{idkey=7544b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5708-parlamentario-mr-juan-e-thijsen-mep-avp-ta-traha-lista-di-29-nomber-pero-ora-di-yena-vacaturanan-ehecutivo-ta-resulta-cu-ningun-candidato-riba-e-lista-tin-capacidad%3FItemid%3D101][title=Parlamentario+mr.+Juan+E.+Thijsen+%28MEP%29%3A+AVP+ta+traha+lista+di+29+nomber+pero+ora+di+yena+vacaturanan+ehecutivo+ta+resulta+cu+ningun+candidato+riba+e+lista+tin+capacidad][desc=]}
Segun Parlamentario mr. Juan E. Thijsen Aruba completo por a tuma nota cu Partido AVP no por cumpli cu su tareanan ehecutivo for di su 29 candidatonan. AVP ta traha lista di 29 nomber pero ora di yena vacaturanan ehecutivo ta resulta cu ningun candidato riba e lista tin capacidad. E ultimo temporada di gobernacion esaki a sucede mas di un biaha. Ta un tradicion politico na Aruba cu e dos partidonan grandi ta entrega un lista di 29 candidato mientras partidonan chikito ta lucha pa cera por lo menos 10 candidato riba lista. Por constata cu AVP no tin problema pa yena 29 (cantidad) pero si tin problema cu calidad. AVP ta traha lista di 29 nomber pero AVP no ta partido di 29 candidato capacita y ta parachuteer "pinch hitters" experto. Segun Parlamentario mr. Juan E. Thijsen e conclusion aki nos por saca for di e hecho cu partido AVP no a haya candidatonan capacita pa yena e funcion di Minister di Finansas y Organisacion gubernamental y Ministro di Economia y Comunicacion. Den ambos caso partido AVP mester a recuri na personanan cu no tabata riba nan lista politico di eleccion 2013 pa yena e vacaturanan di Ministro. E prome cu a drenta ta senjor Angel Bermudez cu a bin reemplasa Juan David Yrausquin despues cu Yrausquin a ricibi e humiliacion politico di mas grandi di nos historia politico. Angel Bermudez a bira Minister di Finansas y Organisacion Gubernamental. Recientemente ta senjor Richard Arends kende a bin reemplasa Otmar Oduber kende a tuma retiro pa lanta su mesun partido despues di laga sa cu Mike Eman no ta sirbi como lider ni di AVP ni di nos pais. Richard Arends a bira Ministro di Economia y Comunicacion. Segun Parlamentario mr. Juan E. Thijsen hasta den e caso di Minister di Asunto Social, Hubentud y Labor Paul Croes atrobe AVP no ta apunta un Minister temporario for di nan lista di 29 sino ta opta pa duna Angel Bermudez e cartera di Asunto Social, Hubentud y Labor mientras cu Angel Bermudez no a bai riba e lista di AVP pa eleccion 2013. Segun Parlamentario mr. Juan E. Thijsen pueblo por mira cu actualmente tin no menos cu 7 cartera ta cai bao personanan cu no tabata riba e lista di candidatonan pa eleccion pa AVP. E 7 carteranan aki ta Finansas, Organisacion, Economia, Comunicacion, Asunto Social, Hubentud y Labor. Fuera di e posicion di Ministro tambe ta asina cu na dos ocasion Gobierno di AVP no a nombra un Ministro Plenipotenciario for di nan lista di candidatonan pa eleccion. Tanto Edwin Abath como Alfonso Boekhoudt a worde apunta como Ministro Plenipotenciario sin a bai eleccion. E Ministro Plenipotenciaro actual Juan David Yrausquin si a bai eleccion pero na caminda a tuma su retiro di AVP despues di su humiliacion antes menciona. Tur e hechonan aki segun Parlamentario mr. Juan E. Thijsen ta haci cu pueblo no por confia AVP cu su lista di berdad ta consisti di hendenan capacita manera nan ta propaganda. Partido AVP no ta sincero. Parlamentario mr. Juan E. Thijsen ta pidi pueblo pa ta bon na alerta di movecionan politico y vota pa un lista di hendenan cu si tin capacidad pero tambe tin responsabilidad y sinceridad y esey sigur bo ta hayele cu Partido MEP. Aruba merece miho. Hunto p'e cambio. 

Expresionnan haci den e articulo aki no necesariamente ta refleha opinion di ArenaPoliti.co