{idkey=5642b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5841-curtis-fraser-por-tatanan-tambe-merece-verlof-pa-cuida-nan-famia%3FItemid%3D101][title=Curtis+Fraser+%28POR%29%3A+Tatanan+tambe+merece+verlof+pa+cuida+nan+famia][desc=]}
Ultimo fin di siman Aruba a celebra dia di tata y tur caminda por a lesa hopi palabra bunita dedica na nos tatanan, pero con hopi nos leynan ta permiti un tata contribui na e yegada su yiu? 

Algun luna atras nos a yama bon bini na mi tercer yiu, e ta e yiu cu a tuma su santo pasenshi pa conoce su mama y tata pero despues di henter un dia na hospital nos no por a ta mas felis. Mi yiu y pareha mester a keda algun dia extra den hospital pa observacion, y esaki a hasimi pensa un bes mas ariba e derechonan un tata tin na pais Aruba ora di yama su yiu bon bini. E trato for di con hopi un tata mag di ta cu su famia na hospital te cu e cantidad di dianan liber, cu pago, cu ta disponibel na un tata pa e soru pa y disfruta di su famia ta laga di desea. 

Bou di ley actual un tata por conta cu solamente dos dia liber cu pago (Artikel 1614cd), esaki por aumenta e stress riba un tata unda su famia tin mester di su contribucion y trabou ta pone presion pa e bin traha bek.

Tatanan cu kier presencia un di e experiencianan mas bunita pa un famia y alaves yuda cu tur e necesidadnan nobo di su baby recien naci, pareha, y yiunan existente no tin un manera sigur pa yega na e dianan necesario pa hasi esaki. Hopi tata ta tuma dianan di vakantie of nan ta bay AO pa pasa mas tempo cu nan famia. Un cantidad creciente ta hasi manera ami a hasi ora mi di dos yiu a nace na December 2012 y ta tuma un "leave of absence"; esaki kiermen cu nan lo no ricibi pago pa e dianan cu nan no presenta na trabou. Den mi caso, como IT Manager, mi por a yega na un areglo cu trabou y tabata disponibel via cellular y por a drecha asuntonan urgente via internet. Esaki no ta posibel pa tur hende y e status cuo ta pone nan dicidi entre trabou y famia, un hecho cu no ta husto.

E vinculo entre mama y yiu ta cuminsa desaroya prome cu e yiu nace y, teniendo na cuenta e enlace entre tata y yiu, no tin un ‘suficiente tempran’ pa un tata ta involucra den e bida di su yiu.

Pero kiko ta e ingridientenan pa regla verlof di un tata?
Logicamente e verlof  lo cuminsa despues cu e proceso di e parto inicia, y esun pa ricibi e verlof lo ta e pareha di e mama…esey por ta e casa, partner registra, cohabitante, of esun cu a reconoce e yiu.

Tin diferente manera pa trata e tempo cu e tata lo por haya pa e participa den e cuido di e baby na cas hunto cu e mama.

E tata lo por haya un tempo liber defini, cu pago, pa e tambe participa den e cuido y responsabilidad rond di su recien naci. E tempo defini lo mester ta un bon balance entre respet pa famia y comercio; recomendacion di e Comision Europeo ta 10 dia.

Un di dos opcion ta pa, un tempo defini, e tata haya algun ora pa dia liber cu pago, un ehempel ta cuater ora pa dia; esaki a wordo proponi pa gobierno na 2013 pero nos no a tende nada mas di e ley aki.  

Un tercer opcion ta pa durante e verlof e tata ricibi 80% di su salario. E tercer opcion por bay en combinacion cu e prome opcion, na unda si e tempo defini ta dos siman, e tata lo haya por ehempel 100% di su salario e prome siman y si e dicidi di tuma e di dos siman lo e haya esaki paga na 80%.

Asina tin diferente opcion, tur cu e proposito pa duna honor na e famia moderno unda legislacion pa e rol di un tata a keda atras. Di e forma aki un tata lo por disfruta di su famia y e adicion nobo den e pas mereci; tatanan ta parti di e famia y merece e oportunidad pa contribui na dje.

Expresionnan haci den e articulo aki no necesariamente ta refleha opinion di ArenaPoliti.co