medio di un consulent specialisa den mantelzorg, cu praatgroepen di mantelzorgers caminda por intercambia experiencianan y duna otro tips y sosten, cu enfermero specialisa cu por remplasa e mantelzorger ora esaki mester un break of ta malo of kier bai cu vakantie y asina por nombra hopi mas manera cu por sostene un mantelzorger.

Mantelzorg ta un deber?
Sr. Bakmeyer ta finalisa bisando: Den mi articulo anterior tocante vergrijzing na Aruba, mi a indica cu den e añanan cu ta bin nos poblacion di anciano lo crece grandemente. Si nos no zorg pa tin e infrastructura adecua cu suficiente centro di cuido pa anciano y suficiente personal cualifica pa duna cuido, nos lo wak e fenomeno di mantelzorg crece tambe grandemente. Caminda antes porta mantelzorg ta wordo hasi mas a base voluntario, e lo bira un deber. Pa evita esaki nos mester actua awor.

Cu bo sosten, mi lo traha pa implementa e parti reglamentario y di infrastructura pa nos POR tin aki na Aruba mas centronan di cuido pa anciano y tambe pa nos POR duna mas sosten profesional na esnan cu lo keda eherce e trabao voluntario di mantelzorger pa un of otro motibo. Un voto pa mi, Eromil Bakmeyer, lo ta uno tambe pa mehora e calidad di cuido pa un mihor calidad di bida pa nos grandinan!

Expresionnan haci den e articulo aki no necesariamente ta refleha opinion di ArenaPoliti.co