{idkey=3683b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5875-rene-herde-avp-bisa-pueblo-kico-ta-e-consecuencia-di-boso-idea%3FItemid%3D101][title=Rene+Herd%C3%A9+%28AVP%29%3A+%E2%80%9CBisa+pueblo+kico+ta+e+consecuencia+di+boso+idea%E2%80%9D][desc=]}
Rene Herdé na MEP: Sea honesto cu Pueblo. 

MEP a presenta un amienda den pura durante di e reunion di Parlamento pa baha e edad di penisoen y subi e suma di pensioen mensual. Sin duda un deseo bunita di hopi hende. Pero ora a pidi e lider di MEP pa bisa con e ta bay realisa e deseo aki su contesta tabata ‘unda tin un deseo ta haya un solucion!’ E no por a bisa con e ta bay haci’e. E no por a bisa con ta bay paga pe. E no por a bisa ken ta bay paga pe. E no por a bisa pa cuanto tempo e ta bay bahe. Pa un aña? Dos aña? Anto despues mester his’e atrobe? 

Miembronan di fraccion di AVP a insisti pa haya un contesta, pero e lidernan di MEP no por y no kier a duna un contesta. Anto e lider di MEP mes ta un experto riba e tereno aki cu a conseha gobierno di MEP den pasado pa hisa e edad di penisoen den menos tempo na 65 aña, pasobra e fondo no lo por a garga e peso di e pago di pensioennan mas. Awe e mes un lider di MEP ta priminti di baha e edad di penisoen, pero no kier bisa pueblo con. Cu otro palabra e kier haci pueblo votado contento cu un idea, pero sin bisa con e ta bay haci’e. Den asuntonan asina serio, bo mester bisa con, sino e ta nada mas cu un promesa bashi di campaña, djis pa gana voto.

DESEO y CONSECUENCIA 
Rene Herdé di e fraccion di AVP a bisa e lider di MEP, cu por baha e edad di pensioen, pero nan tin cu bisa pueblo kico lo ta e consecuencia pa pensionadonan, pa trahadornan y pa companianan. Rene Herdé: “Si. Boso por baha e edad di penisoen. Pero boso mester ta honesto cu pueblo y bisa tambe kico ta e consecuencianan di boso idea. Boso mester bisa aserca, manera e expertonan ta mustra, cu e consecuencianan di boso idea lo ta cu e trahadornan actual y companianan lo mester bay paga hopi mas prima pa paga e pensioen. Of e lo nifica cu e pensioen cu pensionadonan ta cobra awe lo mester baha. Mescos cu a sosode na Corsow. E pensionadonan lo cobra menos na penisoen tur luna. Of un combinacion di tur e medidanan aki. Pero bisa pueblo cu ta Pueblo mes lo mester bay paga pa esaki den forma di medida!” Pero te na fin di e reunion niun di e tres miembronan di MEP cu a bay traha awe, no a duna un splicaicon di con lo bay paga pa e idea aki. Den tur idea of plan mester mustra con ta bay paga pa nan. MEP sinembargo kier lansa e plan, pero no ta honesto cu pueblo y no kier bisa pueblo kico e consecuencianan lo ta pa pueblo mes!

Expresionnan haci den e articulo aki no necesariamente ta refleha opinion di ArenaPoliti.co