{idkey=8432b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5702-otmar-oduber-por-palabranan-di-elogio-pa-colaboracion-entre-instancianan-pa-contraresta-dano-oil-spill%3FItemid%3D101][title=Otmar+Oduber+%28POR%29%3A+Palabranan+di+elogio+pa+colaboracion+entre+instancianan+pa+contraresta+da%C3%B1o+oil+spill][desc=]}
‘Ta elogia e trabou en conhunto cu ta wordo haci pa tur e departamentonan cu ta coordina cu otro pa mitiga mas cu ta
posibel e daño di e oil spill. Como ex Minister encarga cu Turismo ta consciente di e daño cu esaki por causa na nos
Turismo, pero mas ainda e daño cu e ta causa na nos medio ambiente, bestianan y bida marino’, Otmar Oduber a expresa.

Un oil spill semper ta keda un situacion cu ta lamenta y aworaki mester purba mas cu por pa contene esaki te unda cu por, pero tambe haci e areanan afecta limpi. Desde diadomingo por a tuma nota di manchanan cu a flota yega nos costa, despues cu e oil spill a tuma luga na Trinidad mas cu 1 luna pasa.

Ley/Responsabilidad
Como ex Minister encarga tambe cu asuntonan maritimo sr. Oduber tabatin e oportunidad pa revisa varios ley pa Directie Scheepvaart. Entre esakinan a revisa e ley unda ta trata e “vervuiling” cu ta tuma luga door di barconan riba lama. Den e caso/situacion actual ta trata un situacion full diferente si, como cu ta trata un Pais cu tabatin un ‘derrame’ di azeta y esaki a flota bay diferente Pais den region y ta perhudicando diferente Pais. Esaki ta algo cu por claim y ta regla den e tratado cu e Pais ta haci un claim na e otro Pais cu a causa e ‘derrame’. Ta bon pa menciona cu den e caso di un barco esey ta wordo regla via di un ley special cu tin cual mester a wordo modernisa. Ta importante pa haci test pa determina e tipo di azeta cu ta yegando nos costa y asina midi e grado di peliger pa hende. E “test samples” ta importante pa na momento cu ta haci e ‘claim’ cu por demostra cu e azeta a bin di dicho ‘derrame’, pa e ora e Pais por para responsabel pa e daño cu esaki a haci.

Den futuro lo mester wak con por prepara un ekipo cu por atende cu e situacion un poco mas adelanta. A pesar cu hopi
biaha no tin un formula exacto pa atende cu e tipo di situacionan aki, ta importante pa tin un plan “in place” pa ora e
situacion presenta tur hende/ departamento sa con pa actua y ta activa di biaha.

Concluyendo sr. Oduber a bisa: “Mi ta spera gobierno actua na un forma responsabel y no pone bida di esnan cu nan ta pidi pa bira voluntario na peliger. Aworaki ta importante pa actua conforme e criterianan internacional pa atende cu e oil spill. No mester haci cos pa ta popular den esaki, sino mester haci lo corecto.”

Expresionnan haci den e articulo aki no necesariamente ta refleha opinion di ArenaPoliti.co