{idkey=1426b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5559-booshi-wever-upp-upp-den-preparacion-pa-eleccion-na-september-proximo%3FItemid%3D101][title=Booshi+Wever+%28UPP%29%3A+UPP+den+preparacion+pa+eleccion+na+september+proximo][desc=+Desde+su+fundacion+na+2012%2C+UPP+a+prepara+un+manifiesto+cu+yama+%E2%80%9CProyecto+Nos+Patria%E2%80%9D%2C+cu+ta+inclui+e+puntonan+di+salida+di+nos+partido.+For+di+e+manifiesto+aki+a+desaroya+e+programa+di+partido+y+e+puntonan+di+accion+pa+eleccion+2013.+Despues+di+4+a%C3%B1a+di+gobernacion+Mike+Eman+II%2C+keto+bay+mayoria+di+e+programa+tin+su+validez%2C+mirando+cu+no+a+bin+ningun+mehoracion+den+e+situacion+na+Aruba.+Cambionan+fundamental+nos+no+a+mira%2C+y+mas+bien+nos+por+bisa+cu+Aruba+y+su+pueblo%2C+a+keda+bay+atras]}
Desde su fundacion na 2012, UPP a prepara un manifiesto cu yama “Proyecto Nos Patria”, cu ta inclui e puntonan di salida di nos partido. For di e manifiesto aki a desaroya e programa di partido y e puntonan di accion pa eleccion 2013. Despues di 4 aña di gobernacion Mike Eman II, keto bay mayoria di e programa tin su validez, mirando cu no a bin ningun mehoracion den e situacion na Aruba. Cambionan fundamental nos no a mira, y mas bien nos por bisa cu Aruba y su pueblo, a keda bay atras. 

Nos por mira un finanzas publico mas deterioria. Nos por mira nos autonomia cu a wordo comi na dje. Mientras cu nos seguridad social y nos seguridad personal a bay mas atras. Nos enseñanza no ta hayando e atencion cu e merece. Nos medio ambiente ta wordo destrosa bou di capa di un maneho “green”, mientras nos terenonnan ta wordo haci negoshi cu nan sin ningun misericordia. Tambe falta di ley y maneho di medio ambiente ta haci tambe cu e.o. tin rozamento, kapmento di mata y creacion di dumpnan ilegal, mientras cu proyecto di dump a wordo boycotea cu consecuencia pa e habitantenan di e bario di Parkietenbos. Di otro ban corupcion ta na orden di dia, na unda te hasta un minister na e momentonan aki ta bou investigacion, mientras cu nos Parlamento ta fayando completamente den su trabou di controla gobierno. Parlamento, e representacion di nos pueblo, a para bira un berguensa pa nos pueblo, cuminsando na  nan comportacion. 

Pues pa UPP ainda hopi di e puntonan cu a wordo treci como parti di su programa pa eleccion 2013, ainda ta valido. Hasta nos por bisa cu nan ta mas valido cu nunca. Pesey tambe UPP na e momentonan aki ta den e proceso di revision y ta finalisando di e manera aki su programa pa eleccion 2017. Cu ayudo di personanan cu conocemente den nos comunidad riba temanan principal, lo bin varios ampliacion riba e programa.
UPP ya caba na comienzo di aña a mustra riba 4 puntonan principal cu UPP ta kere cu mester wordo atendi den e 4 añanan venidero. Esakinan ta Bon Gobernacion (Good Governance), Educacion, Husticia y Seguridad, y tambe Integracion, na cua ta agrega e di 5 punto cu e ta e situacion di nos medio ambiente. E puntonan aki ta esencial si nos di berdad kier saca nos Aruba for di e abismo cu nos aden. E puntonan aki ta importante si nos kier cambia e sfera di antagonismo y di impotencia cu nos ta biba aden.  Tur esakinan nos por alcansa patrioticamente den un sfera di unidad, creando asina e progreso pa un y tur.

Pues partido UPP, na e momentonan aki ta den preparacion pa eleccion di september proximo, na unda nos pueblo lo mester bay scohe e proximo Parlamento pa e periodo 2017 – 2021. Banda di ta den preparacion di e programa, UPP ta den proceso di combersacion cu diferente posibel candidatonan, cu lo mester bay transmiti e ideanan y programa di nos partido. Esaki no ta un proceso facil, mirando cu hopi hende sea tin miedo pa drenta politica, otro no tin confianza den nos sistema politico ni e nivel di hiba politica y otronan ta spera di haya un oportunidad riba partidonan grandi y cu placa, particularmente mirando cu tur ta claim cu nan ta bay pa mayoria.
UPP kier ta cla y raspa den esaki, cu na prome lugar, salbacion di e pais aki ta un gobierno di coalicion basa riba un mayoria cualifica, esta di 14 asiento. UPP ta carece di e fondonan pa por haci e fanfaria cu partidonan grandi y tradicional ta haciendo, esta den cada skina un oficina, partimento di sticker y mas na granel, pegamento di bandera y borchinan,ya caba 6 luna prome cu eleccion y sin conta e fiestanan cu ya ta wordo teni. UPP ta kere den un campaña di informacion y cu un minimo na budget pa costonan basico di campaña. Eleccion no ta un fiesta pa biba lubida riba nos problemanan, sino eleccion ta un momento di reflexion riba e rumbo cu bo pais ta aden y kico nos kier pa pais aki. Eleccion mester ta un momento solemne, unda cu abo como votador so cu Dios den e hokki di votacion.

Den cuadro di preparacion di e programa di gobernacion, UPP ta habri pa sugerencia y comentarionan. Por bay riba nos website y wak e programa di 2013 y asina bisa nos kico falta.
Tur esnan cu kier drenta den contacto cu nos partido, pa duna sugerencia of sostene nos partido, of cu ta interesa pa join UPP activamente, of cu kier duna un aporte financiero (di acuerdo cu nos reglanan di statuut), por tuma contacto cu nos por medio di nos e-mail This email address is being protected from spambots. You need JavaScript enabled to view it. of inbox nos riba nos pagina di facebook. Tambe por tuma contacto cu nos na 593-2287 of 567-3439. Tur comentario of sugerenica ta bon bini.


Den nomber di Partido Patriotico Progresista – U.P.P.
Lider di Partido
Booshi  Wever
8 di mei 2017

Expresionnan haci den e articulo aki no necesariamente ta refleha opinion di ArenaPoliti.co