{idkey=7342b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5771-dangui-oduber-mep-85-di-nos-pueblo-kier-mira-e-politico-cu-mas-voto-den-parlamento-di-aruba%3FItemid%3D101][title=Dangui+Oduber+%28MEP%29%3A+85%25+di+nos+pueblo+kier+mira+e+politico+cu+mas+voto+den+Parlamento+di+Aruba%21][desc=]}
Recientemente un encuesta politico a wordo haci pa Noticiacla y Doc opleiding y un di e preguntanan tawata relaciona cu e cambionan di e kiesverordening manera a wordo proponi. Promer cu e concepto di ley aki a wordo entrega mi a tene masha hopi conversacion cu masha hopi ciudadano. Mi a bishita masha hopi cas y 9 di cada 10 persona cu mi tawata tene dialogo cune tawata trece dilanti cu nan kier mira e politico cu mas voto den parlamento di Aruba.

E resultado di e encuesta ta cuadra cu pensamento di pueblo pasobra e resultado ta mustra hopi cla cu 85% di nos pueblo ta dese di mira e politico cu mas voto den parlamento.

Manera ta conoci e concepto di ley aki a wordo entrega for di luna di maart 2017 y esaki a wordo haci pa tin suficiente tempo pa e ley encamina e proceso cu tur ley mester cana pa asina e por yega bek parlamento pa e wordo trata. Na momento cu e concepto di ley a wordo entrega esaki a wordo manda Raad van Advies cu na su turno a manda e contestanan y sugerencianan bek pa Parlamento di dia 10 mei 2017. Dia 30 di mei 2017 tur preguntanan y sugerencianan di Raad van Advies a wordo contesta. Na e momentonan aki presidente di parlamento mester yama un reunion di commission central pa asina fiha un fecha pa tur miembro di parlamento por haci pregunta riba e ley di iniciativa aki. Te cu dia di awe ainda presidente di parlamento NO kier yama e reunion aki y asina ta mustra cu e NO kier y NO ta dipsuesto pa trata e ley aki promer cu eleccion. Mi ta bolbe haci un apelacion na presidente di parlamento pa cumpli cu deseo di pueblo y scucha pueblo su voz y yama e reunion di comision central pa despues yama e reunion publico pa asina nos por yega na un votacion pa pueblo wak cua politico kier un ‘’lift’’ y cua politico di berdad ta traha pa por yega di ta un representante di pueblo.

Nos ta sinti cu fraccion di AVP no kier pa e ley aki wordo trata pasobra nan ta contra e ley aki pasobra tur kier yega den parlamento sin mester traha pa nan votonan. Esaki no ta husto y ta contra deseo di pueblo!

Siman pasa nos tawata presente den sala di parlamento pa por pone e puntonan aki riba agenda y esaki a wordo rechasa. Nos a manda un email pa presidente di parlamento cu e apelacion pa tene e reunion y te dia di awe e mail no a wordo contesta cual nos ta lamenta e actitud aki di corre pa responsabilidad!

Nos ta mantene speransa cu ley aki lo bira un realidad promer cu eleccion dia 22 september 2017.

Expresionnan haci den e articulo aki no necesariamente ta refleha opinion di ArenaPoliti.co