{idkey=6007b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5567-otmar-oduber-por-descentralisa-y-habri-e-mercado-medico-ta-cambionan-cu-partido-por-ta-para-p-e%3FItemid%3D101][title=Otmar+Oduber+%28POR%29%3A+Descentralisa+y+habri+e+mercado+medico+ta+cambionan+cu+partido+POR+ta+para+p%E2%80%99e][desc=E+aspecto+di+salubridad+ta+un+di+aspectonan+cu+a+mira+den+e+diferente+encuentronan+cu+tabatin.+Diferente+grupo+cu+a+reuni+cune+y+tur+e+%E2%80%98polls%E2%80%99+cu+ta+wordo+haci+a+presenta+salubridad+den+e+top+3+preocupacionnan+di+nos+comunidad.+Salubridad+ta+keda+un+dolor+den+nos+comunidad+pa+loke+ta+trata+e+calidad+cu+ta+wordo+ofreci+den+cierto+sector+di+dje%2C+como+tambe+e+servicio+cu+ta+wordo+brinda.+Hopi+ta+esunnan+cu+ta+%E2%80%98kremencha%E2%80%99+y+spaar+e+placa+cu+nan+no+tin+pa+nan+por+bay+busca+un+%E2%80%9Csecond+opinio]}
E aspecto di salubridad ta un di aspectonan cu a mira den e diferente encuentronan cu tabatin. Diferente grupo cu a reuni cune y tur e ‘polls’ cu ta wordo haci a presenta salubridad den e top 3 preocupacionnan di nos comunidad. Salubridad ta keda un dolor den nos comunidad pa loke ta trata e calidad cu ta wordo ofreci den cierto sector di dje, como tambe e servicio cu ta wordo brinda.

Hopi ta esunnan cu ta ‘kremencha’ y spaar e placa cu nan no tin pa nan por bay busca un “second opinion” of un servicio medico den exterior pa motibo di e calidad cu ta wordo sirbi den cierto sector den salubridad aki na Aruba. E no ta un secreto cu lista di espera ta pa bo por haya un specialista y pa bo haya servicio medico ta demasiado largo. Por ehempel, grandinan cu tin operacion di catarata ta warda mas cu 1 aña, cual ta inacceptabel, bou di e excusa cu no tin sala di operacion of cu no tin suficiente medico. Asina ey den diferente ramo di specialisacion bo ta mira cu tin necesidad grandi pa por tin mas competencia den comunidad y mas opcion pa e paciente. No solamente pa wordo cubri pa AZV, pero cu tambe na un forma priva por haya e oportunidad di keda na Aruba y haya medicina cu ta mas na e calidad di bida cu nos tin aki na Aruba. 

Puntonan di atencion cuido medico 
A base di esaki, nos plataforma a identifica diferente punto cu mester wordo atendi cu nan den e proximo eleccion, pero 3 cu sigur ta resalta na e momentonan aki ta: Habri e mercado medico. Permiti oportunidad di escogencia pa e paciente aki na Aruba y no mar’e unicamente na un cierto cantidad limita di specialistanan cu tin aki na Aruba. Percura cu hobennan di Aruba cu a studia y mediconan di region por traha akinan na Aruba. E BIG Arubiano mester wordo introduci y no tin tempo mas pa warda riba esaki. Esaki ta un decision cu lo tuma den e prome 100 dianan di e proximo gobierno despues di september 22. Hobennan cu studia den region lo por traha aki na Aruba contrario di loke ta e caso na e momentonan aki. A base di e mercado cu ta habri aki, ta fomenta hopi mas dokter aki na Aruba como escogencia y menos tempo di espera.

Otro punto cu ta resalta ta descentralisa cuido medico na Aruba. Fomenta oportunidad pa clinicanan rond nos hospital y rond Aruba, caminda ta permiti partnership tuma luga sea ta inversionistanan of dokternan local, cu partnership di afo of riba nan mes. Brinda oportunidad pa tin clinicanan cu tecnologia/ekipo moderno pa por brinda e comunidad un oferta local  en bes di cu cada biaha hendenan mester bay den exterior. ‘Nos no por keda mara mas na e unico servicio cu hospital kier duna of loke ta permisibel den e presupuesto di hospital pa duna como servicio,’ Otmar Oduber ta enfatisa.

Tambe lo introduci un colegio di conseho di calidad den salubridad. Esaki ta nifica cu AZV mester keda un instancia cu ta ehecuta un maneho cu mester wordo determina pa un colegio cu ta fiha e calidad di salubridad cu nos kier na Aruba. No por ta asina mas cu e servicio medico of e calidad medico na Aruba ta mara na kico AZV lopor cubri mediante e sumanan cu e tin. Mester fiha kico ta e minimo necesario cu por tin den calidad y den servicio medico na Aruba y a base di esey ta tuma e decision di con bo salubridad ta wordo midi y ehecuta door di un organo manera AZV.

Berdad inverisonan a wordo haci den hospital pa cual e ta mas grandi y bunita, pero e pregunta ta si a mehora e servicio pa e paciente den e hospital. E pregunta ta si tin e personal necesario pa por duna servicio conforme hospital y si tin e fondonan disponibel pa por brinda e servicio aki. Ta yega un momento cu salubridad publico di Aruba mester wordo mehora y mester por crea e confiansa bek den comunidad cu nos hendenan ta kere y ta ‘willing’ pa uza y sinti comodo cu e servicio di calidad medico na Aruba.

En corto esakinan ta algun punto directo di atencion cu POR ta trece dilanti di cual varios di nan ta decisionnan cu mester tuma luga dentro di e 100 dianan di gobernacion sin cu esaki mester costa mas placa. Tambe lo percura cu tin fondo di prevencion (cual aworaki tin 0 aden), pues lo percura pa tin campañanan di prevencinon pa malesanan cu por wordo evita. Tambe lo percura pa Aruba tin un canasta basico cu productonan saludabel cu ta yuda den mantencion di un bida mas sano na Aruba, lider di e partido a conclui.

Expresionnan haci den e articulo aki no necesariamente ta refleha opinion di ArenaPoliti.co