{idkey=8992b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F345-evelyn-wever-croes-anja-2014-tabata-e-anja-di-e-berdad%3FItemid%3D101][title=Evelyn+Wever-Croes%3A+Anja+2014+tabata+e+anja+di+e+berdad][desc=E+programa+semanal+di+partido+MEP+%26%23039%3BAruba+Merece+Mihor%26%23039%3B+cada+biaha+ta+hala+mas+atencion.+Den+e+programa+di+dialuna+15+december%2C+lider+di+MEP+Evelyn+Wever-Croes+a+elabora+riba+e+anja+2014%2C+cual+tabata+e+anja+di+berdad.+E+anja+cu+un+stranjo+mester+a+bin+bisa+nos+con+malo+e+situacion+financiero+di+nos+pais+ta+realmente.+Aki+ta+referi+na+e+KB+di+juli+2014+y+e+investigacionnan+di+CFT+cu+a+revela+tur+e+berdadnan+cu+gabinete+Mike+Eman+a+purba+tene+scondi.+%26quot%3BNos+tabata+conose+e+berdad+nan+aki+caba%2C+nos+a]}

E programa semanal di partido MEP 'Aruba Merece Mihor' cada biaha ta hala mas atencion. Den e programa di dialuna 15 december, lider di MEP Evelyn Wever-Croes a elabora riba e anja 2014, cual tabata e anja di berdad. E anja cu un stranjo mester a bin bisa nos con malo e situacion financiero di nos pais ta realmente. Aki ta referi na e KB di juli 2014 y e investigacionnan di CFT cu a revela tur e berdadnan cu gabinete Mike Eman a purba tene scondi.

"Nos tabata conose e berdad nan aki caba, nos a purba hasi bo conciente di e realidad aki. Sinembargo Mike Eman a gana simpatia cu su mentiranan. El'a ganja bo cu cos ta bon, cu no mester di medida. Es mas, Mike Eman a bisa cu si mester di medida, pa bai serca MEP. Awor nos tur por mira e berdad y e realidad con malo e situacion financiero ta, nos tur a biba e racha di medidanan di gabinete Mike Eman, y locual ta mas preocupante, nos a scucha nan anuncia mucho mas medida cu mester wordo tuma pa recupera di e desastre financiero cu Mike Eman a ocasiona", segun e lider di MEP.

Y en bes cu Mike Eman y demas gobernantenan papia di e realidadnan duro y cruel cu nos pueblo ta bibando, nan ta scohe pa sigi manipula, pa sigi hunga cu mente di hende. Pasobra si bo a scucha nan den reunionnan di Parlamento, nan ta cu e mesun cantaleta di 8 anja MEP, cu cosnan cu a pasa 13 anja pasa, djis pa no mester enfrenta e realidadnan cu nos ta bibando.

Lider di MEP Evelyn Wever-Croes na forma consiso y efectivo a relata e dolornan riba tereno social cu hopi problema di pobresa y problema familiar causa pa falta di empleo, di cual ta nos muchanan ta bira victima; costo di bida haltisimo, empeora pa e aumento di BBO na forma iresponsabel; insiguridad cresiente cu atraco na orden di dia; ensenjansa neglisha; economia stagna y falta di vision den turismo.

Finalmente Evelyn Wever-Croes a elabora riba e papel cu Aruba tin den Reino actualmente, refleccionando riba 60 anja di Statuut. Aruba tabata e pais den reino cu tabata pionero den tereno di autonomia, pa hopi anja a wordo considera e orguyo di Reino, e pais cu a inspira demas islanan den Reino. "Tur cos tabata bai bon te dia a toca nos pais e desgracia na momento cu Mike Eman a tuma mando. E desgracia cu el'a ocasiona nos pais, awe a pone cu nos ta e berguensa di reino. Nos prome minister ta wordo considera un "bi-polar tiener meisje" na Hulanda, y recientemente CFT a declara cu e problemanan di Aruba ta 5 biaha mas peor cu di Curacao. Nos di MEP lo traha duro pa trese e orguyo bek, di hasi nos cuidadanonan orguyoso di nan pais, di lidernan den nan pais; pa Aruba un biaha mas ta esun cu ta inspira demas islanan, pasobra Aruba merece mihor, abo merece mucho mihor".

E programa a pasa dialuna anochi 9.10 p.m. na Canal 22 y lo wordo ripiti diaranson awor 9.10 p.m.

Expresionnan haci den e articulo aki no necesariamente ta refleha opinion di ArenaPoliti.co