{idkey=3509b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4072-banco-central-expectativa-economico-pa-2016%3FItemid%3D101][title=Banco+Central%3A+Expectativa+Economico+pa+2016][desc=Awe+Banco+Central+di+Aruba+%28BCA%29+a+publica+e+revision+di+%E2%80%98Economic+Outlook%E2%80%99+2016.+E+publicacion+aki+ta+inclui+un+actualisacion+di+e+desaroyo+economico+y+proyeccionnan+pa+2016.+Un+resumen+di+e+desaroyonan+mas+importante+ta+wordo+presenta+aki.Basa+riba+e+revision+di+data+den+Augustus+2016%2C+economia+di+Aruba+ta+proyecta+pa+expande+%28den+termino+real%29+cu+0%2C4+porciento+den+2016%2C+impulsa+door+di+inversionnan+grandi+planea+pa+cu+e+trabounan+pa+converti+e+refineria+den+un+%E2%80%9Cupgrader%E2%80%9D+door+di+CITGO]}
Awe Banco Central di Aruba (BCA) a publica e revision di ‘Economic Outlook’ 2016. E publicacion aki ta inclui un actualisacion di e desaroyo economico y proyeccionnan pa 2016. Un resumen di e desaroyonan mas importante ta wordo presenta aki.

Basa riba e revision di data den Augustus 2016, economia di Aruba ta proyecta pa expande (den termino real) cu 0,4 porciento den 2016, impulsa door di inversionnan grandi planea pa cu e trabounan pa converti e refineria den un “upgrader” door di CITGO. E efecto positivo presumi di e actividadnan aki lo wordo mitiga, sinembargo, door di un prestacion lento anticipa cu lo persisti durante e aña den e exportacion di servicionan di turismo, manera midi door di entradanan di turismo. E ultimo desaroyo aki tambe ta e factor principal pa e revision mas abou di e proyeccion di GDP anterior cu 0,7 punto di porcentahe.

Inversion tambe lo probablemente accelera ora algun proyecto di infrastructura grandi, cu a cuminsa na 2015, continua mas fuerte den 2016. Apesar di e empuhe adicional di empleo relata na e reapertura di e refineria, consumo ta premira di contribui den un manera limita na crecemento economico, reflehando parcialmente un sentimiento cauteloso di consumidornan y e caida premira den entrada disponibel relata na e prestacion desfavorabel den e sector turistico. Di otro banda, pa 2016 ta proyecta un deflacion di 0,8 porciento, causa door di bahada den tarifa di coriente y prijs di gasoline, como tambe presion limita di productonan cu no ta relata na energia.

E balansa di pago ta proyecta pa registra un surplus den 2016, debi na un saldo positivo riba e cuenta capital y financiero, parcialmente mitiga door di un deficit riba e cuenta coriente. E fluho di divisanan mas grandi lo ta di entrada di turismo, inversion directo di exterior, y prestamo di gobierno di Aruba den exterior. Consecuentemente, e nivel di e reserva di divisanan (excluyendo revaluacion) lo por crece cu Afl. 204,4 miyon te na Afl. 1,720.1 miyon. Esaki ta nifica cu e divisanan lo cubri 5,8 luna di pagonan di cuenta coriente, cu ta keda comfortabelmente riba e norma internacional di 3 luna.

E riesgonan primordial na e outlook aki ta retraso den e proyectonan di inversion, particularmente esnan relata na e trabounan pa converti e refineria den un “upgrader”. Tambe, considerando e incertidumbre geopolitico den e region como tambe e ambiente economico internacional debil, y competencia regional cu ta aumentando, e sector turistico lo keda probablemente vulnerabel pa shocknan di demanda.

Bayendo dilanti, riba termino mediano e Producto Bruto Domestico (PBD) (real) ta depende hopi riba con liher e refineria como un “upgrader” di crudo lo ta operacional. Pa ofrece un estimacion preliminario di produccion, BCA ta suministra un baseline scenario unda cu ta presumi cu e trabounan pa converti e refineria lo stimula inversionnan substancial y lo contribui na empleo desde 2016 pa dilanti. Inversionnan adicional ta asumi pa e periodo despues di 2018, durante cual tempo e refineria ta premira di bira operacional. Alternativamente, sin inversionnan significante y un crecemento di exportacion di turismo debil, e produccion den termino real ta premira di ahusta na un crecemento significantemente mas abou ariba termino largo.

Referiente na e previo proyeccion (April 2016), mester wordo nota cu e cifranan di PBD pa 2015 awor a wordo ahusta mas abou basa riba menos actividadnan di free-zone cu anticipa. Ademas, indicadornan di inversion priva manera credito di empresanan, percepcion di futuro cercano di empresanan, como tambe importacion di machinnan pa Aruba ta indica un bahada mas grandi den inversion, compara cu e proyeccion di April 2016. Consecuentemente, PBD den termino real ta estima di a baha cu 0,5 porciento den 2015.


E publicacion completo ta disponibel riba nos website (www.cbaruba.org).

Expresionnan haci den e articulo aki no necesariamente ta refleha opinion di ArenaPoliti.co