{idkey=666b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6170-fundacion-nos-ta-aruba-kehonan-a-base-di-derecho-penal-contra-ministernan-de-meza-y-eman%3FItemid%3D101][title=Fundacion+Nos+Ta+Aruba%3A+Kehonan+a+base+di+derecho+penal+contra+ministernan+De+Meza+y+Eman][desc=]}
Fundacion “Nos Ta Aruba” ta informa cu dia 31 di juli 2017 un denuncia y un keho formal a ser entregá na Ministerio Publico cu e peticion pa un investigacion penal contra minister di Finanzas Mike de Meza y minister di Asuntonan General, Michiel G. Eman, esaki en coneccion cu e contract di hedging, e famoso y notorio “hedging contract”.

Durante e periodo di gobernacion entre 2009 y 2013, de Meza kende e tempo ey tabata encargá cu Finanzas, Comunicacion y Companianan di Utilidad (“Nutsbedrijven”), a sera un “hedging contract” na unda Valero a ser poní un banda, pues na unda Valero no a ser envolví y no a participa at all, pero na unda al contrario un organisacion nobo a ser encargá cu e compra di tur e crudo cu Pais Aruba tabatin mester (su “behoefte”), y subsecuentemente cu e benta (“doorverkoop”) na Pais Aruba.

E procedura normal, comun y coriente ora cu mester “hedge” (cumpra y reserva), tabata cu unicamente 10% di locual tabatin mester na crudo, tabata ser ge-“hedged”, pero pa 10 luna so, y esaki tabata socede pa minimalisa e riesgo di un aumento di e prijs; sinembargo, kiko a socede??
E organisacion nobo a “hedge” 100 porciento di locual tin mester na crudo, y a haci esaki pa colmo pa un periodo di 3 aña, y, imaginabo!, na momento cu 1) e prijs mundial di crudo tabata na 90 dolar pa barí, y cu 2) tabata conocí tur caminda cu e prijs di crudo lo a baha, entre otro pa motibo di e cantidad enorme di azeta den e subsuelo  (e “schali-nan”) den Norte America, y e cantidad di publicacionnan tocante e exploracion y e explotacion di esakinan.

E organisacion nobo “in between” (e “tussen”-organisatie; comparé cu e conocido “stroman”) tabata cumpra e crudo na e prijs mundial di dia (dia di e compra) - cu, manera ta conocí, a baha te na 30 dolar pa bari - pa despues bende e mesun crudo aki cu Pais Aruba na e prijs di 90 dolar pa bari, un prijs mará na 3 aña!!
Bo ta comprende awor cu e hedging aki kier meen cu a compremete Pais Aruba pa durante minimo 3 aña tuma y paga e crudo na e prijs di 90 dolar pa bari, aunke e prijs riba mercado mundial mes ta(bata) rond di 30 dolar!!!

Cu tur razon comunidad p’esey ta puntra (cuestiona) cua tabata e organisacion cu tabata cumpra e crudo na e prijs di dia abao (di rond di 30 dolar!), pa subsecuentemente bende esaki cu Pais Aruba na e prijs di 90 dolar pa bari; cua – of mihor dicho: KENDE – tabata e organisacion aki, y pakiko e organisacion ey a ser lantá den tanto purá?!; kendenan ta su doñonan, kendenan ta su directornan y su comisarionan; y kiko ta socede cu e ganashi entre e prijs di benta di 90 dolar y e prijs cu a paga p’e, tempo cu a cumpré riba mercado mundial, esta 30 dolar?! Pues: unda e “ganashi” di 60 (sesenta!) dolar pa bari a bay??!!.

E “hedgingcontract” hopi cuestionabel aki a wordo tení secreto pa hopi tempo, y su existencia a bira conocí nomas despues di hopi presion publico, banda di e preguntanan pakiko e tarifanan di electricidad riba Aruba tabata keda asina halto, no obstante e prijs mundial di e crudo cu tabata keda baha!!

Riba dia 28 di juni ultimo Fundacion Nos Ta Aruba a pidi minister De Meza pa mustra tur e documento- y contractnan relevante, basá riba e LOB (“ Lands-verordening Openbaarheid van Bestuur”), AB 1999 no. 12, LOB Art. 2 jo art. 4, lid 1, sub a.), recordando de Meza cu, a base di un veredicto di Huez di dia 20 di januari 2014 (LAR nr. 1506 di 2013), TUR  CIUDADANO por haci un peticion pa haya informacion, y cu no ta existi ningun obligacion cu esun cu ta haci e peticion, mester tin un interes personal y particular pa por haci e peticion!  
Minister De Meza a nenga di cumpli, no solamente cu dicho “Landsverordening”, pero tambe cu e veredicto di huez, di mesun manera cu anteriormente minister–presidente Mike Eman y minister di Husticia Arthur Lawrence Dowers  ya caba NO a respeta y NO a tene nan mes na e leynan LOB, den e casonan di Juan Sebastiaan Saldarriago, y e instalacion di camaranan nobo di seguridad y vigilancia na KIA door di SafeCom N.V.

Fundacion Nos ta Aruba p’esey tambe ta haci un peticion na Ministerio Publico pa  haci un investigacion penal di e hedging contract aki, y di e compranan di e crudo cu Aruba tin mester, na razon di e prijs mundial abao di crudo, y e benta cu ta sigui na Pais Aruba na e prijs halto “ge-hedged” di 90 dolar pa bari.
Di acuerdo cu expertonan, aki ta trata di un suma di 365miyon (365.000.000,00) dolar pa cuenta di e comunidad Arubano; un suma asina grandi ta “bale la pena” investiga!!

Riba henter Aruba ta existi e temor hustificá cu e ministernan contra kendenan mi ta haci e denuncia aki, tin interesnan prohibí y ilicito den e organizacion nobo, y cu ilegitamente nan ta saca probecho di esaki, sea directamente of via miembronan di famia.
Ta existi indicacionnan y sospechonan serio di corupcion oficial (“ambtelijke corruptie”), gañamento intencional y deliberá, faborecimento ilegitimo, fraude cu impuesto, y labamento di placa.

E hecho cu e ministernan aki ta nenga di eherce cualkier forma di transparencia, y cu nan ta nenga di tene nan mes na nan obligacion di duna informacion, hasta cu nan a nenga di reconoce existencia di e “hedging contract” aki, y tampoco kier a comparti esaki cu e Parlamentarionan Arubano, mester ta bastante motibo pa Ministerio Publico cuminza cu un investigacion!
Pasobra ta berdad toch cu tur cos ta mustra cu hopi asunto ta keda mantení secreto y scondí, y cu nan MESTER keda secreto y scondí!!!

E minister di Asuntonan General no solamente ta personalmente envolví y implicá den e asunto aki, pero tambe e ta e prome responsabel den esey!!  
Ta E personalmente ta dirigi toch tur locual tin di haci cu medio ambiente y cu durabilidad, y fuera di esey ta E ta e prome y ultimo, pues e UNICO responsabel pa henter e maneho di su gobierno, sigur den asuntonan di un magnitud asina impactante y cu tanto posibel/probabel consecuencia!  

Pa termina y pa ta completo: e denuncia aki ta tambe dirigí na tur esnan envolví y e faborecidonan/privilegiadonan.

Stichting Nos Ta Aruba
Jan de Ruijter, Voozitter
Montana 28-Z
E: This email address is being protected from spambots. You need JavaScript enabled to view it.
M: (+297) 739-9241

Anexo: Denuncia di dia 31 di juli 2017

Expresionnan haci den e articulo aki no necesariamente ta refleha opinion di ArenaPoliti.co