{idkey=7662b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5563-evelyn-wever-croes-mep-nos-prioridad-ta-pa-drecha-e-calidad-di-cuido-y-salud%3FItemid%3D101][title=Evelyn+Wever-Croes+%28MEP%29%3A+Nos+prioridad+ta+pa+drecha+e+calidad+di+cuido+y+salud][desc=Den+e+conferencia+di+prensa+di+Partido+MEP%2C+lider+di+MEP%2C+sra+Evelyn+Wever-Croes+a+elabora+riba+e+vision+di+MEP+pa+loke+ta+trata+cuido+y+salud+di+Aruba.+Sra+Croes+ta+bisa+lo+siguiente%3A%26amp%3Bnbsp%3B%E2%80%9CDurante+nos+ta+campa%C3%B1ando+den+San+Nicolas+den+fin+di+siman+cu+a+pasa%2C+nos+a+wordo+confronta+cu+un+caso+cu+nos+ta+considera+basta+serio.+Nos+a+topa+cu+un+persona+cu+mester+haci+operacion+ya+di+a%C3%B1a+pasa+november.+Esaki+a+wordo+posponi+pa+maart+e+a%C3%B1a+aki.+Y+atrobe+el+a+wordo+posponi+pa+november+venidero.+E]}
Den e conferencia di prensa di Partido MEP, lider di MEP, sra Evelyn Wever-Croes a elabora riba e vision di MEP pa loke ta trata cuido y salud di Aruba. Sra Croes ta bisa lo siguiente: 

“Durante nos ta campañando den San Nicolas den fin di siman cu a pasa, nos a wordo confronta cu un caso cu nos ta considera basta serio. Nos a topa cu un persona cu mester haci operacion ya di aña pasa november. Esaki a wordo posponi pa maart e aña aki. Y atrobe el a wordo posponi pa november venidero. E motibo di esaki ta cu no tin material pa haci operacion di wowo aki na Aruba. Dus e persona aki mester warda un aña pa haci un operacion di wowo cu e speransa cu pa e tempo ey si lo tin material pa haci operacion di wowo.

Esaki no ta e prome biaha cu nos a tende tin problema pa cu cu material pa haci operacion di wowo. Minister Schwengle a laga sa den Parlamento cu tur e problema aki a wordo soluciona caba. Scuchando pueblo, atrobe nos ta wordo confirma cu Minister Schwengle a bolbe gaña henter Parlamento y e pueblo di Aruba pasobra e no a soluciona e problema aki. 

Pa motibo di esaki mes, hendenan ta wordo perhudica. No ta posibel cu mester warda te un aña pa haci un operacion asina delicado manera operacion di wowo. Nos cuido di salud ta wordo neglisha y masacra durante 8 aña AVP. Y ta obvio cu e situacion aki no por keda asina. 

Nos mester di un solucion. Nos mester percura cu e pashent ta central. E cuido mester yega mas cerca di e pashent pa asina e no cana un caminda di cruz pa e haya su cuido y salud. 
Den programa di vision di Partido MEP nos lo zorg cu tur pashent wordo atendi di biaha. Aki mi lo menciona tres punto riba nos programa cu nos lo atende cu ne.

1. Percura pa corta e tempo di espera na dokter. 
Nos lo percura cu e tempo di espera pa wordo atendi na dokter, wordo corta asina haci posibel cu un pashent no mester warda asina tanto mas prome cu e haya un cita. Awor aki tin un atraso bastante pisa.
MEP tin pensa di trece un grupo di dokter certifica pa yuda nos dokternan pa asina nos ‘haal in” e retraso aki tumando e tempo cu esaki mester tuma pa asina nos por tin un cuido di salud apropia pa nos comunidad pa despues nos dokternan mes sigui atende y mantene esaki na e nivel cu nos ta desea di mira nos cuido di salud.

2.Percura pa corta tempo di espera pa haci testnan na Hospital
Ora cu mester haci cualkier test na Hospital, e tempo di warda pa haci esaki tambe mester wordo corta. Na e momento aki, e mashinnan ta traha di 7’or di mainta pa 3’or di atardi. E orario aki mester wordo extendi. Mester inverti den mas trahador pa asina por extende e orario pa asina no solamente mas pashent por wordo atendi pero tambe resultado di testnan por worde entrega mas lihe tambe.

3. Percura pa corta tempo di espera pa haci operacion
Sala di operacion actualmente, pa operacion regular ta funciona di 7’or di mainta pa 3’or di atardi. Pa esaki tambe nos lo alarga e orario y inverti den mas personal pa asina mas operacionnan por wordo haci y coregi e sistema di keda warda mucho tempo prome cu wordo opera”.

Lider di MEP ta conclui bisando: “Esakinan ta algun detayenan cu nos tin den nos vision di salud. Aruba completo ta desea un cambio riba terenco di cuido y salud. Y MEP lo ofrece e cambio aki manera cu nos ta den gobierno. Nos prioridad ta pa drecha e calidad di cuido y salud”.

Expresionnan haci den e articulo aki no necesariamente ta refleha opinion di ArenaPoliti.co