{idkey=5713b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5689-booshi-wever-upp-solucion-pa-problema-den-salubridad-no-tin-lugar-pa-populismo%3FItemid%3D101][title=Booshi+Wever+%28UPP%29%3A+Solucion+pa+problema+den+salubridad+no+tin+lugar+pa+populismo][desc=+Den+e+ultimo+simannan+nos+por+a+tuma+nota+di+masha+hopi+plannan+populista+pa+delaster+un+%26amp%3Bnbsp%3Bproblema+cu+nos+pueblo+ta+pasando+aden.+Ta+un+hilaridad+di+tende+cu+di+un+banda+%26amp%3Bnbsp%3Bcon+malo+e+situacion+financiero+ta+y+di+un+otro+banda+promesa+populista+tras+di+promesa+populista+ta+ser+tira+den+laira.+Hasta+tin+cu+ta+bisa+cu+a+boycot+proyectonan%2C+siendo+cu+e+mes+a+yuda+casi+8+a%C3%B1a+den+e+boycotnann+aki.+Nos+ta+referi+aki+na+tanto+ImSan+como+na+e+proyecto+di+dump+na+Parkietenbos.%26amp%3Bnbsp%3BNos+a+tum]}

Den e ultimo simannan nos por a tuma nota di masha hopi plannan populista pa delaster un  problema cu nos pueblo ta pasando aden. Ta un hilaridad di tende cu di un banda  con malo e situacion financiero ta y di un otro banda promesa populista tras di promesa populista ta ser tira den laira. Hasta tin cu ta bisa cu a boycot proyectonan, siendo cu e mes a yuda casi 8 aña den e boycotnann aki. Nos ta referi aki na tanto ImSan como na e proyecto di dump na Parkietenbos. 

Nos a tuma nota tambe di un idea pa solucion di nos problema di "wachttijden".  Cu e idea aki ta kere di por soluciona esaki cu introduccion di un supuesto brigada di salud. Un concepto cu segun nan, lo trece alivio pa e pueblo ya cu lo elimina e tempo pa haña un cita cu specialistanan medico. E plan aki lo ser financia cu e 50 miyon  cu awor ta wordo usa pa paga e.o. coordinadornan, viahamento y promocion. 

E ta inconcevibel cu por argumenta cu e concepto di brigada lo trece solucion pa e problema grandi cu salud ta confronta aki na Aruba pero tambe den exterior. 

Na prome lugar por papia aki di un accion y solucion POPULISTA, manera Trump a haci na Merca cu e muraya cu e kier construi pa para ilegalidad y criminalidad. Na di dos lugar mester categorisa e opcion aki como un accion ad-hoc. Un accion cu lo aumenta gasto y cu no lo trece un solucion a termino largo y duradero. Na di tres lugar kier busca financiamento di e brigada cu placa cu no tin. Ta lubida cu e debe nacional ta inmenso y ta subi cada dia cu pasa, vooral si tene na cuenta e placa cu lo mester bay wordo paga na e PPP proyectonan.   

Si tin 50 miyon florin mes disponibel, anto esaki lo ta bay ta suficiente pa cubri enseñansa, criminalidad, salubridad y tambe yuda soluciona e problema di un economia stanca???

Si brigada lo mester ta e solucion pa nos problemanan, anto por spera un brigada di enseñansa, un brigada di husticia y un brigada di economía tambe???? Esey lo nifica cu mester bay trece docentenan di Hulanda pa algun luna pa soluciona e problema grandi cu tin den enseñansa? 

Lo mester bay busca awor di inmediato mas polis di Hulanda pa eherce ordo y disciplina? 

Mester tambe trece companianan cu lo bay forma un brigada pa duna un empuhe na nos economia?   

UPP ta kere cu mester stop cu solucionnan populista cu tin como unico meta tira santo den wowo di nos pueblo sin cu ta ofrece un solucion berdadero y duradero. Promesa y mas promesa, pero parce cu e declaracion hasi den pasado pa un politico ainda ta valido: campaña ta un y goberna ta otro. 

UPP ta di opinion cu mester brinda e pueblo un bista honesto y transparente di con e situacion actual ta y kico lo por ta alternativa pa alivia e problema di "wachttijden". 

Pa por logra alivia e dolor specifico aki, ya cu nos ta conciente cu tin otro problemanan den nos Salubridad Publico, UPP ta kere cu e siguiente pasonan mester tuma lugar:

1. Exigi claridad riba e proyecto di renobacion di hospital 2. Brinda e medico cu a gradua den regio e oportunidad di por eherce nan profesion aki, despues di a pasa e MIR di Spaña(idea cu tabata riba mesa caba na 2009) of e boards di Merca. E mediconan aki tambe mester por haña e oportunidad di sigui specialisa den hospitalnan renombra den regio. Asina ey nos lo por brinda un solucion definitivo pa e problema di lista di espera. 3.Habri oportunidad pa studiantenan di enfermeria of esnan cu ya caba ta traha como enfermero sigui estudionan avansa y specialisa. Nan por yuda e mediconan cu patientnan cronico di tal forma cu e medico lo tin mas tempo pa dedica na e patientnan nobo of cu problemanan mas agudo y problematico.   

Obviamente cu e opcion aki lo tarda un tempo pa duna un solucion mas efectivo den futuro, pero por lo menos por garantisa un solucion duradero y berdadero. Mientrastanto un gobernacion gobernando cu e reglanan di Good Governance in place  lo haña e tempo pa evalua kico y con grandi e desaster financiero ta cu e gobierno actual a laga atras, pa defini un plan concreto pa desaroya nos economia y pa dedica atencion na enseñansa y criminalidad cu ayudo di nos expertonan local. "The sky is not the limit"!!

No por sigui endeuda nos pueblo mas ainda, sigur no cu promesanan fofo. Nos ta biba den temponan dificil cu ta rekeri profesionalnan serio local cu lo mester duna un man pa trece alivio di un forma duradero. 

UPP ta cla pa e reto pa brinda e Pueblo Arubano e "Real Deal" cu lo ofrece nos pueblo un Miho Mañan!


Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co