{idkey=7980b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4829-evelyn-wever-croes-mep-mi-ta-reta-mike-eman-pa-un-debate%3FItemid%3D101][title=Evelyn+Wever-Croes+%28MEP%29%3A+Mi+ta+reta+Mike+Eman+pa+un+debate][desc=+CAMPANJA+ELECTORAL+MESTER+BAI+RIBA+NIVEL%2C+SIN+MESTER+OFENDE+FAMIA+%26amp%3Bnbsp%3B+%26amp%3Bnbsp%3BSTA.+CRUZ+%E2%80%93+Aruba+ta+para+na+comienso+di+un+a%C3%B1a+nobo%2C+e+a%C3%B1a+di+campa%C3%B1a+electoral.+%E2%80%9CCampa%C3%B1ando+den+barionan+mi+ta+tende+mas+y+mas+e+deseo+den+comunidad+pa+e+campa%C3%B1a+electoral+bai+na+otro+nivel.+Pueblo+ta+cansa+di+e+forma+baho+cu+AVP+ta+hiba+campa%C3%B1a%2C+den+cual+ta+demonisa+nan+oponente+y+ta+insulta+famia.+Bo+ta+scucha+esey+constantemente+tambe+den+Parlamento.+Ora+ami+ta+na+palabra%2C+e+coro+di+parlamentarionan]}

CAMPANJA ELECTORAL MESTER BAI RIBA NIVEL, SIN MESTER OFENDE FAMIA    

STA. CRUZ – Aruba ta para na comienso di un aña nobo, e aña di campaña electoral. “Campañando den barionan mi ta tende mas y mas e deseo den comunidad pa e campaña electoral bai na otro nivel. Pueblo ta cansa di e forma baho cu AVP ta hiba campaña, den cual ta demonisa nan oponente y ta insulta famia. Bo ta scucha esey constantemente tambe den Parlamento.

Ora ami ta na palabra, e coro di parlamentarionan di AVP cu no tin curashi pa hiba un discurso ta cuminsa grita y tira palabra pami. E ministernan di AVP no ta keda atras den e tiramento di lodo aki. Usualmente nan ta grita palabra malo, y nan ta insulta mi mama, mi tata, mi ruman defunto. Ultimadamente hasta nan ta hinca mi casa den nan insultonan, rebahando nan mes te na suela, manera Clariska Velasquez den ultimo tempo. Pueblo ta wak esaki, y pueblo ta cansa di esaki, y lamentablemente e presidente di parlamento no ta y no kier actua.

Pesey nos ta ofrese na pueblo un alternativa: debate riba contenido, no riba asuntonan priva ni familiar cu no tin nada di haber cu e asunto. Y mi kier urgi prome minister Mike Eman pa e hasi mescos. Pa e instrui su hendenan pa keda na nivel, cual por cierto ta conta pa e mes tambe.

MI TA RETA MIKE EMAN PA UN DEBATE

Mi ta reta Mike Eman pa un debate, pa nos presenta nos vision, y kiko cada un tin pa ofrese Aruba. Con nos por soluciona e problemanan serio cu tin na Aruba, por ehempel e insiguridad cu ta asotando nos pais. Caminda bo no ta sigur mas den bo cas, ni riba caya, ni na pia di trabou. Un otro problema serio ta e cuido medico cu ta cabando cu nos hendenan, especialmente debi na e listanan largo di espera, y e operacionnan cu a wordo cancela pasobra no tin material pa opera. Un otro problema ta cu costo di bida a subi drasticamente, y hopi hende mester traha mas di un trabou pa por paga nan debenan, y miles di famia ta bibando sin coriente.

Ami ta reta Mike Eman ban debati con nos ta bai trese alivio pa nos pueblo riba e diferente temanan aki, kiko ta e solucionnan cu AVP tin pa ofrese y kiko ta e solucionnan cu MEP tin pa ofrese, pa asina pueblo por hasi un bon escohencia na September 2017.

Nos pueblo merese mihor, nos pueblo merese alivio, y nos pueblo merese politiconan cu por debati cu otro na nivel, sin mester insulta famia”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co