{idkey=3584b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5647-rudy-richardson-mep-e-gabinete-mas-peor-den-nos-historia-marca-cu-e-maneho-mas-desastroso-di-mike-de-meza%3FItemid%3D101][title=Rudy+Richardson+%28MEP%29%3A+E+Gabinete+mas+peor+den+nos+historia%2C+marca+cu+e+maneho+mas+desastroso+di+Mike+de+Meza][desc=Ta+di+lamenta+e+desaster+ocasiona+pa+Gabinete+Mike+Eman+I+y+II+pero+si+mester+pone+enfasis+riba+e+Ministerionan+di+Mike+de+Meza+en+particular.+E+politico+aki+tabata+esun+cu+mester+a+reduci+e+discrepancia+social+economico+di+e+districto+di+San+Nicolas+compara+cu+e+resto+di+Aruba.+Un+area+di+Aruba+cu+MEP+semper+a+duna+debido+atencion.+E+logronan+di+MEP+pa+e+districto+di+San+Nicolas+ta+sumamente+largo+y+mi+ta+kere+cu+nos+conciudadanonan+sa+esaki+tambe.+Como+un+ciudadano+cu+stima+e+pais+aki+y+como+p]}
Ta di lamenta e desaster ocasiona pa Gabinete Mike Eman I y II pero si mester pone enfasis riba e Ministerionan di Mike de Meza en particular. E politico aki tabata esun cu mester a reduci e discrepancia social economico di e districto di San Nicolas compara cu e resto di Aruba. Un area di Aruba cu MEP semper a duna debido atencion. E logronan di MEP pa e districto di San Nicolas ta sumamente largo y mi ta kere cu nos conciudadanonan sa esaki tambe. Como un ciudadano cu stima e pais aki y como politico desde 2001 mi mester keda informa nos digno pueblo debidamente. 

Clientelismo 
Minister di Finansa desde 2009-2013, Mike de Meza a logra di ta un vote getter den e eleccion ey y a redobla nos debe nacional den apenas 4 aña, algo cu NIUN gobierno a haci den 23 aña di nos Status Aparte. E Minister hunto cu Prome Minister Mike Eman a cumpra centenares di voto via Clientelismo y fabornan politico hamas bisto. MEP a laga 970 miyon florin den caha di Gobierno y GE I y II a haya 2.7 biyon florin extra desde 2009. Den e prome 4 añanan Mike de Meza no a logra nada riba tereno financiero economico, alcontrario nos refineria a dal cera na 2012 y San Nicolas a muri un morto natural. Gobierno a keda cu 3 miyon inhusto di pueblo atraves di loonbelasting. Despues cu Gobierno di AVP a sconde e rapport desastroso di IMF riba e MEGADEBE di AVP, pueblo a bolbe duna AVP sosten y e destruccion a sigui di 2013-2017. 

E drama a sigui
Minister di Economia y tur compania estatal di Gobierno, Mike de Meza a sigui destrui pais Aruba. Bao di su maneho WEB N.V. a hedge perhudicando nos pueblo pa mas di 300 miyon florin den reduccion di awa y coriente pero esaki no a caba aki. A saca 17 miyon di florin pa duna un compania priva pa traha un supuesto Ecogas cu awe ta bancarota y no tin NIUN balor agrega pa e pueblo di Aruba. SETAR N.V. tambe a wordo perhudica bao di Mike de Meza cu 30 miyon florin. E drama ta sigui cu mudamento di waf sin e transparencia debido y ta perhudicando nos economia, unda cu desde 2015 no tin crecemento economico. Dump na Parkietenbos hunto cu su ex-coordinador cu a bira awo su contrincante politico, esta Sr. Allan Howell (POR), awe nos pueblo ta sufri di salud door di e mal maneho di Mike de Meza  y logicamente Mike Eman como Prome Minister.

Mega manipulacion
Lotto pa Deporte a wordo buta plat y awo no tin placa pa deporte Arubano y hasta kier bin cu medida riba e bendedornan di Lotto despues cu a duna Banco di Canada tur e ganashi. Nos no mester lubida e fiesta di Alarma di cas pa varios amigo liga na Mike de Meza y su ex colega Otmar Oduber (POR) cu tambe a haya un sistema di alarma via Lotto pa Deporte. Si esaki no tabata suficiente Mike de Meza a negocia e deal di nos refineria cu Citgo/PDVSA hunto cu su coordinador cu awe ta Minister di Economia y Comunicacion Richard Arends. Un otro desaster y mega manipulacion pa haya simpatia na September prome cu e desaparece por completo di e panorama politico di Aruba. Nos tur sa cu e deal aki ta na fabor di Mike de Meza y su stromannan y contra interes di nos pueblo.

Settlement agreement
Tambe e Settlement agreement di Mike de Meza ta un fracaso total y e transshipment tabata contra interes di nos pueblo. A haya apenas 60 miyon cu e Settlement Agreement, anto e environmental claim Aruba a bolbe perde esaki. Un garantia multi miyonario duna na Citgo sabiendo cu nos finanzas publico ta na werki.Tabata un alrededor di 900 miyon, anto Mike de Meza y mas cu claro Gobierno a acepta algun miyon. Un berguensa pa yama e hendenan aki nos gobernantenan. Set di bende patria unda interes special ta domina tur decision. Tambe e dumpmento di asbest door di e refineria den cercania di Fortheuvelstraat ta un abuso di marca mayor ya cu e efectonan dañino di e asbest aki tin su efectonan negativo pa cu salud di e habitantenan bibando den e area ey. Mike de Meza no por keda un dia mas como minister pero sigur e gobierno di AvPor di Mike Eman mester bay cas y no bolbe nunca mas.

Trece cambio necesario
MEP ta trahando duro bao liderasgo di Sra. Evelyn Wever Croes pa trece un cambio necesario pa salba Aruba. Nos ta luchando duro pa Aruba no wordo destrui completamemte door di AVP y nan aliado POR cu ta un verlengstuk di partido AVP. E daño ocasiona pa Mike Eman lo dura te 2057 pa drecha, pero MEP tin un programa di Gobernacion dinamico pa duna tur hende nan calidad di bida atrobe. Den e siguiente simannan mi lo enfoca riba esakinan y den bishitanan di cas boso sirbidor lo amplia riba solucionnan pa nos problemanan actual y proyectonan pa San Nicolas. Ban hunto p'e cambio September 22, 2017. Mi ta conta cu boso sosten pa trece e cambionan aki den e siguiente periodo di Gobernacion despues di e TSUNAMI di Mike Eman y su man drechi Mike de Meza, e WARWARU cu a laga San Nicolas plat.

Expresionnan haci den e articulo aki no necesariamente ta refleha opinion di ArenaPoliti.co