{idkey=304b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4073-fraccion-mep-dicon-parlamento-a-bin-cu-amienda-7%3FItemid%3D101][title=Fraccion+MEP%3A+Dicon+Parlamento+a+bin+cu+amienda+%23+7%3F][desc=Conforme+hurisprudencia+di+corte+di+derecho+humano%2C+cu+ta+vigila+e+tratado+di+derecho+humano+na+cual+Aruba+tambe+ta+afilia%2C+cada+pais+mester+cumpli+cu+e+exigencianan+basico+di+derecho+humano.E+corte+ey+na+2015+a+dicta+cu+parehanan+di+mesun+sexo+no+tin+e+derecho+humano+pa+matrimonio%2C+pero+SI+tin+e+derecho+humano+di+%E2%80%98family+life%E2%80%99+pa+biba+cu+otro.E+mesun+corte+a+impone+riba+tur+pais+afilia+pa+respeta+e+derecho+humano+di+parehanan+di+mesun+sexo.+Y+si+un+pais+no+kier+ancra+e+matrimonio+entre+pers]}
Conforme hurisprudencia di corte di derecho humano, cu ta vigila e tratado di derecho humano na cual Aruba tambe ta afilia, cada pais mester cumpli cu e exigencianan basico di derecho humano.
E corte ey na 2015 a dicta cu parehanan di mesun sexo no tin e derecho humano pa matrimonio, pero SI tin e derecho humano di ‘family life’ pa biba cu otro.
E mesun corte a impone riba tur pais afilia pa respeta e derecho humano di parehanan di mesun sexo. Y si un pais no kier ancra e matrimonio entre personanan di mesun sexo den su leynan, e ta oblige SI pa ancra un otro alternativa pa nan. Corte di derecho humano ta laga espacio pa cada pais tene cuenta cu su cultura, norma y balornan, pero limita. Pesey e corte ta duna e opcion na cada pais. Si e pais NO kier ancra e matrimonio di mesun sexo den ley, e pais tin e obligacion di crea un otro alternativa.
Si e pais NO crea e otro alternativa, un hues por dicta na fabor di ancramento di matrimonio di mesun sexo den nos leynan local.
Na Aruba un hues a dicta na mei ultimo den un caso similar cu debi cu gobierno tabata negligente pa ancra un derecho den ley (den e caso ey, derecho di un mucha pa haya e fam di su mama), corte a dicta na fabor di e mama y maske cu ley no ta permiti un mucha carga fam di su mama, toch corte a dicta na su fabor, pasobra gobierno tabata negligente den regla esaki.
En bista cu e parlamentario de Sousa-Croes a anuncia caba cu e lo acudi na corte, e riesgo tabata grandi cu si Aruba no regla un alternativa pa parehanan di mesun sexo, cu un hues por a dicta na su fabor.
Pesey mester a bin cu un amienda # 7: pa cumpli cu e veredicto di corte di derecho humano pa ancra un alternativa den ley, union civil, pa asina matrimonio keda un instituto entre hende homber y hende muher.
Si amienda # 7 no a bin, y e alternativa di union civil no a wordo ancra den ley, awe e porta lo ta habri pa un hues dicta cu mester ancra e matrimonio entre persona di mesun sexo den ley. Y esaki no ta locual e comunidad Cristian ni Catolico kier pa Aruba.
E gran parti di nos comunidad, inclusive clero y representante religioso a urgi parlamentarionan pa percura pa esaki no pasa. Pa hasi tur lo posibel pa matrimonio keda e instituto entrer hende homber y hende muher.
E UNICO forma pa por a logra esaki, ta atraves di amienda # 7, den cual ta brinda un alternativa na parehanan di mesun sexo, pa asina segura cu matrimonio ta keda entre hende homber y hende muher.

SI AMIENDA # 7 NO A BIN, MATRIMONIO DI PERSONA DI MESUN SEXO LO A BIRA POSIBLE NA ARUBA. 

Expresionnan haci den e articulo aki no necesariamente ta refleha opinion di ArenaPoliti.co