{idkey=1629b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5623-jan-de-ruijter-e-maneho-insostenibel-di-ensenanza-di-avp-e-aankomende-verliezers-partij-partido-perdedor-den-proximo-eleccion-parti-2%3FItemid%3D101][title=Jan+de+Ruijter%3A+E+maneho+insostenibel+di+ense%C3%B1anza+di+AVP%2C+e+aankomende+verliezers+partij+%28partido+perdedor+den+proximo+eleccion%29+%28parti+2%29][desc=ENSE%C3%91ANZA+%26amp%3Bnbsp%3BRIBA+%26amp%3Bnbsp%3BARUBA%26amp%3Bnbsp%3BNos+tur+sa+masha+bon+mes+cu+cosnan+ta+hopi+tristo+cu+ense%C3%B1anza+riba+Aruba%2C+y+cu+no+ta+un+opcion+pa+sigui+den+e+rumbo+aki.%26amp%3Bnbsp%3BDia+22+di+september+proximo+mester+pone+un+paro+na+e+maneho+horendo+y+politiz%C3%A1+riba+Aruba%2C+y+mester+bini+un+maneho+visionario%2C+cu+mester+hiba+ense%C3%B1anza+riba+Aruba+den+siglo+21.+E+curiculo+di+schoolnan%2C+nos+ense%C3%B1anza%2C+e+condicion+fisico+di+nos+schoolnan%2C+e+mal+mantenimento%2C+e+clasnan%2C+e+falta+di+material%2C+e+cantidad+di+%E2%80%9Cdrop-ou]}
ENSEÑANZA  RIBA  ARUBA 
Nos tur sa masha bon mes cu cosnan ta hopi tristo cu enseñanza riba Aruba, y cu no ta un opcion pa sigui den e rumbo aki. 
Dia 22 di september proximo mester pone un paro na e maneho horendo y politizá riba Aruba, y mester bini un maneho visionario, cu mester hiba enseñanza riba Aruba den siglo 21.
E curiculo di schoolnan, nos enseñanza, e condicion fisico di nos schoolnan, e mal mantenimento, e clasnan, e falta di material, e cantidad di “drop-outs”, becadonan (studiantenan cu un “beurs”) mal prepará, tur esaki ta mesun tristo. 
E ultimo 8 añanan enseñanza riba Aruba a keda para keto, y nos tur sa cu para keto kier meen bay atras y decae. 
E calidad di nos enseñanza MESTER subi. Mester yega na decisionnan pa resolve e problemanan cu tin den enseñanza; ta unicamente 8% di e poblacion di Aruba a sigui enseñanza na nivel di HBO of di universidad, y termina esaki tambe; unicamente 10% di e studiantenan ta yega na un diploma pa e estudio cu nan a escohe originalmente, y mas di 70% no ta yega na ningun diploma! 
P’esey NO ta un opcion pa sigui di e manera aki!

Tur caminda, tanto den gobierno como den empresanan den sector privá, cosnan ta bayendo robez, simplemente pasobra no tin specialistanan, no tin gerentenan, no tin hendenan pa lidera y pa duna guia, no tin specialistanan cu preparacion halto, no tin expertonan ni profesionalnan.
Ta p’esey tin asina un desorden y porkeria den nos industria y comercio, pero tambe den hopi departamento y servicio di gobierno.
Aruba NO tin un bon infrastructura di bon cader cu preparacion halto!
Atrobe: tur cos ta cuminza den, y cu enseñanza, y nos enseñanza ta fayando!!

Of mihor bisá, gobierno ta percura masha bon mes pa nos enseñanza faya, pa e simpel motibo cu AVP ta di opinion cu nan por keda na mando mas facilmente cu un poblacion ignorante, pensando cu, pasobra nan, gobierno, ta forma parti di e clase “halto” (“Patriciërs” y “Nobelitas”) di Oranjestad, nan ta kere cu nan por  controla e plebeyonan (ciudadanonan insignificante) y e hendenan di cunucu y di mondi, y tenenan contento y bao di nan dominio, cu cualkier trabao chicito, pan y weganan, of tambe cu bebida, DJ-nan y fiestanan.

Y  KIKO  PA  PENSA  DI  E  PLEITONAN  ENTRE  MIKE EMAN Y  MICHELLE  HOOIJBOER!!
Nos tur tambe ta consciente di e hecho cu Aruba de facto NO tin un gobernacion  actualmente; pa hopi tempo caba Mike Eman no ta un minister-presidente di berdad, pasobra e otro ministernan ta ignoré completamente, y ta burla di dje y ta harié “vierkant” den su cara!
Asina mi sa tambe cu Mike Eman y adjudant Bart Kool ta loco pa weita “opvang” despues di oranan di school den tur bario di Aruba, pa di e manera ey trata y deal cu e problema di e ”sleutelkinderen”  (hobennan cu treimerdia ta yega cas for di school - un cas bashí sin un mayor, pasobra ambos ta traha - di manera cu e hobennan aki mester busca moda di ocupa nan mes sin supervision di e mayornan), y tambe cu e problema di e  “hangjongeren” (muchanan cu ta ferfela nan mes, y pasobra nan no tin nada di haci, ta bay keiro y “lepia” den vecindario, y cu ta para cla pa drenta den cualkier gang pa motibo di e ferfelamento ey y di no tin ningun animo den nada). 
Ta conocí cu hopi biaha e muchanan aki ta coy un caminda robez den bida!

Pero, Michelle Hooijboer no ta nada di acuerdo cu esaki, y pa e motibo ey e cos aki no ta socede tampoco!
Michelle Hooijboer di un banda, y Mike Eman cu Bart Kool di otro banda ya caba tabatin pleito grandi encuanto e nombracion di un rector nobo pa Colegio Arubano, y e caso ey lo a bay dilanti huez, y despues Bart Kool hasta mester a renuncia di su posicion como presidente di SMOA.
Si abo como ciudadano ta lesa y ta experiencia tur esey, lo bo mester pensa toch: “ki un set di amateur, ki un set di idiotanan estupido!”
Y eseynan ta esunnan cu mester guia nos enseñanza pa drenta siglo 21? 
Pero… e cos aki ta bira mas tristo ainda!! 
MIKE Y  BART  KIER  HACI  UN  DEAL  CU …. MAURICE  DE  HOND,  UN  DI  E  CHARLATANNAN  (GAÑADOR  Y  ESTAFADOR) MAS  REPUDIABEL    Y  MENOS  CONFIABEL  DI  HULANDA!!
Manera mi a mencioná anteriormente caba, Mike Eman ta haci magia y cu e palabranan “hocus pocus pilatus pas” ta tover tur sorto di solucionnan sabí y bibo  for di su sombre halto di mago, manera “duradero, sostenibel, 5 strea, conocimento, inovacion y hubs”, y awor ta bini acerca un palabra nobo, esta:
SCHOOLNAN  “STEVE JOBS”
Sí, bo ta lesa bon! Mike Eman y Bart Kool ta na punto di sera un contract super caro cu Maurice de Hond pa reforma un cierto cantidad di school riba Aruba den asina yamá schoolnan “Steve Jobs”, e school iPad, e concepto di Maurice de Hond kende por cierto na Hulanda ta conocí como un di e estafadornan, charlatannan, y fraudeurnan di mas grandi; y aki mi ta quote for di e medianan Hulandes: “Maurice de Hond KA CHING”, locual kier meen: “Maurice de Hond CASHT IN”. 
Su metodo no tin ningun base; fundador Maurice de Hond tin un interes comercial den e exito di e apps cu e ta entrega como parti di su programa; e ta forza e maestronan pa sigui cursonan caro pa nan por wordo permití pa carga e logo “not-for-profit”, y e entrada ey e ta hinca den su propio saco.
E ta tover y cambia e school basico den un sorto di zoologico: esunnan interesá mester paga 80Euro pa dia pa nan bin wak con yiunan di otro ta hunga cu nan   iPad-nan.
Hecho number 1: e metodo NO tin NINGUN base!
E klas awor en adelante yama “tayer” (“atelier”), unda e “coach” (tuma nota cu e maestro ta desaparece) hunto cu e mucha (“scholier”) ta traha un plan, y unda e mucha un biaha den 6 siman hunto cu e coach ta discuti e resultado, e “output”.
E tayernan aki ta wordo clasificá di acuerdo cu e materia. Pues alumnonan di diferente edad ta cana casi dal den otro. Si esey bira di mas pa nan, nan por bay sinta descansa den e asina yamá “cubicles”.
Un biaha pa luna nan ta organisa un “Game Day”, unda muchanan di tur e gruponan ta bay “bringa” otro, tanto den e mundo fisico como den e mundo virtual.
Ta zona un poco straño, pero e calidad ta wordo garantisá door di – bo a rei bon - Maurice!

Proximamente mi ta bay sigui cu e nonsensenan absurdo grandi di Mike y Bart, y nan schoolnan “Steve Jobs” riba Aruba.
No lubida di lesa esey, pasobra e cos aki ta priminti di bira cos di hari y yen di carcahada. Mi ta garantisabo esey!

Jan de Ruijter
This email address is being protected from spambots. You need JavaScript enabled to view it.
trecí na Papiamento door di Remigio A. R. Wever

Expresionnan haci den e articulo aki no necesariamente ta refleha opinion di ArenaPoliti.co