{idkey=9790b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5770-upp-lider-di-upp-den-un-forma-serio-al-caso-y-sin-populismo-a-informa-pueblo-den-e-debate%3FItemid%3D101][title=UPP%3A+Lider+di+UPP+den+un+forma+serio%2C+al+caso+y+sin+populismo+a+informa+pueblo+den+e+debate%21][desc=]}
Durante e debate di siman pasa, hopi a spera un lider di UPP, cu un actidud di un enfant terible. Pero nos por a mira un lider politico cu na un manera serio a trece e  puntonan​ di bista di UPP riba e preguntanan durante e debate di diahuebs pasá.
Ta hopi dificil pa den 2 minuut splica tur aspecto di e ideanan di UPP. Ta pesey ta na su lugar pa UPP elabora un poco riba e partinan mas importante di e loke e lider di UPP a trece padilanti.
Nos lo cuminza cu e parti cu sr. Wever a elabora riba cada un punto cu ela trece padilanti, esta e necesidad di introduccion di e reglanan estricto di Bon Gobernacion. Si nos kier pone nos economia cu ta stanca, cuminza draai atrobe, ta indespensabel pa introduccion di esaki. Si nos kier un saneamento di nos situacion financiero cu ta alarmante, introduccion di e reglanan aki ta indespensabel tambe. Pues e reglanan aki ta core manera un linea cora den tur loke nos lo kier hasi pa duna e pueblo e speranza cu cos lo por drecha. 
Asina nos lo por pone e prioridadnan corecto y un di e aspectonan cu a ser treci dilanti ta cu lo mester re-inventa y re- diseña nos enseñanza den e estilo di Finlandia pa di e manera ey crea ciudadanonan bon prepara y alabes critico y independiente.  E enseñanza mester ta uno di INCLUSION y cu participacion di alumno, maestro,mayornan, bario y pais. Y introduccion di Papiamento, como idioma di instruccion,den e prome añanan di e ciclo basico lo mester tuma lugar y tambe, despues di un estudio al respecto,  dicidi cua ta e idioma cu mester bira e idioma di instruccion pa e resto di e añanan te cu e hoben sigui pa educacion avansa, banda di e otro idiomanan cu ya caba ta ser duna como materia.

Cu e reglanan aki "in place" lo bai tin oportunidad atrobe pa inversionnan,den e sector priva, lo ser hasi pasobra tin confianza atrobe cu tin un gobernacion drechi y tur esnan cu kier inverti sa kiko e reglanan ta cu e mester cumpli cune pa e por bin na remarke pa haya e permisonan necesario den un tempo cortico y eno ta depende di e placa cu e ta dispuesto pa paga bow mesa pa esaki. 
Tambe e lider a papia di incentivonan fiscal cu lo mester duna na e Young Entrepreneur local pa hasie interesante pa e inverti na Aruba.

Den cuadro di esaki, e lider a trece padilanti tambe cu ta indespensabel pa mas lihe cu ta posibel pa introduccion di e asina yama: "Mededingingsautoriteit", cu ta den lachi di e ministerio di Economia for di 2013 caba. E organo aki for di 2014 ya a wordo institui na Corsow y cu hopi exito. E autoridad aki tin como tarea pa percura pa caba cu tur tipo di "prijsafspraken" y/of abuso di prijsnan. Esaki tin como consecuencia cu lo caba cu e competencia inhusto y lo percura pa e prijs di costo di bida baha considerabelmente. Y alabes lo habri e posibilidad cu nos propio hendenan por cuminza cu nan negoshi, sin tin miedo cu esnan cu ta hasi  di tipo di actonan p.e. di prijsafspraken, lo stroba nan. 
Na Corsou esaki a percura cu e gastonan di costo di bida ta mas abou cu Aruba. E organo aki por actua riba tur tereno y ta completamente independiente di gobierno. 
Djis pa menciona algun ehempel elo por bai investiga si e prijs pa baha un container aki na Aruba ta husto. Na Corsou esaki ta 500 florin pa baha un container di 20 pia y na Aruba esaki ta 1200 florin. Dicon?
Na Corsou e prijs di un saco di cement ta 60% mas barata cu Aruba, con bin un diferencia grandi asina. 
Hopi aña ta papia di e asina yama "brandstofclausule" cu ta ser cobra aki na Aruba, esaki lo ta algo cu e autorodad aki lo por bai investiga y e tin e autoridad di duna instruccion pa baha y/of elimina esaki. 
Pues cu esaki tur inversionista lo tin un "level playing field" y lo bai baha prijs in general aki na Aruba manera ela sosode na Corsou.
Mirando cu e concepto aki ta completamente cla pa wordo trata esaki por ser introduci dentro di 100 dia di gobernacion.
Un otro punto hopi importante y resaltante ta ora cu e lider di UPP a declara cu UPP ta contra cualkier proyecto hotelero. Na 2013 UPP tabata pro di boutique hotel di 5 strea, pero mientras tanto nos a cambia esey mirando e hecho cu proyectonan di hotel, no ta trece ningun benficio mas pa nos pais. Sigur mirando e hecho cu ta crea trabou, pero mas bien pa trece hende di afo. Di cada 100 empleado 3 so ta yui di tera. Esey kiermeen mas stress riba nos medio ambiente, schoolnan, AZV etc etc. Nos no por bira e "vangnet" pa e desempleo of situacion financiero di otro paisnan. Loke ela trece padilanti ta cu lo mester duna incentivonan na e hotelnan cu tey caba pa "up-grade" nan hotel pa asina ey atrae e turista di miho calidad cu lo por gasta mas aki na Aruba. 

Por ultimo, e lider di UPP a trece padilanti e importancia di duna e partidonan chikito un oportunidad di drenta parlamento.  El a trece padilanti cu den politica tin dos variabel, esta e set di reglanan cu ta conta y e hendenan cu ta participa den esaki.
Y semper loke ta cambia despues di un tempo(tur ora ta keda critica otro) ta e variabel "hendenan," pero e variabel "reglanan" nunca kier trece cambionan fundamental y necesario den esakinan. No ta combini e partidonan tradicional cambia esakinan tampoco. Den un coalicion cu varios partidonan chikito, e control riba gobierno lo bira uno real y e cambionan fundamental y necesario den e reglanan den politica sigur lo ser introduci. 
Si pueblo realmente kier cambio den con Aruba mester wordo goberna ta un conditio sine qua none cu mester duna e partidonan chikito un oportunidad pa trece e cambionan aki. Cambionan den regla. Y pa haci esaki, nos pueblo por haci e diferencia, dor di no vota “tradicional” mas.  
UPP tin e Real Deal pa esaki pa garantiza un Miho Mañan!!


Partido Union Patriotico Progresista
11 di juni 2017

Expresionnan haci den e articulo aki no necesariamente ta refleha opinion di ArenaPoliti.co