{idkey=2934b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5671-gabinete-me-ii-placa-di-pueblo-a-percura-pa-construccion-y-renobacion-di-casi-80-scol-na-aruba%3FItemid%3D101][title=Gabinete+ME+II%3A+Placa+di+pueblo+a+percura+pa+construccion+y+renobacion+di+casi+80+scol+na+Aruba][desc=ORANJESTAD+-+Prome+Minister+Mike+Eman+hunto+cu+Minister+di+Ense%C3%B1ansa+Michelle+Hooyboer+Winklaar+y+Minister+di+Infrastructura+Benny+Sevinger+tabata+di+bishita+na+e+edificio+nobo+di+Prinses+Amalia+Basisschool%2C+na+Seroe+Blanco+%28net+pariba+di+EPI%29+unda+a+haya+nan+a+haya+un+recorido+di+tur+e+facilidadnan+di+e+proyecto.Ministerio+di+Ense%C3%B1ansa+a+pone+casi+6+miyon+florin+disponibel+pa+construccion+di+un+facilidad+moderno+pa+studiantenan.+Un+joya+di+edificio+cu+lo+wordo+estrena+na+inicio+di+a%C3%B1a+escola]}
ORANJESTAD - Prome Minister Mike Eman hunto cu Minister di Enseñansa Michelle Hooyboer Winklaar y Minister di Infrastructura Benny Sevinger tabata di bishita na e edificio nobo di Prinses Amalia Basisschool, na Seroe Blanco (net pariba di EPI) unda a haya nan a haya un recorido di tur e facilidadnan di e proyecto.

Ministerio di Enseñansa a pone casi 6 miyon florin disponibel pa construccion di un facilidad moderno pa studiantenan. Un joya di edificio cu lo wordo estrena na inicio di aña escolar nobo.

Un infrastructura moderno, accesibel y adecua pa muchanan por wordo educa ta di importancia grandi pa nos comunidad. E ta un di e fundamentonan di un bon calidad di bida di nos comunidad. Esaki ta motibo cu casi 80 scol a haya atencion di e Ministernan encarga cu Enseñansa den e dos periodonan di Gobernacion di 2009 pa awo. Pero kier haci mas, y pesey ta studiando pa introduci e concepto di PPP (Public Private Partnership) den Enseñansa tambe. E motibo ta cu kier bini cu e concepto aki, Prome Minister Mike Eman a bisa den su discurso na e edificio nobo, ta cu kier yega na facilidadnan moderno y adecua pa educacion. Di e forma ey “nos ta yega na acomodacionnan completo manera esun nobo di Prinses Amalia Basisschool, cu ta bon diseña den consulta cu esnan envolvi. Asina ta trece e ultimo desaroyo tecnologico, manera klasnan cu airco, Wi-Fi, areanan multifuncional, gymzaal moderno. E conceptonan nobo pa construccion di nos scolnan ta forma un parti escencial di e plan pa sigui padilanti.”

E cantidad di scolnan cu falta pa wordo renoba ta hopi ainda. Prome Minister Eman a splica cu esaki ta debi cu durante hopi aña e renobacion y mantencion di tur loke ta espacionan publico, prome cu 2009, no tabata haya e atencion cu e mereci. Esaki a causa edificionan deteriora, infrastructura, bario y scolnan deteriora. “E retraso di mantencion y renobacion cu nos mester a traha riba dje tabata sumamente grandi den e ultimo 8 aña. Nos a haci e trabou cu un determinacion grandi, pa haci un diferencia cu comunidad a pidi p’e y ta visibel tur rond Aruba. Pero ainda falta y esey ta e compromiso pa sigui cu e desaroyonan aki di renobacion di nos scolnan cu ta trece un alegria y un motivacion pa e calidad di enseñansa,” Prome Minister Eman a bisa. El a finalisa bisando cu di e forma aki por mira cu e placa di comunidad ta yega cerca comunidad bek, manera ta bay ta e caso cu construccion di un scol grandi na Noord. 

Expresionnan haci den e articulo aki no necesariamente ta refleha opinion di ArenaPoliti.co