{idkey=7609b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4605-elton-lioe-a-tjam-abo-campana-miyonario-y-di-bling-bling-a-cuminsa-pero-di-unda-e-placa-ta-bin-no-ta-interesa-hopi%3FItemid%3D101][title=Elton+Lioe-A-Tjam+%28ABO%29%3A+Campa%C3%B1a+Miyonario+y+di+Bling+Bling+a+cuminsa.+Pero+di+unda+e+placa+ta+bin%2C+no+ta+interesa+hopi%21][desc=Desde+Status+Aparte%2C+mas+y+mas+placa+ta+wordo+gasta+na+campa%C3%B1anan+politico+di+e+partidonan+tradicional.+Miyones+ta+wordo+gasta+na+bandera%2C+promocion%2C+jingle%2C+T-shirt%2C+fiesta+di+carnaval+y+cumpramento+di+voto.+Tur+pa+sigui+convence+%28manipula%29+pueblo+cu+e+%E2%80%98men+y+women+at+work%E2%80%99%2C+ta+haciendo+un+%E2%80%98Bon+Trabou%E2%80%99.+Awendia+e+la+yega+asina+leu+cu+si+un+partido+politico+no+tin+un+of+mas+emisora%2C+planta+di+television%2C+corant%2C+ofrece+fiesta+di+carnaval+na+tur+skina+of+miyones+pa+cumpra+voto%2C+pa+un+par]}
Desde Status Aparte, mas y mas placa ta wordo gasta na campañanan politico di e partidonan tradicional. Miyones ta wordo gasta na bandera, promocion, jingle, T-shirt, fiesta di carnaval y cumpramento di voto. Tur pa sigui convence (manipula) pueblo cu e ‘men y women at work’, ta haciendo un ‘Bon Trabou’. Awendia e la yega asina leu cu si un partido politico no tin un of mas emisora, planta di television, corant, ofrece fiesta di carnaval na tur skina of miyones pa cumpra voto, pa un parti di e electorado e partido no ta interesante. Awendia si un partido politico no por duna e mesun parti aki di e electorado ‘algo’ pa su voto, e no ta haya su voto. Ta tristo pa constata cu nos democracia a wordo reduci na ‘haya cos’, sin cuestiona cuanto esaki ta costa e sociedad na final. Pues ki prijs tur hende tin cu paga, pasobra algun hende a wordo cumpra pa ‘cos’.

Cuanto biaha bo no ta scucha un hende bisa cu e ta leal na un partido, pasobra e la haya un cas social, un pida tereno, un trabou of cu un permiso a wordo ‘regla’ p’e? Cuanto biaha bo no ta scucha un hende bisa cu e ta keda fiel na un partido, pasobra su famia ‘semper’ a vota pa e partido ey den bon of malo? Cuanto biaha bo no ta scucha un hende bisa cu e ta pega na un partido, pasobra e of un familiar di dje ta un coordinador? Pues un lealtad infinito, pasobra ‘algo personal a wordo haya’. Cu otro palabra asuntonan manera di integridad, calidad di gobernacion of e bienestar general, no ta hunga un rol mas. Hasta algun hende tin e tendencia pa lubida, of wak e otro banda, cuanto destruccion a of ta wordo haci pa e politico tradicional na e isla, pasobra den pasado e la haya ‘un cos’ of e tin e speransa cu e biaha aki si e lo haya ‘un cos’. Tin politiconan tradicional cu a wordo condena, pero cu awendia ta ‘honorabel’ miembro.

Partidonan politico tradicional ta gana eleccionnan cu yen plan, promesa y solucion, pero ora nan drenta gobernacion poco di esaki ta wordo realisa. Pero siguiente eleccion, un parti di pueblo ta lubida esaki, e circulo di ripiticion (wega di ping pong) ta sigui. Resultado despues di 30 aña di politico tradicional, Aruba ta bancarota, e MEGADEBE di 2013 a wordo REDOBLA na 2016 cu entre otro e ‘CITGO-deal’, segun e minister di Infrastructura tin solamente 1000 tereno pa 11.000 hende cu ta inscribi, un desempleo halto, ‘cheap labor’ y un insiguridad y criminalidad halto. Pero keto bay tin hende cu no kier mira e amargo realidad aki y ta prefera di wordo ‘tuma haci’ atrobe pa e politico tradicional, mientras cu e grupito privilegia ta bira mas miyonario.

Tambe awendia algun partido tradicional no tin bisa pueblo kico e la logra durante e ultimo añanan, pasobra e por sigui pronkia cu plumanan di estadistanan grandi di pasado pa tapa su deshabilidad. Y esun cu no tin un estadista grandi pa uza, ta simplemente cambia e historia pa crea un mito di grandeza. Esaki a conduci cu awendia debatenan politico ta wordo enfoca riba kende a enrikece su mas den pasado, pa hustifica un acto actual di corupcion y hortamento publico. Esaki a conduci cu awendia un parti di pueblo ta mara na e candidato ‘popular’ cu a dun’e un ‘cos’ y no mas na ideologia of principio. Esaki a conduci cu awendia un politico cu a milita pa casi 30 aña den un partido tradicional, y cu si e la haya su kier ainda e lo tabata forma parti di dje, por simplemente bisa cu e la ‘lanta for di soño’, mester bin un ‘cambio’ y awor si e lo bay traha na bienestar di pueblo. Anto, pueblo tin cu lubida cu pa casi 30 aña, e tambe tabata  coresponsabel pa e destruccion cu Aruba conoce awe. Di esakinan tin actualmente dos!

Boca yen cu palabranan bunita di integridad y transparencia, pero pasa e ley riba financiamento di partidonan politico, lubida! Pues pueblo, prepara bo mes atrobe pa e mesun storianan, promesanan, mentiranan y partimento di ‘cos’ cu bo placa, pa e grupito politico privilegia por sigui keda na poder y asina sigui enrikece su mes y destrui Aruba mas riba bo costo. Campaña y promove bo mes cu placa di otro hende, ta facil. Hasta un mucha di 5 aña por gasta placa di otro hende. Esaki no ta dificil y e no ta nada special. E ta bira algo special, pero tambe repudiabel, ora un persona por ripiti esaki cada biaha y ainda laga algun hende kere cu esaki ta algo bon, pa progreso y bienestar general.

Un politico tradicional a yega di bisa: ‘Ta ora un politico corta un cinta di un proyecto, ta e ora ey e votonan ta drenta’. Pues pa bo mira con e politico tradicional ta percibi democracia. Campaña Miyonario y di Bling Bling a cuminsa. Pero di unda e placa ta bin, no ta interesa hopi!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co