{idkey=1740b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5593-parlamentario-mr-juan-e-thijsen-mep-economia-di-malo-pa-pio-bao-avp-y-e-unico-luz-den-horizonte-ta-un-gobierno-di-mep-pa-un-maneho-economico-efectivo%3FItemid%3D101][title=Parlamentario+mr.+Juan+E.+Thijsen+%28MEP%29%3A+Economia+di+malo+pa+pio+bao+AVP+y+e+unico+luz+den+horizonte+ta+un+gobierno+di+MEP+pa+un+maneho+economico+efectivo][desc=Parlamentario+mr.+Juan+E.+Thijsen+a+tuma+nota+di+confirmacion+cu+economia+di+Aruba+bao+AVP+ta+bayendo+di+malo+pa+pio.+Rapport+di+Banco+Central+di+Aruba+ta+indica+cu+e+pronostico+economico+di+gobierno+di+AVP+cu+lo+tabata+di+tin+un+crecemento+economico+tanto+na+2015+como+2016+a+resulta+incorecto.+Pa+2015+Banco+Central+ta+publica+un+crecemento+economico+negativo+pa+2015+esta+di+-0%2C5%25+di+GDP+mientras+pa+2016+Banco+Central+ta+publica+un+crecemento+economico+di+-+0%2C2%25+di+GDP.+Segun+Parlamentario+mr.+J]}
Parlamentario mr. Juan E. Thijsen a tuma nota di confirmacion cu economia di Aruba bao AVP ta bayendo di malo pa pio. Rapport di Banco Central di Aruba ta indica cu e pronostico economico di gobierno di AVP cu lo tabata di tin un crecemento economico tanto na 2015 como 2016 a resulta incorecto. Pa 2015 Banco Central ta publica un crecemento economico negativo pa 2015 esta di -0,5% di GDP mientras pa 2016 Banco Central ta publica un crecemento economico di - 0,2% di GDP. Segun Parlamentario mr. Juan E. Thijsen ta importante pa tuma nota di esaki pasobra anja aden anja afo por tende alabanza den reunion publico cu cos ta bon cu economia di Aruba, pero e berdad semper ta alcansa e mentira y awor nos por mira cu e buya di crecemento economico di parti di AVP tabata un nubia di aire. E situacion ta bira mas dramatico ora tende cuenta cu un publicacion cu a caba di sali indicando e projecto di Citgo lo ta bai tin retrazo. "The launch of work to revamp Aruba's mothballed 280,000 b/d refinery has been delayed by eight months to July 2017, pushing back a planned restart to 2020 from an original target date of 2018, the Dutch-controlled island's central bank said today". Parlamentario mr. Juan E. Thijsen a tuma nota cu Ministro Richard Arends a sali caba desmenti cualkier retrazo y ta spera cu no tin retrazo pero e gobierno di Mike Eman a demonstra cu nan no ta di confia. Cualkier retrazo tin consecuencia grave pa Aruba. Segun Parlamentario mr. Juan E. Thijsen ta bon conoci cu tur cifra presenta pa gobierno di Aruba den nan maneho financiero ta basa riba un reapertura di e refineria riba termino corto. Esey kier men cifranan y pues cubrimento di gastonan ta sufri retrazonan cu consecuencia cu gobierno mester busca otro forma pa cubri su deficitnan y por significa mas medida na caminda.

No solamente gobierno ta hayele den problema sino full e sector priva ta bin den problema ora cu e projecto di Citgo ta haya retrazo na unda empleo ta haya retrazo y comercio rond di e refineria tambe ta haya golpi. Segun Parlamentario mr. Juan E. Thijsen ta bisto cu e gobierno di AVP ta den problemanan serio pa cu nos economia y pio ainda no tin luz na horizonte cu e gobierno aki mas. Turismo no a yega e 1.5% di GDP di crecemento cu gobierno ta calcula y apesar di e refineria, cu of sin atrazo, Aruba su economia bao AVP no ta duna e crecemento economico cu e compromisonan grandi di nos pais ta exihi. E unico luz na horizonte ta un victoria electoral di partido MEP pa introduci un maneho creativo y agresivo pa diversifica y stimula nos economia efectivamente ariba termino cortico, mediano y largo plaza. E maneho aki lo mester bai yega na un crecemento economico mucho mas halto cu gobierno di AVP ta ofrece pa anja pa Aruba por sali for di tur su problemanan. Segun Parlamentario mr. Juan E. Thijsen e ta un meta dificil pero cu boluntad y capacidad Aruba lo logra. Su persona y partido MEP ta cla pa e reto. Aruba merece mihor. Hunto pa e cambio.

Expresionnan haci den e articulo aki no necesariamente ta refleha opinion di ArenaPoliti.co