{idkey=1251b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5653-jan-de-ruijter-un-maneho-di-ensenanza-berdaderamente-duradero-di-un-gobierno-nobo-despues-di-dia-22-di-september-2017-parti-4%3FItemid%3D101][title=Jan+de+Ruijter%3A+Un+maneho+di+ense%C3%B1anza+berdaderamente+duradero+di+un+gobierno+nobo+despues+di+dia+22+di+september+2017+%28parti+4%29][desc=ENSE%C3%91ANZA+DURADERO+Y+EXITOSO%3F%3F%26amp%3Bnbsp%3BATA+E+RECETA+DI+E+DOKTER+AKI%3A%26amp%3Bnbsp%3B1.+INSPRAAK+%28participacion+activo%2C+contribuyendo+den+tuma+decisionnan%29.No+impone+y+dicta+for+di+ariba%2C+pero+%E2%80%93+mediante+%E2%80%9Cinspraak%E2%80%9D+di+maestronan%2C+profesornan+y+docentenan+%E2%80%93+yega+na+un+maneho+nobo+pa+loke+ta+trata+curiculonan+uniforme+pa+schoolnan%2C+normanan+y+exigencianan+pa+admision%2C+enlace+%28%E2%80%9Caansluiting%E2%80%9D%29+cu+e+estudionan+despues+%28%E2%80%9Cvervolgstudies%E2%80%9D%29+na+schoolnan+pa+ense%C3%B1anza+superior+%28%E2%80%9Chogeschool%E2%80%9D%29+y+unive]}
ENSEÑANZA DURADERO Y EXITOSO?? 
ATA E RECETA DI E DOKTER AKI: 

1. INSPRAAK (participacion activo, contribuyendo den tuma decisionnan).
No impone y dicta for di ariba, pero – mediante “inspraak” di maestronan, profesornan y docentenan – yega na un maneho nobo pa loke ta trata curiculonan uniforme pa schoolnan, normanan y exigencianan pa admision, enlace (“aansluiting”) cu e estudionan despues (“vervolgstudies”) na schoolnan pa enseñanza superior (“hogeschool”) y universidadnan; idioma di enseñanza; estudionan despues den exterior, financiamento di estudio y su pago back; planificacion pa termino largo; seleccion di e cuerpo di maestro y maestra, profesornan, docentenan; remuneracion (salario), digitalisacion, y modernisacion di enseñanza, etc., etc.

2. E MISION.
E “I.Q.”, e Intelligentie Quotiënt (nivel di inteligencia) total (of averahe) riba Aruba mester subi: ta solamente 8% di nos poblacion a sigui enseñanza riba nivel HBO (Hoger Beroeps Onderwijs) of universitario, y a termina esaki cu exito tambe. Y esaki no ta suficiente pa abastece e sectornan publico y privá cu suficiente gerentenan, lidernan y dirigentenan.
Personanan sensato y cu bon preparacion ta forma un mihor comunidad!

3. SIGUI E “MODELO FINLANDES”. 
splicacion: e asina yamá “Modelo Finlandes”/”Fins-model” ta hopi bon conocí den circulonan di enseñanza; e sistema di enseñanza na Finlandia ta basá riba atrae y pre-selecta maestronan y profesornan for di e studiantenan di mas sobresaliente na schoolnan. Eseynan ta wordo acercá y invitá pro-activamente pa bay traha como maestro y profesor den servicio di gobierno, y pa eynan busca nan carera. Nan ta wordo pagá hopi bon tambe, y e ta un profesion di hopi respet y prestigio. Pa Aruba, algo asina den futuro ta hopi necesario.

Den algun palabra:
Selecta delantá for di e mihor studiantenan, e futuro generacion di maestronan, profesornan y docentenan.
Atrae y gara e mihor alumnonan den enseñanza VWO, pa e profesion di profesor y docente.
Haci di enseñanza un profesion fantastico.
Selecciona pro-activamente, manera China ta pre-selecciona su “turnsters” (gimnastanan) ya caba cu nan 6 aña di edad, of manera e ekipo di football “FC Barcelona” ta selecciona su hungadornan estelar ya caba for di muchanan chicito.

4. SCHOOLNAN BASICO AMPLIO (BREDE BASISSCHOOL). 
Mester duna enseñanza no solamente den materianan concreto y “hardcore” (materianan concreto manera geografia, historia, Ingles, Hulandes, etc.), pero tambe den asuntonan cu ta toca e ser humano mes, manera formacion, norma- y balornan humano, comportacion social y decente, bon manera, bon ciudadania, bon estilo di bida y manera di biba, con pa come saludabel y biba bon, sentido tanto di bon empleado como di bon empresario, di manera cu schoolnan por entrega jovennan bon prepará y bon formá na e comunidad.

5. CURICULO UNIFORME. 
Tur school riba Aruba mester tin un vision claro como direccion y guia, y adaptá nan mes continuamente na e necesidadnan di e studiantenen, e mayornan y e comunidad.
Materianan nobo:

1. e mundo for di e “Big Bang” te cu e cosmos (universo), un combinacion di geografia, historia y religionnan mundial, y conocimento di e cosmos pa por conoce y comprende e actual mundo complicá. (The Big Bang: e explosion enorme cu segun scientificonan a tuma lugar un 16miljard aña pasá y cu a producí gasnan hidrogeno/waterstof cu a bula bay den tur direccion, y unda universo cu miyones di constelacion di strea/sterrenstelsel a ser creá.)
2. introduccion di e idioma Mandarino como opcion.
3. introduccion di e materianan “Management” (gerencia) y “Ondernemen” (emprende) pa tur; por lo demas weita e conseho final enseñanza Hulandes 2032 (“Eind- advies Nederlands Onderwijs 2032”).

6. FORMACION PROFESIONAL Y CONOCIMENTO PROFESIONAL.
Pa esunnan cu no ta continua na un school cu enseñanza superior (hogeschool) of un universidad, e formacion profesional mester ser drechá di tal manera cu e nivel, y e evaluacion y aprecio pa cu conocimento di e ramo (vakmanschap) berdaderamente honesto y orguyoso, ta subi te yega e nivel cu un bon conocimento di e ramo merecé, di manera cu compañeronan orguyoso den e ramo por bay hunga un rol berdaderamente apreciá den nos comunidad. Esey ta encerá tambe hopi mas atencion pa nos EPI totalmente bandoná y descuidá, unda cu lo por haci y logra asina hopi mas.
For di experiencia personal mi sa con intensamente tristo y abao e nivel di Ingles ta bao di e alumnonan di entre otro nos propio EPI cu tin e idioma Ingles como e “voertaal” (idioma den cua nan ta expresa nan mes y ta comunica cu otro), y ta papia esaki hopi malo, y ta scirbié mas pio ainda ….. con e ora ey lo bo por siña den idioma Ingles!?
Pero cu Michelle Hooijboer ta preocupá su mes pa esey? Lubidá!

7. HAVO Y VWO 
Mester hisa e normanan y e exigencianan di admision pa por conecta cu (aansluiten op) estudionan cu ta sigui (vervolgstudie) na schoolnan pa enseñanza superior (hogeschool) y universidadnan Hulandes, y di mes manera hisa tambe e exigencianan pa e calidad di e profesornan!
Lagami duna un anecdota tristo: un dama ex-profesor di Hulandes di Colegio ta scirbimi cu palabranan manera “ik vindt”, pues cu “dt”, y “te aller tijd” na lugar di “te allen tijde”…..ya, si un hende asina duna les di Hulandes…e ora ey su alumnonan lo no logra nada..…pero esaki lo por tin di haci cu dunamento di les door di maestronan NO-diplomá na Colegio, di cua tanto a wordo scirbí den e ultimo lunanan?
En todo caso: di e manera aki NUNCA nos lo por logra!!

8. UNIVERSIDAD DI ARUBA 
Den e ultimo 8 añanan tristemente masha poco a tuma lugar, ni a logra, cu henter e asunto (issue) di acreditacion di e diferente direccion (ramo) di estudio (studie-richting) di e Universidad di Aruba, mientras esey semper ta un prioridad absoluto!

Invitacion 
No perde e ultimo parti den e serie aki tocante nos enseñanza, unda mi lo bini cu algun recomendacionnan mas.

Ta asina dificil e cos aki ta, esta locual mi a trece dilanti?
Absolutamente cu no! Goberna y dirigi of maneha bon ta HOPI mas facil cu goberna y dirigi of maneha malo.
Nomas e stress y e critica riba mal gobernacion!.….Pakiko no hacié bon for di un comienzo, esey ta MUCHO mas facil toch?!
Ponemi corda expresion di un docente tempo di mi tempo: “waarom gemakkelijk, als het moeilijk kan!”

Jan de Ruijter
This email address is being protected from spambots. You need JavaScript enabled to view it.
producí na Papiamento pa Remigio A. R. Wever

Expresionnan haci den e articulo aki no necesariamente ta refleha opinion di ArenaPoliti.co