{idkey=834b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5709-rene-herde-avp-si-cos-tabata-asina-bon-na-2008-dicon-a-pone-pais-y-pueblo-sufri%3FItemid%3D101][title=Rene+Herd%C3%A9+%28AVP%29%3A+Si+cos+tabata+asina+bon+na+2008+dicon+a+pone+pais+y+pueblo+sufri][desc=]}
Atrobe MEP ta purba crea e impresion cu cos tabata bon na Aruba bou gobierno di MEP. Hasta cu na 2008 e economia a crece mas cu nunca. MEP ta broma cu e GDP di Aruba a yega un record. Pero MEP no por y no kier splica ta dicon anto nos Pais y Pueblo mester a sufri tanto den e añanan ey. MEP no por y no kier splica ta dicon e entrada di trahadornan a keda pega for di 2001 te cu trahadornan di gobierno y maestronan di scol mester a welga 7 siman pa haya un tiki atencion. MEP no por y no kier splica ta dicon costo di bida a subi cu 24% entre 2001 y 2009, pero salarionan a keda mescos. MEP no por y no kier splica, si finansa publico tabata asina bon, ta dicon a laga fondonan di pensioen core peliger di kibra. Ta dicon a hunga cu pan di mas cu 20 mil pensionado awor y miles den futuro? Dicon tabata debe e fondo di APFA tanto placa? Si economia di Aruba tabata asina bon, ta dicon no por a regla un penisoen general pa tur trahado pa sigura nan un miho entrada den futuro? Si tabata tin tanto placa den caha di gobierno, ta dicon scolnan tabata den un estado asina malo y no tabata tin luga pa mucha bay scol? Ta dicon barionan rond di Aruba tabata den decadencia y scuridad? Ni un palo di lus por a pone? Dicon cayanan di nos ciudadnan a bira propiedad di adictonan di droga y tabata stroba polis di haci su trabou? Si cos tabata asina bon na 2008, ta dicon negoshinan den centro tabata sera y turismo tabata cai? Ta dicon gobierno di MEP no a usa e placa cu MEP ta bisa cu tabata tin, pa drecha scolnan y edificionan di gobierno, pa inverti den nos economia y pone hende bek na trabou? Si tabata tin tanto placa pakico a laga tanto hende sufri, sin trabou y sin speransa pa haya un trabou? Si tabata tin tanto placa, pakico a laga nos pais cai den decadencia y negligencia asina? 

Cada tanto tempo MEP ta conta e mes un storia cu cos tabata bon bou gobierno di MEP. E realidad cu pueblo a biba ta totalmente contrario na e storia aki. Pueblo a perde trabou, perde derecho, perde entrada y perde speransa bou di gobierno di MEP. E realidad ta tambe cu bou gobierno di AVP, pueblo a haya nan derechonan bek, pueblo a haya trabou atrobe, nan entrada a bolbe subi, tin oido y atencion pa necesidad di pueblo, esnan cu menos entrada a bay dilanti y pensionadonan ta sigur di nan entrada tur luna atrobe. Nos pais ta renoba y ta crece atrobe. Y tur hende ta beneficia di esaki atrobe. Esey ta e realidad di Aruba bou gobierno di AVP awe!

Expresionnan haci den e articulo aki no necesariamente ta refleha opinion di ArenaPoliti.co