{idkey=6276b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5867-karel-maduro-mep-un-voto-pa-avp-ta-un-voto-pa-leoncita-famia-arends-y-continuacion-di-corupcion%3FItemid%3D101][title=Karel+Maduro+%28MEP%29%3A+Un+voto+pa+AVP+ta+un+voto+pa+Leoncita%2C+famia+Arends+y+continuacion+di+corupcion][desc=]}
Pueblo di Aruba, na Colombia varios aña atras tabata tin un lema cu ta bisa cu un dollar pa narco trafico ta un dollar pa FARC. Gobierno a lansa un campaña specialmente pa conscientiza e pueblo cu si nan mester hinca placa den narco trafico, nan lo ta hincando placa den FARC. Un organizacion cu ta encarga su mes cu secuestra hende, terorismo y matamento di miles di hende.

Na Aruba ta e mesun caso si pueblo vota pa AVP dia 22 september venidero. Votando pa AVP, bo ta zorg pa corupcion di tur índole keda na bida. Muy en particular corupcion den cual Leoncita y famia Arends ta meti. Aki bo por papia di un grupo di probechador, mal usando nan influencia riba e integrantenan di AVP, convertiendo asina nan mes como complice total den un practica di corupcion. Esun mas famoso ta e corupcion cu bendemento di terenonan publico. Tur hende na Aruba sa con esaki tabata sosode. Leoncita y of un familiar ta habri un companía nobo na KvK. Informacion di terenonan disponibel ta wordo pidi door di Leoncita na coordinadornan di e minister di infrastuctura. Cu e informacion Leoncita ta manda pidi e minister pa e tereno riba nomber di e companía nobo. E minister ta firma cu di su banda ta ok. Leoncita na su turno ta ofrece y bende e companía nobo cu e peticion firma pa e minister pa 700.000 florin of mas. Despues ta parti e placa entre tur esnan envolví.

Na di dos lugar ta e hecho cu tur e proyectonan grandi di gobierno mester wordo haci door di contratistanan liga na Leoncita y famia Arends. Proyectonan manera Caya Betico Croes, (caya grandi), Green Corridor (twee baansweg) y Watty Vos Boulevard. Si no ta direct ta indirect, pero ta e Arends nan so tin cu gosa di e placa envolví. Naturalmente e minister mester haya y e otro coordinadornan tambe. 

Algo cu pueblo di Aruba en general a kere AVP completamente den dje ta e cabaynan di campaña 2009 y 2013 cu ta: AVP ta contra Friends & Family, AVP ta bay kita HUUR, AVP ta bay habri Bushiri Hotel y drecha tur e edificionan bashi, transparencia gubernamental, baha criminalidad, combati corupcion (WODC rapport) etc etc. Cuanto di e cabaynan di campaña AVP a logra cumpli cu ne? 

Friends & Family ta mas halto cu nunca (Leoncita y famia Arends). Huur ta 22 miyon na 2017 compara cu 17 miyon na 2009. Bushiri Hotel ta cera keto bay y como muestra di incapacidad, AVP kier bash’e abao tambe. Casi tur edificio bashi ta bashi ainda. No tin transparencia gubernamental, prueba ta Hedging na WEB y e Citgo Deal (quickscan). Criminalidad ta mas halto cu nunca antes y atraco ta na moda.

Pueblo di Aruba, manera na Colombia un dollar pa narco trafico ta un dollar pa FARC, asina na Aruba un voto pa AVP ta un voto pa Leoncita, famia Arends y continuacion di corupcion. Abo kier esaki pa Aruba?

Expresionnan haci den e articulo aki no necesariamente ta refleha opinion di ArenaPoliti.co